Robláu’l conveniu del Plan de Sostenibilidá Turística d’Avilés

Robláu’l conveniu del Plan de Sostenibilidá Turística d’Avilés
11 xineru 14:18 2022 Imprimir

La Secretaría d’Estáu de Turismu, la Conseyería de Cultura, Política Llingüística y Turismu del Principáu d’Asturies y la Mancomunidá Comarca Avilés, roblaron el conveniu de financiamientu y execución del Plan de Sostenibilidá Turística Comarca Avilés “Ecorruta Oríxenes d’Asturies”.

Cuenta con una duración predeterminada de cuatro años y una inversión n’obres, servicios y productos turísticos por importe de 1.852.149,52 €, a sufragar poles trés alministraciones firmantes a razón de 617.383,16 € caúna d’elles.

El conveniu foi suscritu por Fernando Valdés, Secretariu d’Estáu de Turismu; Berta Piñán, conseyera de Turismu del Gobiernu asturianu; y Raquel Ruiz, presidenta de la Mancomunidá Comarca Avilés. El testu yá foi publicáu oficialmente nel rexistru de convenios del ministeriu d’Asuntos Económicos y Tresformamientu Dixital del Gobiernu d’España.

Tres esta firma, empieza de manera oficial la execución y desenvolvimientu del Plan de Sostenibilidá Turística que foi aprobáu na Conferencia Sectorial de Turismu’l pasáu branu, siendo unu de los proyectos escoyíos en réxime de concurrencia competitiva d’ente los más de 300 presentaos por otros tantos destinos españoles.

Nes primeres selmanes de 2022 va constituyise de manera formal la Comisión de Siguimientu del proyectu, conformada por representantes de les trés alministraciones impulsoras, y presidida por Raquel Ruiz. Va Ser l’órganu encargáu de definir cada añalidá de vixencia del Plan, les acciones a executar en caúna d’elles, y el presupuestu de les mesmes..

El proyectu presentáu pola Mancomunidá y que resultó aprobáu, preve inversiones n’obres, servicios o productos turísticos n’aspeutos como la sostenibilidá ambiental, la trasformación dixital o la promoción de productos que pongan en valor el patrimoniu cultural, paisaxísticu o natural de los cuatro conceyos de la contorna d’Avilés. El Plan tamién contempla una amplia estratexa de comunicación, sistemes de señalización intelixente, planes de formación, ellaboración d’estratexes de promoción y comercialización, y otros proyectos que se van dir definiendo nel desenvolvimientu del proyectu.

Esti Plan súmase a los otros dos yá desenvueltos dende la Mancomunidá: el Plan de Dinamización Turística, executáu ente 2004 y 2009 con un presupuestu de 2.520.000 euros y que xeneró grandes inversiones en recursos ya infraestructures turístiques de la contorna, y el Plan de Competitividá de Turismu Gastronómicu, desenvueltu a partir del añu 2010, y que contribuyó a consolidar productos yá tradicionales nel calendariu d’eventos de la contorna como’l Famous Wine Festival, o’l Pexe de la Rula d’Avilés y el so distintivu d’enfotu.

  Categories: