Portada Comunicación Reciella entrega en Xixón los sos reconocimientos “Escuela afayadiza”

Reciella entrega en Xixón los sos reconocimientos “Escuela afayadiza”

by redacción asturnews

L’asociación Reciella va entregar en Xixón los sos reconocimientos “Escuela afayadiza” colos que quier reconocer col so distintivu a les escueles con un altu númberu de matriculación na asignatura d’Asturianu. Esti cursu los reconocimientos entréguense a les escueles de Primaria del conceyu de Xixón y el C.P. Santa Olaya, va ser la primer escuela con “Reconocimientu d’oru”.

Coincidiendo col final del cursu, l’asociación Reciella (families pol asturianu) presenta les sos insinies “Escuela Afayadiza”, unes pegadielles que les escueles d’Educación Primaria van tener oportunidá de poner na entrada los centros, renovándoles cursu tres cursu.

Los reconocimientos, qu’esti añu namás van poder ponese en marcha nel conceyu de Xixón, onde cuntamos colos datos de matriculación na asignatura de Llingua Asturiana, van ser de tres tipos: “Reconocimientu d’oru”, pa la escuela del conceyu con un mayor porcentaxe de matriculación; “Reconocimientu de plata”, pa les que tienen una matrícula igual o superior al 75%; y “Mención especial”, en reconocimientu a dalguna escuela que por dellos factores trescendentes, tenga de ser destacada nel cursu.

Dende l’asociación quieren treslladar asina que “nesti momentu, que tanto se valoren los sellos de calidá, hai un númberu importante de families como nós, pa les que l’apueste decidíu de la escuela pol plurillingüismu ye importante a la hora de matricular a los rapacinos. Por esa razón paeznos importante visibilizar el compromisu de la comunidá educativa d’estes escueles, pues nun se nos escapa que, anque la matriculación na asignatura, al ser voluntaria, depende de la decisión de les families, los claustros, equipos directivos y el bon llabor docente tienen muncho que dicir na visibilización, promoción, información y comunicación a les families de les ventayes y la importancia que tien pa los escolinos l’asignatura d’Asturianu, cumpliendo asina amás la llei vixente; tanto l’Estatutu d’Autonomía como la Llei d’Usu falen espresamente de que se promoverá dende les instituciones la enseñanza del asturianu, respetando la voluntariedá”.

C.P. Santa Olaya, primer escuela con “Reconocimientu d’oru”

Nesta ocasión el reconocimientu d’oru va dir pal colexu públicu Santa Olaya, asitiáu nel barriu d’El Natahoyo. Trátase d’una escuela con un porcentaxe de matrícula que ta a piques de llegar al 100%, concretamente del 93%, lo que l’asitia arriba del podium.

Tocante a los reconocimientos de plata, van dir pal C.P. Honesto Batalón, C.P. Montiana, C.P. Antonio Machado y C.P. Xove; toos ellos con una matriculación superior al 75% d’alcuerdu colos datos facilitaos pola Conseyería d’Educación.

Pa cabu la “Mención Especial” ye pal centru concertáu Patronato San José, qu’anguaño cuenta con un 75% de matrícula. Pese a que por porcentaxe correspondería-y el Reconocimientu de plata, paeznos que ye trescendente qu’un centru concertáu tenga una matrícula tan alta, yá que los más de centros d’esti tipu algamen unos datos mui probes.

Asina dende Reciella animen al restu de centros concertaos a que sigan l’exemplu del Patronato y caminen hacia un modelu trilingüe, dando-y al Asturianu la importancia que-y correspuende pa la formación integral de los escolinos n’Asturies y les ventayes cognitives que supón l’adquisición de les llingües n’edaes tempranes.

Cursos siguientes

Dende l’asociación esperen que seya posible acceder a los datos del restu los conceyos, lo que diba permitir estender los reconocimientos. Asina mesmo valoraremos ellaborar insignies asemeyaes con otres etapes educatives: Educación Infantil, Secundaria y Bachilleratu, onde la implantación de l’asignatura ye, entá más ruina.

Tamién te podria gustar