Presentaes les Xornaes de Patrimoniu Industrial de Trubia

Presentaes les Xornaes de Patrimoniu Industrial de Trubia
17 ochobre 14:17 2015 Imprimir

Per primer vegada, Uviéu xúnese a la celebración de les Xornaes Europees de Patrimoniu que, dende hai casi tres décades, celebrarse en más de 50 países coles mires de poner en valor el patrimoniu cultural.

Nesta edición, la tema escoyida ye’l del Patrimoniu Industrial y Técnicu y el conceyal de Cultura, Roberto Sánchez Ramos y el xeógrafu y coordinador de les xornaes, Antonio Güerta Nuño, detallaron esta mañana, en rueda de prensa, los actos que se van desenvolver en Trubia los díes 22, 23 y 24 d’ochobre por cuenta de les Xornaes Europees de Patrimoniu.

El conceyal de Cultura, Roberto Sánchez Ramos, esplicó que la Conseyería de Cultura convidó al Conceyu d’Uviéu’l pasáu mes de xunu a participar nestes Xornaes; una invitación que foi aceptada de momentu “pola importancia de celebrar n’Uviéu lo que’l profesor Germán Ojeda llamó ‘la catedral civil d’Uviéu’, el legáu industrial d’Uviéu”.

Sánchez Ramos indicó que s’escoyó Trubia como see de les mesmes por dos motivos: por ser unu de les pilastres fundamentales de la industrialización d’Asturies y puntu de referencia históricu y cultural de la clase trabayadora” y, como “homenaxe” a los 55 trabayadores despidíos de la Fábrica d’Armes de La Vega y a la so forma de trabayu “en peligru por una multinacional”.

Tres la intervención del edil, Antonio Güerta detalló’l programa de les Xornaes qu’inclúi, ponencies académiques sobre’l patrimoniu industrial del conceyu  al cargu d’arquitectos, xeógrafos ya historiadores, meses d’alderique y la esposición fotográfica ‘Fábrica de Trubia. Pasáu industrial o futuru social. Lluces y solombres d’un presente’, de la fotógrafa Ana Mateo Nieto.

Coles mesmes, nel programa inclúyense visites empuestes a la Fábrica d’Armes de La Vega, la Fábrica d’Armes de Trubia y la Fábrica de Gas  d’Uviéu. Sicasí, Sánchez Ramos indicó que’l Conceyu entá ta esperando que’l Ministeriu de Defensa autorice la visita a La Vega, pero confió en llograr una respuesta afirmativa’l próximu llunes.

 

Loading Facebook Comments ...