Preséntase’l grupu de música folk astur-arxentín ‘Antroxu’

El grupu ‘Antroxu’, nacíu en l’Arxentina y con raigaños asturianos, mesmo pola condición de descendientes d’emigrantes de parte de los sos miembros como pol gustu pola tierra del restu, aterrizaron na rexón hai díes (llegaron polos pelos a la espicha-alcuentru del conseyeru cola Asturianía Moza Americana) y esta mañana anunciaron un programa de varies actuaciones pa los prósimos díes en varias localidaes del Principáu. La so música busca tender pontes ente l’Asturies de los sos ancestros y la so Arxentina de güei.

El grupu arxentín ‘Antroxu’ ta encantáu per tierres astures. Los seis mozos que formen el grupu alienden asturianía pelos cuatro costaos. De fechu, pesie a nacer toos nel país americanu sientense mui allegaos al Principáu. Alejandro (gaita, flauta y bodrhan) ye l’únicu miembru de Paraná. Los otros cinco componentes: Ruth (gaita, flauta, percusión y voz), Mauro (batería, percusión y guitarra), Fernando (guitarra, tambor tradicional y baxu), Diana (gaita, flauta, trin, percusión y voz) y Víctor (voz, baxu, guitarra, gaita y percusión) nacieron en Rosario

Faen música celta y a ella llegaron pela música tradicional asturiana. Llegaron a la rexón pa participar nel III Congresu Mundial d’Asturianía y allargaron la so estancia pa conocer meyor la tierra que quieren y almiren dende llonxe. Los sos integrantes, que participen activamente nos Centros Asturianos de Rosario y Paraná, aseguren que “queremos estrenchar los llazos ente l’Arxentina y Asturies porque son dos tierres que tienen muncho qu’aportase la una a la otra”.