Remata con ésitu’l Programa d’Intercambiu de Llibros de Testu de Xixón

27 setiembre 07:43 2011 Imprimir

El pasáu vienres, 23 de setiembre, remató la 2ª Fase del Programa d’Intercambiu de Llibros de Testu de Xixón, que dio empiezu’l pasáu 4 de xunetu. El próximu 3 d’ochobre va dar empiezu una 3ª Fase que se va enllargar mientres tol mes p’atender la matrícula viva (estudiantes que s’incorporen tarde a los centros educativos), na que l’horariu d’atención al públicu va ser los martes, de 5 a 7, y los vienres de 10 a 12.

Anque’l Programa nun va terminar por tantu hasta’l 31 d’ochobre y los datos nun son definitivos, al zarru de la 2ª Fase rescamplaba una importante medría tanta nel númberu de families estudiantes que participó, como nel númberu de llibros recoyíos y apurríos al respective de 2010, pasando de 2.389 participantes en 2010 a 2.896 en 2011. Amás, recoyéronse cuasi 4.000 llibros más en 2011 qu’en 2010, dándose darréu 5.053, frente a los 3.765 daos l’añu pasáu.

Esto 5.053 llibros apurríos hasta agora supunxeron un aforru total a les families estudiantes participantes de 161.696 euros (calculando un preciu mediu por llibru de 32 euros). Amás, los 12.252 llibros recoyíos evitaron que 12,12 tonelaes de papel, equivalentes a 162 árboles, acabaren na basura.

Tocantes a les families y les y los estudiantes, un 16,8% vienen de centros privaos o priváu-alcordaos, y un 83,3% de centros públicos, porcentaxes bien asemeyaos a los de la pasada edición (16% y 84%, respectivamente). La procedencia en función del llugar de residencia sí varió anguaño, amontándose les families y estudiantes procedentes de conceyos distintos a Xixón: Avilés, Carreño, Uviéu, Corvera, Castrillón, Nava, Mieres, Villaviciosa, Ayer, Siero, Llanera, Noreña, Llanes, Cabrales, Llangréu y Gozón, lo mesmo que de Lleón.

  Categories:
Loading Facebook Comments ...