Rematen les visites a la Rula d’Avilés con una medría del 8% de visitantes

Les visites a la Rula qu’impulsó la Mancomunidá Comarca Avilés demientres esti branu remataron el 29 d’agostu con gran acoyida per parte del públicu y una medría del 8% respecto de 2016. Pal desenvolvimientu d’esta iniciativa la Mancomunidá cuntó cola estrecha collaboración de la sociedá Nueva Rula d’Avilés, unu de que los sos técnicos foi l’encargáu d’emponer les visites los martes y vienres de cada selmana.

Les visites empuestes a la Rula qu’impulsó la Mancomunidá Comarca Avilés demientres esti branu remataron el 29 d’agostu con gran acoyida per parte del públicu.  Con esta iniciativa preténdese, al igual qu’apurrir una esperiencia distinta al turista y al visitante, proyectar tamién la importancia de la Ría d’Avilés y el mundu de la pesca tan íntimamente xuníu a ella, como unos de los recursos turísticos más singulares ya importantes colos que cunta la contorna, amás d’esquizar toles posibilidaes que tien de proyección turística y la so capacidá pa xenerar productos turísticos singulares.

El programa de visites a la Rula púnxose en marcha’l pasáu 16 de xunu y dende la so puesta en funcionamientu’l cupu de persones per visita taba yá cubiertu pa munches de les visites del programa. Mientres estos dos últimos meses y mediu, 870 persones (8 % superior al añu 2016) esfrutaron d’una singular iniciativa, nes 21 visites cursaes. La procedencia d’estes persones foi la siguiente:

• Comarcales 367: 42,18 %
• Rexonales 190: 21,83 %
• Nacionales 281: 32,30 %
• Internacionales 32: 3,67 %
• Total persones 870
• Total visites 21

Les visites, con una duración averada d’hora y media, incluyíen un paséu poles instalaciones pa conocer el procesu de tránsitu del pexe dende la so llegada a puertu hasta la so salida pal consumu y ver como se realiza en vivu la puya del pexe; tuvieron calter gratuitu y desenvolviéronse los martes y vienres.

Como datos específicos de los visitantes, cabo destacar que la mayoría del públicu rexonal provenía d’Uviéu y Xixón, y el públicu nacional provenía, por númberu de visitantes, de Madrid (111), siguíu per Castiella-Llión, Cataluña, Castiella-La Mancha, Andalucía, Aragón, Comunidad Valenciana, Cantabria y País Vascu y en menor midida d’otres Comunidaes Autónomes. De los visitantes internacionales, la procedencia mayoritaria foi de Francia, Alemaña y Reinu Uníu, y en menor midida d’otros países europeos ya iberoamericanos.

Dende la puesta en marcha d’esta iniciativa de promoción nel añu 2010, una bargana de 6.400 persones percorrieron les instalaciones de la Rula d’Avilés y contemplaron en vivu la puya del pexe, que ye l’aspeutu de les visites que más concita l’atención de los usuarios d’esti serviciu.

A la vista de los datos anteriores, la Mancomunidá Comarca Avilés y la sociedá Nueva Rula d’Avilés SA, tienen cuenta de cara al próximu añu 2018 repitir esta esperiencia, siguiendo cola promoción d’unu de los  nuesos productos gastronómicos más importantes, el Pexe de la Rula d’Avilés, pal que la Mancomunidá punxo en marcha un distintivu d’enfotu del que yá esfruten pescaderíes y restoranes de la contorna.