Ricardo Luis González Ordóñez gana’l premiu micro-rellatos de L’Horru del Carbayedo

Ricardo Luis González Ordóñez ganaba’l premiu micro-rellatos de L’Horru del Carbayedo esti día, depués de que asina lo decidiere’l xuráu del premiu, mentantu que Luisa Méndez Fernández, de Avilés quedábase col segundu los premios. Tolos rellatos, premiaos y no premiaos, presentaránse al públicu n’una esposición al aire llibre nel parque’l Carbayedo (Fiestes de San Roque, del 21 al 24 d’Agostu).

L’actu  d’entrega premios, xunto cola lletura de los cuentos premiaos, fairáse’l llunes, 24 (“llunes d’asturianía”), n’el Salón de la A. VV. El Hórreo (C/Dr. Marañón, 16, baxu, Avilés), a les 18:00 hores, (xusto anantes d’entamar la obra “Paraísu fiscal”, que representa, nel mesmu llugar, el grupu de teatru asturianu “Santa Bárbara”).

Aconceyáu el xuráu del IX Concursu de micro-rellatos n’asturianu “L’Horru del Carbayedo” (al marxen dafechu de l’Asociación de Vecinos El Hórreo, entidá que lu entama),  y formáu por  D.  Miguel Solís Santos (biólogu, dibuxante, escritor y miembru de L’Academia de la Llingua Asturiana), Dª María Xosé Rodríguez López  (esperta en llingua asturiana y responsable del Serviciu de Normalización del Conceyu de Xixón) y D. Hugo Cortina Fanjul (filólogu, especialista en llingua asturiana y responsable del Serviciu de Normalización del Conceyu de Samartín), actuando como secretaria con voz, pero ensin votu Dª Montserrat Machicado Compañy (filóloga, especialista en llingua asturiana y responsable de la Estaya de la Llingua d’Avilés),  alcordó axudicar los premios, dándo-y a la obra “Perspeutives” (presentada col nomatu “El Richi”) el primer premiu dotáu con 400 euros, y el segundu, dotáu con 200 euros a “Coses de la tensión” (presentáu col nomatu “Abelardo”).

Namás recibir l’acta, la A. VV El Hórreo (entidá organizadora) despeslló les pliques, resultando ser los autores Ricardo Luis González Ordóñez, de Xixón (primer premiu) y Luisa Méndez Fernández, de Avilés (2º premiu).