Portada Escéniques Quiroga ultima la recreación musical de la novela ‘José’ con un repartu encabezáu por Txema Blasco

Quiroga ultima la recreación musical de la novela ‘José’ con un repartu encabezáu por Txema Blasco

by asturnet

Un actor de pesu pa da-y vida a la prosa d’Armando Palacio Valdés. L’artista vascu Txema Blasco, conocíu pola so participación en llargumetraxes como ‘Carne de gallina’, ‘Tierra’ y ‘Vacas’, y con amplia esperiencia en teleseries d’éxitu, encabezará’l repartu de la recreación musical de la novela ‘José’, un espectáculu que s’estrenará el 4 de setiembre nel parque de Les Conserveres de Candás baxo dirección de Pablo Quiroga.

N’escena, Blasco tará flanqueáu polos integrantes del grupu teatral Nun Tris, la Coral Polifónica Aires de Candás, el Grupu de Baille Tradicional San Félix, la Peña El Nodo y los efectos de lluz y soníu proporcionaos pola empresa candasina Pirotecnia Morís, nun espectáculu que se representa por segundu añu consecutivu col envís d’atrayer a visitantes al conceyu de Carreño, pero que presenta novedaes respecto a la función de 2003.

Amás de poner n’escena un montaxe dafechu distintu al del añu pasáu -la Mancomunidá’l Cabu Peñes escueye cada añu un proyectu nuevu pal espectáculu-, el públicu allugaráse nesta ocasión nel anfiteatru de Les Conserveres, plaza qu’ocuparán los participantes na obra, y l’elencu tará formáu por venti actores.

L’encargáu de cordinar la recreación escénica de la novela marinera de Palacio Valdés, el realizador Pablo Quiroga, acumula con sólo 25 años d’edá una producción audiovisual qu’algamó varios premios a nivel estatal. Ente los curtiometraxes dirixíos por Quiroga figuren ‘Frío mortal’, ‘Envidia mortal’, ‘Conexión mortal’, ‘El año de los tres ochos’, ‘Ático’, ‘Anunciación’, ‘Migración’ y ‘Doble fondo’.

Web oficial del espectáculu

Tamién te podria gustar