Portada Educación Presentóse l’Axenda Escolar del Conceyu de Xixón

Presentóse l’Axenda Escolar del Conceyu de Xixón

by asturnet

La Oficina Municipal de la Llingua del Conceyu de Xixón presentó l’Axenda Escolar 2008/2009, que se dedica esti añu a l’astronomía. Nel actu tuvieron presentes el Conceyal de Política Llingüística, D. Jesús Montes Estrada; la Responsable de la Oficina Municipal de la Llingua, Mª Xosé Rodríguez López, y María de los Ángeles García Rodríguez, l’autora de los testos de la mentada axenda.

Ésta ye la sesta axenda escolar que s’edita col oxetivu de promover l’usu y conocimientu de la llingua asturiana ente l’alumnáu de secundaria y bachilleratu, al tiempu que se-yos faciliten a los estudiantes recursos pa una meyor organización y distribución del tiempu escolar. Si les primeres axendes falaben de los díes internacionales, de les llingües del mundu, de la ecoloxía, de Xixón y de lliterarura, esti añu, declaráu Añu Internacional de l’Astronomía, la Oficina decidió tocar esi tema.

Al traviés de les illustraciones de Lupe Sabugo y los testos de Mª Ángeles García Rodríguez, esta axenda recueye los típicos espacios pal horariu escolar, les feches d’exámenes, el profesoráu, los deberes diarios, les actividaes estraescolares, los trabayos de cada asignatura o un xustificante pa les faltes d’asistencia, pero tamién dexa sitiu pa les feches importantes, pa les señes de los compañeros de clas, cola astronomía como exa vertebradora de tola publicación.

L’axenda va repartise ente tol profesoráu d’asturianu del conceyu de Xixón y los casi 700 alumnos y alumnes matriculaos en llingua asturiana en Secundaria y Bachilleratu nos centros escolares del so territoriu.

Tamién te podria gustar