Presentase en La Pola’l llibru “Dolce santiaguinos que fixeron dómina”

Presentase en La Pola’l llibru “Dolce santiaguinos que fixeron dómina”
22 ochobre 09:58 2019 Imprimir

“Dolce santiaguinos que fixeron dómina”, el llibru escritu por Julio Díaz,  que ye una crónica parcial de Santiago d’Arenas ente los años 1837 y 1906, va presentase esti martes 22 d’ochobre, a les 20 hores, nel Teatru Auditoriu de La Pola Siero.

Tratase d’un conxuntu de semblances de dellos vecinos que vivieron nesta parroquia sierense, na segunda metá del sieglu XIX. A partir de les circunstancies biográfiques y particulares de cada unu d’ellos, l’autor va poniendo de relieve’l desenvolvimientu y l’evolución d’esta pequena comunidá civil asturiana nun momentu clave de la so hestoria: la irrupción de la industria minero y tol conxuntu de tresformamientos acomuñaos que traxo consigo. Dende l’apaición de les pequenes bocamines nel monte del Carbayín, hasta la perforación de los grandes pozos d’estracción como Mosquitera, esta parroquia asturiana resulta un bon referente p’analizar los enormes cambeos que la industria carbonero produció en delles contornes asturianes nos sieglos XIX y XX.

L’autor trata de compaxinar, dientro d’un mesmu contestu descriptivu, aspeutos biográficos y personales d’un grupu de vecinos santiaguinos, cola situación sociu-económica de la dómina en que vivieron. La resultancia ye un llibru nel que se pon de relieve la incidencia del factor humanu nos tresformamientos social y económicu, nesti casu aplicáu a un ámbitu bien particular y específicu. La edición inclúi un índiz onomásticu con barganal de doscientos nomes de vecinos que vivieron na contorna, y que fueron testigos d’una dómina crucial na hestoria d’esta pequena comunidá sierense.

Julio Díaz Díaz (Candín, Santiago de Areñes, 1957) ye doctor en Filoloxía Hispánica; anguaño exerce de profesor nel Centru d’Adultos de Santander (Cantabria). Dedicó delles monografíes al estudiu de la so parroquia d’orixe. Ente otres: Hestoria de la parroquia de Santiago d’Arenas (II Aniversariu) (1996); Electra de Carbayín. Hestoria d’un aniversariu (1923-1998) (1998); Les biblioteques populares de Carbayín (1922-1936) (1999). Anguaño prepara un estudiu sobro’l territoriu medieval y hestóricu de Siero.

  Categories: