Ricky Martin, J Balvin y Anitta tamién van actuar nos Latin Grammy

Ricky Martin, J Balvin y Anitta tamién van actuar nos Latin Grammy
11 08:55 2020 Imprimir

Ricky Martin, J Balvin, Anitta y Juanes son dalgunos de los artistes que tamién van participar na próxima edición de los Latin Grammy, según la tercera y última llista d’actuaciones sopelexada esti llunes pola Academia Llatina de la Grabación.

Nesti llistáu final apaecen coles mesmes otros músicos como Rauw Alejandro, Camilo, Leslie Grace, Lupita Infante, Ivy Queen, Natalia Jiménez, Mariachi Sol De México de José Hernández, Jesús Navarro, José Luis Perales, Prince Royce, Carla Morrison y Carlos Rivera.

Toos estos artistes xunense a los que yá fueren anunciaos primeramente: Anuel AA, Marc Anthony, Bad Bunny, Calibre 50, Pedro Capó, Julio Reyes Copello, Alex Cuba, Alejandro Fernández, Karol G, Kany García, Guaynaa, Los Tigres del Norte, Víctor Manuelle, Ricardo Montaner, Christian Nodal, Debi Nova, Fito Páez, Nathy Peluso, Raquel Sofía y Sebastián Yatra.

La 21 edición de los Latin Grammy va celebrase’l 19 de payares con una gala especial dende distintes partes del mundu por cuenta de la pandemia del coronavirus. Sol lema “la música humanízanos”, esta edición de los Latin Grammy va conectar con ciudaes de too el mundu pa contactar colos premiaos y retresmitir les actuaciones musicales.

Por casu, Alejandro Fernández, Christian Nodal y Calibre 50 van actuar dende Guadalaxara (México); Fito Páez y Nathy Peluso van facer dende Bonos Aires; José Luis Perales va presentar dende Madrid; Bad Bunny va participar dende San Juan; y Anitta va cantar dende Ríu de Janeiro (Brasil).

L’Academia tamién detalla que va haber dellos tributos especiales a lleendes de la música llatina. Asina, Natalia Jiménez y Carlos Rivera van homenaxar a Julio Iglesias, ente que Lupita Infante y Mariachi Sol De México de José Hernández van recordar a Pedro Infante.

Pela so parte, Leslie Grace y Prince Royce van dase la mano ra rindir tributu a Juan Luis Guerra; Juanes va ocupar d’un homenaxe a Roberto Carlos; y Rauw Alejandro, Ivy Queen, Víctor Manuelle, Ricardo Montaner y Jesús Navarro van xunir fuerces pa eponderar el legáu d’Héctor Lavoe.

El colombianu J Balvin parte como favoritu a los Latin Grammy gracies a les sos trelce nominaciones. Sígue-y el puertorriqueñu Bad Bunny con nueve mentes. Ozuna, con ocho; Anuel AA, con siete; Camilo y Carlos Vives, con seis cada unu; Kany García, con cinco; y Rosalía, Karol G y Residente, con cuatro per cabeza, completen el llistáu d’artistes con más opciones pa llevase’l gramófonu doráu.

Tres el discutiniu amenáu nos últimos años pola so poca escasa participación, el reguetón ocupa anguaño lo más alto de les nominaciones a los Latin Grammy, que van inaugurar trés nueves categoríes: meyor interpretación de reguetón, meyor cantar de rap/hip-hop, y meyor cantar pop/rock.

  Categories: