Portada Conceyos Que Nun Apare! va enllenar Samartín de cultura urbano

Que Nun Apare! va enllenar Samartín de cultura urbano

by redacción asturnews

El 14 de xunu en L’Entregu y el 15 nel Parque d’El Florán va cellebrase la tercera edición del festival de Cultura Urbano con 18 actividaes ente les qu’hai deporte, xuegos, talleres y música.

L’asociación xuvenil Que Nun Apare! vuelve con más puxu que nunca y esti añu amplía’l so festival a dos díes de duración. El 14 y 15 de xunu, Samartín va acoyer la tercer edición d’esti eventu qu’axunta un total de dieciocho actividaes bien variaes rellacionaes col deporte, la cultura hip hop y reggae, les tradiciones asturianes, la música, los xuegos y la educación. Too ello con entrada de baldre y pa tolos públicos.

El vienres 14 la Plazoleta La Ilesia de L’Entregu centra toles actividaes pa esi día. A les 18.30h arranca’l programa col taller “Bombes de Semientes” impartíu por Güerta Escuela La Llera pa llueu dar protagonismu a la música con un pasucais de la Charanga Elite Brass Band (19h), un conciertu del grupu folk Fontoria (21.30h) y la sesión de DJ “Dani Antistailo meets 33900 Vinyl Club” (23h).

Al día siguiente la diversión y la cultura nun van aparar nel Parque d’El Florán. De 12 a 20h hai xuegos hinchables pa neños y neñes, amás d’un mercáu d’asociaciones, comida, artesanía y caxigalines varies, l’amuesa de graffiti y los xuegos y deportes tradicionales con 6 conceyos. La bandina folk de Blimea Cuatrolán va percorrer a la una’l mediudía les cais de Sotrondio y Blimea enantes de dar pasu a la sesión “vermú-culete” cola actuación de les pandereteres feministes Nun Tamos Toes.

Pela tarde arranquen les actividaes más rellacionaes cola cultura urbano más alternativo. La sound system –sistema de soníu de caxes de madera, ambulante y con orixe xamaicanu- del colectivu asturianu Allanái va facer qu’El Florán baille a ritmu de la música reggae a partir de les 16h. Nesti espaciu amás va facese y emitise en directo’l programa de Radio QK (107.3FM) Fat sounds a les 17h y el taller “¿Qué ye’l Live dub mix?” con Rlantz & Ovella Negra (18h). Les actividaes de la tarde complétense col taller d’ellaboración de xabones de llana con Trebeyos (16.30h) y l’amuesa del club La Güestia Roller Derby alrodiu esti deporte de contactu sobre patines orixinariu d’Estaos Uníos y mayoritariamente femenín (17.30h).

Los conciertos van ser de 20h a 00.30h y nellos van actuar el dúu de versiones Los Juanillous, los conxuntos de rap La Ziega y Doris Escarlata y el Dj de música folk-electrónica Fruela 757. El ramu ponlu la sound system, qu’hasta bien entrada la nueche va tar funcionando cuntando coles esbilles de distintos estilos de reggae de los asturianos Allanái Crew, los vascos Airaldeko Crew y el productor gallegu Ovella Negra, too ello cola collaboración d’otros y otres artistes de la escena asturiana y les cantantes Ziztada Mc de Bilbao y Sista Kata d’Irún.

Con esta nueva edición, Que Nun Apare! da continuidá al éxitu d’esti festival que nació en 2017 col oxetivu d’enllenar el vacíu que dexó la non celebración de les tradicionales fiestes de La Llaguna. Una programación cultural y d’ociu diversa; poniendo en valor la interculturalidá, el papel de la muyer y la llingua asturiana; y na que la mocedá seya la protagonista; son les claves d’esti eventu autoxestionáu y ensin ánimu d’arriquecimientu que se celebra por tercer añu gracies al sofitu popular, al comerciu y la hostelería de Samartín, y a toles asociaciones, persones y artistes que participen.

10 con vasos reutillizables personalizaos y una zona d’acampada’l sábadu pa la pernocta de la xente festivalero.

Tamién te podria gustar