Portada Música Rafa Lorenzo, Vriende, la BG el Trasno y Silvia Quesada son los finaliestes del VIII Premiu al Meyor Cantar

Rafa Lorenzo, Vriende, la BG el Trasno y Silvia Quesada son los finaliestes del VIII Premiu al Meyor Cantar

by asturnet

El Teatru de Llaboral Ciudá de la Cultura (Xixón) va acoyer el vienres 14 de marzu a les 19.30 hores la Gala d’entrega del VIII «Premiu al Meyor Cantar» en llingua asturiana o gallego-asturianu. Nel trescursu d’esti actu, y depués de l’actuación en directu de los cuatro finalistes, un xuráu formáu por espertos en música y llingua asturiana va escoyer el cantar ganador de la presente edición del premiu, al qu’opten 4 finalistes Rafa Lorenzo, Vriende, la BG el Trasno y Silvia Quesada.

Opten al gallardon:

RAFA LORENZO, con Ente mazanos (lletra: Rafa Lorenzo)

Compositor de más de cuatrocientos cantares en castellán y asturianu, el cantautor Rafa Lorenzo Antón empecipió bien aína la so carrera musical. Tres de fundar el grupu Jekes cuando yera entá estudiante de Bachilleratu nel so Tinéu natal, en 1975 entama la so carrera como cantautor, percorriendo cola so voz y la so guitarra numberosos locales y sales d’Asturies, Llión, Galicia, Madrid… Tien publicaos siete trabayos discográficos, que fueron apaeciendo ente 1997 y 2013 de la mano de distintos sellos: «La otra Asturies» (FonoAstur, 1997); «A camín» (FonoAstur, 2011); «Sou vaqueiru» (Grabaciones Pola, 2003); «Pabirún, pabirún» (Trabe, 2005); «Primos hermanos» (Editora Discográfica del Principáu, 2007); «Voi pa la braña» (Editora del Principáu, 2010) y «A fierro y fueu», editáu nel 2013 y nel que ta incluyida la composición Ente mazanos, cola que va competir el 14 de marzu na final del Premiu al Meyor Cantar.

VRIENDEN, con Vivu en dalgún llugar (lletra: Xurde Fernández)

El cuartetu integráu por Juan Duarte, Xurde Fernández, Pedro Santiago y Nel Suárez conforma’l grupu Vrienden, una banda naveta formada en setiembre del 2010 y caracterizada por un estilu que los mesmos integrantes del grupu califiquen como folk fusión-alternativu, nel que’l folk celta vese arriquecíu con toa mena d’influyencies (funk, música clásica, rock, punk, música india, etc.).

Grupu llamáu a tener protagonismu na escena musical asturiana de los años vinientes, el so estilu particular, frescu y innovador fíxo-yos acreedores nel 2012 de la X edición del Concursu de música en directu «Abierto Hasta El Amanecer», dirixíu a grupos y solistes menores de 35 años. Van participar na final del «Premiu al Meyor Cantar» col tema Vivo en dalgún llugar, incluyíu nel so primer trabayu discográficu (Tierra Discos, 2013), y col que tamién consiguieron una nominación a los Premios Amas na categoría de «Meyor discu folk».

GRUPU DE GAITES “EL TRASNO”, con Volviche (lletra: Xosé Miguel Suárez)

Nel mes d’avientu del 2013 salió a la lluz Axeitín, el primer discu de la Banda de Gaites “El Trasno”, creada en 1999 na Escuela de Música Tradicional de Cuaña y integrada anguaño por 18 músicos baxo la dirección de Javier Texedor. Axeitín entemez pieces tradicionales asturianes con melodíes nueves compuestes pol mesmu Javier Texedor. Destaca la presencia nel discu de dos pieces cantaes: «La Capitana», del músicu xixonés Carlos Rubiera, n’asturianu; y «Volviche», con lletra en gallego-asturianu y cola qu’esti grupu del occidente asturianu va participar na final del «Premiu al Meyor Cantar».

SILVIA QUESADA, con La pena abierta (lletra: Alfredo González).

La cantante ya instrumentista asturiana Silvia Quesada cunta yá, magar la so mocedá, con una trayectoria musical destacada. Tres de cursar estudios de gaita y flauta trevesera, vinculó la so carrera a formaciones como la Banda de Gaites Cántara, el colectivu Muyeres o los grupos folk Gatos del Fornu y Blima, participando amás como cantante, gaitera o percusionista en trabayos de Celia González (Cantares yá bordones), Tejedor (Positivu) o Alfredo González (Dobleces). Nel 2013 da un pasu más na so carrera cola publicación del so primer discu en solitariu, La pena abierta, nel que s’incluyen diez creaciones de temática sentimental compuestes dende’l prisma de la decepción o la derrota. Silvia Quesada va participar na Gala final del «Premiu al Meyor Cantar» col tema «La pena abierta», visión señardosa del mitu de Penélope y Ulises.

La Gala va empezar a les 19.30 hores y la entrada ye llibre. L’espectáculu va cerrase cola actuación de Taranus, grupu vencedor na edición anterior d’esti premiu.

Tola información d’esta y de les ediciones anteriores del «Premiu al Meyor Cantar» ta disponible nel sitiu web del concursu, nel que s’incluyen noticies, fotografíes, información de los grupos y cantares finalistes. Amás d’ello, un reproductor dexa escuchar los temes que van competir na Gala.

Web del Premiu al Meyor Cantar

Tamién te podria gustar