Portada Cine Ramón Lluis Bande estrena’l so documental sobre El Paisano nel Festival de Cine de Xixón

Ramón Lluis Bande estrena’l so documental sobre El Paisano nel Festival de Cine de Xixón

by asturnet

El ciclu Llendes del Festival de Cine de Xixón va acoyer la estrena del nuevu llargometraxe de Ramón Lluis Bande: “El Paisano: retratu colectivu”, un dibuxu del hestóricu dirixente comunista asturianu Horacio Fernández Inguanzo fechu colos trazos de la so alcordanza en catorce testimonios directos d’otres tantes persones que lu conocieron.

El realizador xixonés desplica el doble retu que plantea la película que va estrenase nel Festival de Xixón: “per un llau tratábase de siguir afondando na memoria colectiva d’Asturies al través de l’alcordanza dexada en delles persones por una figura esencial de la llucha comunista nel nuestru país y per otru nel propiu llinguaxe documental como una nueva vuelta de tuerca d’una deconstrución”. Asitiada como parte de la serie hestórica entamada con “Estratexa”, sobre la guerrilla asturiana y en “De Lafuente”, sobre la revolucionaria Aida De Lafuente, la película sobre Horacio El Paisano quier “dir dibuxando’l rostru colectivu de la memoria d’un país”, en palabres del so autor y failo al través del testimoniu directu de catorce persones que falen de los sos recuerdos personales del lluchador comunista asturianu: “quise dexar namás los testimonios ensin tentar xerarquizar los que puedan ser más importantes de los meramente anecdóticos y qu’al través d’eses alcordances se dibuxare la figura d’Horacio”.

El realizador xixonés trabaya anguaño nun nuevu proyectu sobre la memoria colectiva asturiana, un documental sobre la cantadora de tonada Diamantina Rodríguez, nel que van participar intérpretes contemporánees como Anabel Santiago y la propia Diamantina.

Talo sucediera nos sos anteriores filmes sobre la memoria hestórica d’Asturies tamién nesti casu hai una canción que complementa’l documental. El tema que Víctor Manuel dedicó a Horacio apaez na parte final de la película cola única imaxe del dirixente comunista saludando al cantante nun actu públicu. El cantante mierense cedió de baldre’l cantar pal llargometraxe y participó na producción del tema: “tien raigaños na música popular del país como’l tema de Manta Ray n’Estratexa y el romance d’Aide en De La Fuente, nesti casu una canción con autor pero que forma tamién ya parte de la memoria colectiva”.

El realizador xixonés trabaya anguaño nun nuevu proyectu sobre la memoria colectiva asturiana, un documental sobre la cantadora de tonada Diamantina Rodríguez, nel que van participar intérpretes contemporánees como Anabel Santiago y la propia Diamantina.

La estrena de “El Paisanu: retratu colectivu” va facese dientro’l ciclu Llendes del Festival de Cine de Xixón el domingu 27 de payares a les 17.00 hores.

Tamién te podria gustar