Portada Política PSOE y Ciudadanos comprométense a baxar el IVA cultural al 10%

PSOE y Ciudadanos comprométense a baxar el IVA cultural al 10%

by redacción asturnews

PSOE y Ciudadanos comprometiéronse col so pautu a rebaxar el IVA aplicáu al sector de la cultura del 21 al 10% y a reformar la Llei de Propiedá Intelectual (LPI), a impulsar una Llei de Mecenalgu, lluchar contra la piratería, impulsar el llabor del Institutu Cervantes, y a “recuperar el Ministeriu de Cultura”.

Asina consta nel documentu del alcuerdu qu’esti miércoles sellaron el secretariu xeneral del PSOE, Pedro Sánchez, y el líder de Ciudadanos, Albert Rivera, nel marcu de les negociaciones pa un pactu de investidura del líder socialista de cara a un futuru gobiernu. L’alcuerdu plantega algamar un pactu social y políticu pola educación, la ciencia y la cultura como “exes fundamentales y vertebradores” del país pa garantizar la igualdá d’oportunidaes.

D’esta forma, punxéronse d’alcuerdu pa qu’una de les sos primeres midíes de gobiernu sía rebaxar al 10% el IVA cultural, amás d’impulsar la reconocencia d’un IVA cultural nel senu de la UE que dexe la so harmonización, cola reconocencia d’una fiscalidá especial con tramos menores del 10%. Coles mesmes, quieren promover el caltenimientu del IVA del llibru nel 4%, ya impulsar nel senu de la UE la so equiparación pal llibru electrónicu.

De la mesma, aliáronse pa “recuperar el Ministeriu de Cultura” pa da-y un impulsu definitivu” a la cultura, a les artes, a la creación, a les industries culturales y que desenvuelva una política que respuenda a una concepción federal y que promueva la pluralidá cultural y llingüística d’España.

La redacción d’una Llei de Mecenalgu ye otra de les propuestes nesti alcuerdu de gobiernu, onde entamen incluyir un sistema de bonificaciones a la esportación, en llínea coles establecíes nos países de la redolada europea, con cuenta de competir nos mercaos internacionales. Coles mesmes, consideren qu’ente les sos primeres midíes tien de reformase la Llei de Propiedá Intelectual, al envís de faer efectiva la protección de la propiedá intelectual y de los derechos del ceador, compatibilizándola con un mayor accesu posible al patrimoniu cultural.

Igualmente, esti alcuerdu de gobiernu contempla midíes en defensa de los derechos de los creadores y de les industries de conteníos xeneraos na economía dixital. Pa ello, plantegen la puesta en marcha d’una campana educativa nos colexos, cola collaboración d’asociaciones y entidaes de xestión, pa concenciar a los escolares de la necesidá de respetar la propiedá intelectual y d’esplica-yos el valor de les industries culturales.

Amás, apuesten pela vía alministrativa pa lluchar contra la piratería, col compromisu de tramitar los espedientes de denuncia nel plazu máximu establecíu pola llei. Igualmente, alcordaron l’establecimientu d’una fiscalía especializada en delitos contra la Propiedá Intelectual dotada de medios, nel que se van poner en marcha procedimiento “rápidos y eficientes” pa detectar violaciones reincidentes de los derechos de propiedá intelectual.

Finalmente, PSOE y Ciudadanos alcordaron impulsar l’Institutu Cervantes, “ventana al mundu de la llingua y cultura españoles” que, al so xuiciu, “tendría de ser puerta d’entrada del español n’Europa”. “El Cervantes tien de tar al marxe de cualquier cambéu políticu y ganar n’independencia pa operar como una axencia d’espardimientu del español, profesionalizase al máximu, tener autonomía p’afaese a cada país nel que s’estableza y cuntar con mecanismos de xestión evaluables”, señalaron dambes formaciones. Pa ello, comprométense a que tolos países de fala hispana cunten con un centru cultural español, dependiente del Institutu Cervantes. De la mesma, quieren que l’Institutu Cervantes amonte la ufierta de cursos de toles llingües cooficiales d’España y que se promuevan iniciatives llegales pa la reconocencia de la riqueza cultural que representa la pluralidá llingüística d’España.

Tamién te podria gustar