Roberto González-Quevedo va echar el pregón de la XXIII Fiesta de la Oficialidá de la Llingua Asturiana

22 xunu 03:52 2009 Imprimir

L’escritor, antropólogu lleonés y Secretariu de l’Academia de la Llingua Asturiana., Roberto González-Quevedo va ser el pregoneru de la fiesta que celebra cada añu’l Conceyu de Bimenes, y que va celebrase esti añu del 26 de xunu al sábadu 4 de xunetu, incluyendo como fin de fiesta, un conciertu de Los Gatos del Fornu, Los Ciquitrinos y DJ15.

El vienres 26 xunu na Casa la Cultura y a partir de les 20’00 hores va entamar la celebración cola presentación del programa d’actos. Del miércoles 24 xunu al miércoles 8 xunetu na Casa la Cultura, con horariu de cuatro a seis de la tarde, va tar abierta la esposición de les obres presentaes al “VI Concursu de Cómic n’Asturianu de la Comarca de la Sidra”.

El xueves 2 xunetu na Casa la Cultura a les 20’30 hores va representase la obra “Ello yera una vez…”, a cargu del Grupu de Teatru Carbayín. El vienres 3 xunetu na Casa la Cultura, y a partir de les 19’45 hores, van entregase los premios del “XII Concursu de Cuentos pola Oficialidá del Asturianu”.

A les 20’30 hores va celebrase una actuación de monologuismu, col testu “La matazuga”, a cargu del monologuista Carlos Alba.

El sábadu 4 xunetu nel prau de la fiesta, a partir de les 11’00 hores, VII Feria d’Artesanía y Mercáu de Productos Agroalimentarios. A les doce, pasacais de los grupos folklóricos Los Yerbatos (Bimenes), Oter de Fumos (Valladolid) y Os Pauliteiros (Miranda del Douro) hasta la Casona de los Careaga.

A les 12’30 hores, va echar el pregón Roberto González-Quevedo González, y a les 13 hores, va facese misa n’asturianu, oficiada por José Manuel García de Jesús y cantada por El Corriellu la Pandorga nel prau de la fiesta.

A les 13’30 hores va facese la Puya’l ramu, na que collabora la Sociedá de Feries y Fiestes “Nuestra Señora del Rosario” de Santuyano.

A les 13’45 hores van actuar los grupos folklóricos Los Yerbatos (Bimenes), Oter de Fumos (Valladolid) y Os Pauliteiros (Miranda del Douro) y a les 14’45 hores va celebrase una xinta popular con bollu preñáu, empanada, casadiella y arroz con lleche.

Na tarde d’esta xornada de pieslle va tener llugar un taller de manualidaes pa neños, a cargu de l’Asociación Sociocultural Afayaivos y a les 18’30 hores, la final del X Concursu de Gaiteros y Gaiteres Mozos.

La nueche va cuntar cola actuación de Los Gatos del Fornu, Los Ciquitrinos y DJ – J15.

  Categories:
Loading Facebook Comments ...