Rabanal afirma que la marxinación del asturianu nes prebes pa l’Autonómica ye cuestión de la práctica del mercáu y la sociedá

El conseyeru d’Economía Javier Rabanal refugó ayer les crítiques vertíes contra’l presidente del Ente Públicu de Comunicación, José Ramón Pérez Ornia por IX-BA y sofitaes pol conseyeru de Xusticia y Esteriores, Francisco Javier García Valledor. Rabanal pidió-y a Valledor “más prudencia” y defendió la marxinación del asturianu nes prebes de selección del Ente asegurando que se trataba de “la práctica establecida pol mercáu y el funcionamientu de la sociedá”.

El conseyeru d’Economía afirmó tamién que tocante “a cuestiones identitaries caún tien la so propia opinión”, aludiendo a les crítiques llanzaes dende IX-BA énte la convocatoria de les bases pa selección de personal de la radiotelevisión autonómica.

Al empar la conseyera de Cultura y de Comunicación Social, Ana Rosa Migoya, sumóse a los reproches a Valledor, al que-y afeó “que a pesar de les advertencies siga criticando proyectos del gobiernu”. Tocante al conteníu de les crítiques del so compañeru de gobiernu y d’Izquierda Xunida-Bloque, Migoya dixo que tres les crítiques de la coalición d’izquierdes “hai un intentu de mediatizar” un procesu de selección que calificó de rexíu polos criterios de “igualdá, méritu y capacidá”.

Pel so llau l’Asociación de la Prensa d’Uviéu, per voz del so presidente José Antonio Bron, salió en defensa del responsable del Ente autonómicu, José Ramón Pérez Ornia y acusó a IX-BA de que “dalgunos sectores políticos más desuníos qu’uníos fomenten l’intrusismu col únicu oxetivu de “colar” la so cuota política nes redacciones de los medios de comunicación». Ye la segunda vez na que l’asociación colexada presidida por Bron sal en defensa d’Ornia. N’anterior ocasión el motivu foi la reunión privada que’l másimu responable de la radiotelevisión autonómica caltuvo con miembros de l’Asociación de la Prensa d’Uviéu a los qu’informó del procesu de selección de personal pal ente públicu enantes de facelo nel Conseyu d’Administración y nel parlamentu asturianu.