Preséntase “Asturllétic” discu últimu de los Músicos pola Oficialidá

05 mayu 08:25 2010 Imprimir

Güei, miércoles 5 de mayu, a les 20:30 hores, en La Casa Posafuelles, va facese la presentación del discu qu’edita la Xunta pola Defensa de la Llingua Asturiana en collaboración col colectivu Músicos pola Oficialidá, y que nesta ocasión esplora la rellación ente la música asturiana y les tendencies lletróniques. Xune Elipe va presentar l’actu y depués Da Robotz va facer una sesión de música folk llectrónicu.

Dende hai cinco años, la Xunta pola Defensa de la Llingua Asturiana, en collaboración con Músicos pola Oficialidá, colectivu formáu por artistes de diferentes estilos musicales, publiquen un cantar que val como banda sonora del movimientu de reivindicación llingüística. De mano, la propuesta venía en forma d’un solu cantar pa dir pasando colos años a presentar el tema acompañáu d’otres canciones, en forma de recopilatoriu.

Dende’l folk, el rock, hip-hop, toles propuestes musicales van formando parte de les creaciones que faen Músicos pola Oficialidá. Nesti añu avérense a los ritmos lletrónicos.

El single d’esti añu, “El Ramu del Día de les Lletres”, lleva delles cuartetes qu’interpretaron na Manifestación del Día de les Lletres Asturianes del 2009 un grupu d’unes 40 pandereteres qu’abrieron el cortexu nesa xornada reivindicativa.

Esti single ta recoyíu nun cedé recopilatoriu, “Asturllétric”, xunto a otros 12 temes más. Estos temes son reellaboraciones de dellos de los grupos más punteros del país que rellacionen la música tradicional asturiana cola música lletrónica, que son estos: Balandrán, Anabel Santiago, Corquiéu, Tutu Studiu, La Col.la Propinde, Herbamora, Xera, La Bandina, Dixebra, Soncai System y Toli Morilla.

  Categories:
Loading Facebook Comments ...