Portada Educación Profesores y padres desixen una nueva política de beques

Profesores y padres desixen una nueva política de beques

by redacción asturnews
Foto: AEMTG (https://www.flickr.com/photos/esmtg/)

La comunidá educativa, profesores, padres y alumnos, quixeron amosar esta selmana que tan fartucos de la política de beques del Gobiernu, por ser una continuación del modelu que José Ignacio Wert diseño en 2012, cuando taba al mandu de la cartera d’Educación.

Nun actu ensin precedentes, la mayoría de los representantes de profesores y padres d’alumnos nel Conseyu Escolar del Estáu negáronse a tomar en considerancia l’informe qu’una ponencia d’esta institución realizara sobro’l borrador de decretu de beques del Gobiernu pal próximu cursu, colo cual el dictame que l’organismu tien d’aprobar va retrasase siquier hasta la próxima selmana, cuando a la comisión permanente llegue un nuevu informe de la ponencia.

Tratase d’un actu simbólicu, ensin consecuencies reales. Anque’l dictame que’l Conseyu Escolar posiblemente va aprobar la selmana próxima reclame cambeos nel decretu y nel actual modelu de beques, l’Executivu nun ta obligáu a fae-y casu, pos esti órganu solo tien calter consultivu y les sos decisiones nun son venceyantes. Pero, como dexaron claro los representantes de STEs, CC OO, UXT, CSIF y Ceapa, les organizaciones que baltaron l’informe, pretendi ser un golpe na mesa pa probar a los ministerios d’Educación y de Ciencia que tán cansaos d’oyer les mesmes promeses de meyores futures que yá-yos fixeron va un añu y qu’esixen cambeos yá.

Sigún desplicó José Luis Belmonte, representante de STEs, quier ser “un toque d’atención y un avisu del malestar”, coincidien do con Carles López, voceru de la organización d’estudiantes Canae, que s’abstuvo na votación, pero que sofita la urxencia de camudar l’actual política de beques. Agora, como añedió Belmonte, queden a la espera de que’l Gobiernu «mueva ficha públicamente» y diga si ta dispuestu a asumir delles de les reclamaciones de padres, alumnos y profesores.

El borrador de decretu de beques que pretende aprobar el Gobiernu ye idénticu al del añu pasáu, que como únicos cambeos sobro años anteriores tuvo un aumentu de 100 euros (hasta los 1.600) de la cuantía fixa que reciben los alumnos con menos recursos económicos y con siquier un 6,5 de nota media, creó un complementu d’ente 50 y 125 euros p’alumnos con más d’un 8 de media, y baxó del 5,5 al 5 la nota mínima por que un alumnu de primeru d’universidá llogre una beca de matrícula.

Sicasí, nin actualizó los estragales de renta familiar que dan derechu a llograr una beca, que siguen a precios de principios de la década, nin terminó como tamién-y esixen toos cola división de les ayudes en cuantía fixa y variable, el modelu qu’inventó Wert pa facilitar los retayos presupuestarios y que, según datos oficiales, amenorgó los becarios, les beques y rebaxáu les cuantíes medies que reciben los alumnos en redol a un 20%.

El modelu previu a Wert tenía una cuantía fixa bien penriba los 1.600 euros actuales, porque englobaba tol dineru que diba recibir l’alumnu como ayuda, sacante la matrícula o del complementu de desplazamientu si ye que-y correspondía. D’esta manera, cualesquier estudiante que cumplía los requisitos de renta sabía esactamente cuánta ayuda diba recibir antes d’empezar el cursu, cantidá qu’amás tenía asegurada anque eso supunxera superar la partida presupuestaria prevista pa beques d’esi añu. Agora, los alumnos con menos recursos cobren los 1.600 euros y una cuantía variable.

El Gobiernu yá prometió va un añu que diba diseñar un nuevu modelu de beques y a aumentar les partíes presupuestaries p’amontar tanto’l númberu de becarios como la cuantía de les beques. Pero nada d’esto asocedió. La razón, remana, ye la so situación d’Executivu en funciones y la prórroga de los presupuestos de 20018, que los torgó aprobar l’aumentu de 536 millones d’euros (un 36%) pa beques que prometieron pal próximu cursu y el siguiente. Agora, prometen la mesma reforma y l’aumentu de recursos, pero yá pal cursu 2020-2021.

Tamién te podria gustar