Reciella entrega a 86 escueles el reconocimientu d’Escuela Afayadiza

L’asociación Reciella quier reconocer cola so insinia les escueles con un altu númberu de matriculación na asignatura d’Asturianu y esti añu amplíaba esta iniciativa, qu’entamó l’añu pasáu nel conceyu de Xixón, a les escueles de toa Asturies, algamándolu 86 d’elles.

Coincidiendo col final del cursu, l’asociación Reciella (families pol asturianu) entrega les sos insinies “Escuela Afayadiza”, unes pegatines que les escueles d’Educación Primaria tienen oportunidá de poner na entrada los centros, renovándoles cursu tres cursu.

Los reconocimientos entamaron l’añu pasáu nel conceyu de Xixón, y esti cursu 2017-2018 Reciella amplíalos a los centros de toa Asturies nos que s’imparte l’asignatura de Llingua Asturiana, y son de tres tipos: “Reconocimientu d’oru”, pa la escuela o escueles con un mayor porcentaxe de matriculación; “Reconocimientu de plata”, pa les que tienen una matrícula igual o superior al 75%; y “Mención especial”, en reconocimientu a dalguna escuela que por dellos factores trescendentes, tenga de ser destacada nel cursu.

Dende l’asociación quieren treslladar asina que nesti momentu, que tanto se valoren los sellos de calidá, “hai un númberu importante de families como nós, pa les que l’apueste decidíu de la escuela pol plurillingüismu ye importante a la hora de matricular a los rapacinos. Por esa razón paeznos importante visibilizar el compromisu de la comunidá educativa d’estes escueles, pues nun se nos escapa que, anque la matriculación na asignatura, al ser voluntaria, depende de la decisión de les families, los claustros, equipos directivos y el bon llabor docente tienen muncho que dicir na visibilización, promoción, información y comunicación a les families de les ventayes y la importancia que tien pa los escolinos l’asignatura d’Asturianu, cumpliendo asina amás la llei vixente; tanto l’Estatutu d’Autonomía como la Llei d’Usu falen espresamente de que se promoverá dende les instituciones la enseñanza del asturianu, respetando la voluntariedá de les families”.

El “Reconocimientu d’oru” ye compartíu ente 27 escueles que tienen un 100% de matriculación na asignatura d’asturianu y que tán asitiaes en tola xeografía asturiana. El “Reconocimientu de plata”, que reconoz a les escueles con una matriculación superior al 75% de matriculación va entregase esti cursu a 57 escueles asturianes. Pa cabu la “Mención Especial” apúrrese-yos a los 6 centros pilotu qu’entamaron esti añu cola enseñanza del asturianu como llingua vehicular, -una iniciativa perimportante y que dende Reciella pensamos que marca un camín pel qu’hai que trabayar- y a les escueles concertaes que tienen una matriculación alta. Nesti sen, apúrreseyos tanto a los que perpasen el 75% y tienen polo tanto tamién el reconocimiento de plata, como a dos centros d’Uviéu y Xixón, Sagrada Familia y Patronato San José, que tienen les cifres más altes de matriculación n’asturianu ente los centros concetaos nos sos conceyos.

Dende Reciella animen al restu de centros concertaos a que sigan l’exemplu de los 6 centros qu’esti añu lleven la Mención Especial y caminen hacia un modelu trilingüe, dando-y al Asturianu la importancia que-y correspuende pa la formación integral de los escolinos n’Asturies y les ventayes cognitives que supón l’adquisición de les llingües n’edaes tempranes.