Proyéctase en La Pola la película “La plomada”

15 mayu 10:51 2018 Imprimir

Enmarcada nel ciclu de itinerancies Llaboral Cinemateca Ambulante, proyéctase en La Pola la película “La plomada” nuna proyección que va tener llugar esti martes 15 de mayu, a les 20.00 hores, nel Teatru Auditoriu.

L’interés sobre un estrañu heriedu -una antigua plomada de pesca que perteneció al so güelu inmigrante español- ye lo qu’impulsa al narrador ficticiu d’esti documental a viaxar dende la so casa de Nueva York a les cais de Tampa, Florida. Mientres unos díes, gracies al increíble elencu de tampeños qu’ellí atopa, el narrador va vese somorguiáu nun mundu que ta a puntu de sumir.

Enllazando cola so anterior película, Un legáu de fumu, West Tampa y Ybor City (Florida) siguen apurriendo los escenarios del nuevu filme, espacios que les  colonies d’inmigrantes llamaríen “llar” ente aquelles fábriques tabacaleres que los emplegaben como manu d’obra. La plomada sofitase en relatos, rellumos y alcordances de los sos habitantes d’orixe español (emigrantes asturianos na so mayoría), y nes muertes y esviaciones d’una dómina y xunas xentes que tán yá n’evidente peligru d’estinción.

Va años que’l cineasta asturianu Luis Argeo recueye nel so trabayu les buelgues de la emigración española y asturiana n’Estaos Xuníos. Argeo estrenó en 2006 la so primer película, AsturianUS a la que siguió Corsino, by Cole Kivlin en 2010. Al pie de James D. Fernández lidera’l proyectu archivísticu documental Nin flaires nin conquistaores: Spanish Inmigrants in the US.

  Categories:
Loading Facebook Comments ...