Reteyaores S.L. gana’l Pegollu de los Premios Andrés Solar 2016 y el madreñazau va pa Gabino de Lorenzo

Reteyaores S.L. gana’l Pegollu de los Premios Andrés Solar 2016 y el madreñazau va pa Gabino de Lorenzo
07 avientu 15:30 2016 Imprimir

La empresa Reteyaores S.L. vieno acabante de ganar el Pegollu de los Premios Andrés Solar 2016, mentantu qu’El Madreñazu va pa la Delegación de Gobiernu, na persona de Gabino de Lorenzo, por toles midíes tomaes esti añu escontra l’asturianu, sigún acaba de facer anuncia la Xunta pola defensa de la Llingua.

Nun comunicáu asoleyáu esta mañana, la Xunta pola Defensa la Llingua Asturiana vieno acabante de dar anuncia de los ganadores de los Premios Andrés Solar na so XXXII edición. Nesta ocasión el Pegollu foi pa la empresa Reteyaores S.L. y el Madreñazu foi pa la Delegación de Gobiernu na persona de Gabino de Lorenzo.

Los Premios Andrés Solar algamen nesti 2016 la XXXII edición. Nos sos trenta y dos años de trayectoria, los premios tienen una vertiente doble: per un llau, la Xunta premia a una entidá o persona que rescamplara pol so llabor en defensa o promoción del asturianu: esti reconocimientu materialízase nel Pegollu. Pero los Premios Andrés Solar tienen tamién una versión negativa, que reconoz a la persona o entidá que rescamplara pol so llabor negativu pa cola llingua asturiana. Esti dudosu honor represéntase con un “Madreñazu”.

 El Pegollu d’esti añu 2016 quier reconocer el llabor fundamental de Reteyaores S.L., empresa del sector de la construcción que vien llevando alantre’l so llabor con especial procuru nel tratamientu y usu del asturianu en tolos soportes comerciales y sociales que manexa.

El “Madreñazu” a la Delegación del Gobiernu, na persona de Gabino de Lorenzo, poles sos acciones y midíes rancies, discriminatories y contra derechu que toma valiéndose d’instituciones, cargos y perres públiques. Por too esto, la Xunta pola Defensa de la Llingua Asturiana considéralos bonos merecedores del antipremiu.

La entrega de los Premios va facese’l vienres día 16 d’avientu a les 19:30 hores nel Antiguu Institutu Xovellanos de Xixón. L’actu va contar cola actuación musical de L – R (Leticia González & Rubén Bada). Tamién, como tolos años, depués del actu va haber una espicha. Esti añu va ser nel chigre xixonés La Xuanina (Cai Caveda, 7), y la entrada val 21 euros. Pa dir, hai qu’acutar sitiu, y pa eso pue llamase al 985229553 o mandar un corréu a info@exunta.org .

  Article "tagged" as:
  Categories:
Loading Facebook Comments ...