Rises nel Martes de Antroxu d’Avilés con “¡Eh Tamos Xuníos!”

Rises nel Martes de Antroxu d’Avilés con “¡Eh Tamos Xuníos!”
16 febreru 13:34 2021 Imprimir

Rises nel Martes de Antroxu con “¡Eh Tamos Xuníos!”, una parodia del asaltu al Capitoliu de Washington que podrá siguise a les 19 hores na Canal de Youtube del Conceyu d’Avilés y les redes sociales municipales. Favila, Toño Caamaño y Carmen Peláez escenifican la llegada del home bisonte” al Congresu estadounidense y un hipotéticu alcuentru con un Trump proclamáu Rei del Goxu y de la Faba d’Avilés.

¿Donald Trump nuevu Rei del Goxu y de la Faba? Nel Antroxu d’Avilés tou puede pasar, inclusive la llegada del ex presidente d’Estaos Xuníos a la ciudá como un retiru doráu tres un hipotéticu, o non, alcuentru col estrambóticu “home bisonte” mientres l’asaltu al Capitoliu de Washington., en ¡Eh Tamos Xuníos!

Asina ye la parodia que prepararon 3 de los más reconocíos y reconocibles animadores del antroxu avilesín, Favila, Toño Caamaño y Carmen Pelaez, pa la tarde d’unu de los díes grandes, el Martes de Antroxu, 16 de febreru. Y pa cumplir con toles garantíes sanitaries de protección frente a la pandemia tan solo podrá siguise al traviés de la Canal de Youtube del Conceyu y les redes sociales municipales, a les 19.00 hores.

Trump xuega al minigolf nel Despachu Oval de la Casa Blanca, suañando cola so xubilación en La Florida mientres esfruta na televisión cola irrupción de les sos acólitos al Congresu estadounidense. Nel momentu que apaez en pantalla l’individuu afatiáu col cascu de cuernos, recibe una llamada que va camudar la so vida pa siempres: nomar nuevu Rei del Goxu y de la Faba.

La diversión, les risaes, tán aseguraes nuna desternillante escena col sabor de los meyores momentos d’un Antroxu nesta edición atípica, en casa protexíos ante’l COVID-19, a la espera de tornar con tola fuerza na próxima, nel 2022.

  Categories: