Premiáu’l plan de conciliación familiar na escuela del conceyu de Llangréu

Premiáu’l plan de conciliación familiar na escuela del conceyu de Llangréu
06 xunetu 14:28 2018 Imprimir

El proyectu llangreanu ‘La escuela, espacios para la conciliación’ foi reconocíu esta selmana pol Ministeriu de la Presidencia, Relaciones coles Cortes ya Igualdá, como unu de los meyores programes a nivel nacional.

Llangréu lleva años ufiertando programes de conciliación tantu en dómina escolar, como en periodos vacacionales, siempres dientro de les escuela al entender que ye l’espaciu más aparente. Favorecer l’insertamientu llaboral de la muyer ye una de les esmoliciones del equipu de gobiernu y, en concretu, de la conceyalía d’Igualdá que dirixe Blanca Pantiga quien ayeri esplicó que «intentamos facilitar a les muyeres la so vida llaboral y la familiar y que’l restu de la familia implíquese».

María Alonso, técnica d’igualdá en Llangréu, recordó que dientro d’esti macroproyectu del cursu escolar 2017-2018 ta l’espaciu madrugadores’ -apertura de los centros escolares antes del entamu de les clases-, los programes d’atención a los neños en dómina de Navidá, Selmana Santa, branu, según la ufierta de diversos talleres de sensibilización pola conciliación y otres acciones pa promover un cambéu de mentalidá ya implicar a tola familia na conciliación llaboral.

El Conceyu de Llangréu presentose a una convocatoria estatal al pie de otres 58 entidaes locales de toa España. El proyectu de 17 d’elles resultó reconocíu con una subvención del Fondu Social Européu. Nel casu de Llangréu, esta cuantía xubió a 15.000 euros yá que el so programa integral quedó clasificáu en tercer llugar.

  Categories: