Portada Lliteratura Ricardo Candás asoleya’l poemariu “Nos díes pensatibles”

Ricardo Candás asoleya’l poemariu “Nos díes pensatibles”

by asturnet

L’Academia de la Llingua Asturiana asoleyó’l poemariu últimu de Ricardo Candás, “Nos díes pensatibles” dientro de la so colección «Llibrería Académica», na que fai’l númberu 46.

Esta obra, ganadora del «Concursu de Creación Lliteraria Llorienzu Novo Mier» nel añu 2010, ye un poemariu que sigue’l bagaxe atronador d’un mundu que mos supera, al traviés d’una poesía reflexiva, pensatible, sobre la mirada nubla del amor y de la tierra. Siempre Influenciáu pol llinguaxe metafóricu, el poeta percuerre un camín enllenu de ilancos y desencantu nel que convién, dacuando, parar pa echar tenrura sobre lo andao. La so pesonalísima visión pretende reconstruir un pasáu naufragáu al traviés del llinguaxe señardosu y asosegáu.

Ricardo Candás (Xixón, 1977) ye llicenciáu en Filosofía pola Universidá d’Uviéu. Escritor billingüe, algamó’l premiu de poesía «Fernán-Coronas» del añu 2005 con “Quiciás seya payares”. Como narrador asoleyó’l llibru de rellatos “Les últimes pallabres” y tien ganaos dellos premios, amás d’asoleyar davezu en revistes como Formientu o Lletres Asturianes, ente otres.

Tamién te podria gustar