Pregón de Miguel Solís Santos lleíu esti domingu nes Fiestes d’El Bollo d’Avilés

04 abril 10:34 2010 Imprimir

Sra Alcaldesa d’Avilés,

Xana, Xanina y Dames d’honor,

Autoridaes del Conceyu,

Avilesines, Avilesinos,

Amigos y Collacios toos.

La verdaera patria ye la infancia. Nel desván del nuestru pensamientu atópense los recuerdos más emotivos de la neñez. Ehí tán, cubiertes de sagraes povises, les imaxes de Les Navidaes, la nueche de Reis, el primer llibru de llectura o’l golor tienru y evocador de la mañana de Pascua, mezclienda del salitre que trai’l vientu, d’arumes de primavera nuvatina y de bollos pascuales recién salíos del fornu.

Un añu más, y con ésti son yá 117, saludamos a les Fiestes d’El Bollo, y un añu más, tornamos a la patria más íntima, la que tenemos preñada d’escenes de señardá, la nuestra infancia. Un añu más, como viaxeros infrayables del tiempu, aportamos pa gociar de la siempre afayadiza Primavera. Y con ella, la Pascua; la Lluna llena equinoccial; el nordés xeláu d’abril y el tímidu rebiltar de la Natura tempranera.

Asina, como manden los cánones del ciclu de la vida. Asina, tornando a la infancia, a la nuestra patria primera.

* * *

La Fiesta’l Bollo tien rexistru de nacencia y non sólo eso, el so partu vieno venceyáu a una declaración de principios. Como popularmente se diz, truxo un pan embaxo’l brazu, un espíritu que trescendió perende acullá lo cenciellamente folixero… Esi espíritu ye la reconciliación, la fraternidá y la concordia.

Permítanme que faigamos alcordanza al mirar les fotos marielles pol tiempu y viaxemos al Avilés indianu, al Avilés de finales del sieglu XIX. Una de les edaes más apasionantes y apasionaes peles que pasó’l nuestru milenariu pueblu. Daquélla, los capitales astur-cubanos cruciaben l’océanu en viaxe de vuelta pa da-y a la Villa un calter nuevu y destorgala de les llagañes d’un abegosu suañu d’atrasu secular. Foi la postrera década del XIX cuando vieno la lluz llétrica, el teléfonu, se proyeutaron los enanches urbanísticos, s’industrializó la ciudá, s’abrió al tráficu marín la dársena de San Xuan y llegó’l tren, que, como vena vital, truxo enerxía xoven cola qu’entrar na modernidá a ritmu de llocomotora.

Pero paradóxicamente, foi’l ferrocarril, el pregoneru de los nuevos tiempos, la mazana la discordia qu’allevantó una postiella qu’amosaba’l pueblu d’Avilés nos sos adientros.

Naquélla dómina, Avilés atopábase dixebráu en dos bandos: el lliberal, abiertu al progresu, y el conservador, más enraigonáu en vieyos plantegamientos. La tensión ideolóxica alquirió forma desproporcionada nun debate bizantinu, nun alderique aparentemente irrelevante, que yera ónde asitiar la nueva estación ferroviaria. Los lliberales -capitaneaos pol marqués de Teberga, trunfador políticu del momentu- escoyeron el final del barriu Sabugo, en Cantos –onde s’atopa güei-, los conservadores, na cai La Industria, el tarrén qu’anguaño ocupa la estación de FEVE, agües enriba de la ponte San Sebastián.

El debate acabó en conmoción pueblerina, naide nun quería dar el brazu a torcer nes sos tesis. Asina, industriales y cantistes, que yera como llamaben a los dos bandos, entamaron cavar dos trincheres ensin fondu nun Avilés que malpenes trespasiaba los diez mil habitantes.

La mitá de la villa vivía d’espaldes a la otra y con éstes entró n’escena un médicu municipal, nacíu en Castripol, el pueblu, que na llende del Eo, foi capital de l’Asturies rebelde cuando la francesada. Esti galenu, don Claudio Luanco, ensin resabios llocalistes, apautóse’l Miércoles Santu de 1893 con otros filántropos del momentu, y toos xuntos, oficiaron de parteros al traer al mundiu una xenial idega cola que zarrar les antigües ferides que nun cicatrizaben col tiempu: La idega foi facer una fiesta de fraternidá y folixa que reconciliara a tolos avilesinos. Acababa de nacer la Fiesta’l Bollo.

El domingu Pascua de 1893, un volador mañaneru fizo los honores a esi gran proyeutu de xermandá. Un pregón d’Antonio María Valdés, una carroza y malpenes una trentena músicos foron los humildosos anicios de la nuestra fiesta.

Tamién el bollu escarcháu tomó partíu, como maraviosa disculpa, pal acercamientu ente los vecinos de la villa. Les agües bautismales punxéronles les ñubes, pues esi día abriéronse los cielos pa dexar cayer un bastiazu diluvial percima los nuestros güelos. El vientu cafiante y reciu rubricó l’acta de nacimientu.

El Bollo taba servíu.

* * *

L’espritu d’esta fiesta, que ye n’esencia la fraternidá y l’entendimientu de los avilesinos, ha ser el leit-motiv que nun hemos escaecer, que nun hemos perder de vista añu tres añu, como una reafirmación, como un filu conductor que, pasando de xeneración en xeneración, confirme’l nuestru avilesinismu.

Y… ¿qué ye l’avilesinismu? Ye sintise miembru d’un organismu vital nomáu Avilés, ye sumase con bon rixu al progresu del conceyu, ye querer la so Hestoria, costumes y vezos, ye ser conscientes de formar parte integral d’un ecosistema, que funciona sigún el nuestru compás biolóxicu… Asina lo espresaron hai cuasi milenta años los qu’entós redautaron el Fueru, la nuestra más grande carta d’identidá coleutiva, el nuestru manifiestu de constitucionalidá como villa llibre frente al poder arbitrariu de los señores de forca y cuchiellu y sancionáu pol Rei más d’un sieglu enantes que la Carta Magna inglesa.

Avilés -aquel Abillés como entós se llamaba-, yera un oasis de llibertá metanes el paisaxe feudal, yera una islla de homes llibres mirando al Cantábricu.

Gracies a esti xestu, a esta conxunción de preeminencies, Abillés llegó ser un territoriu d’iguales favoratible al esporpolle comercial. Darréu, la villa convirtióse nún de los puertos de mayor sonadía dende Portugal a Francia, o como entós se dicía, de Bayona a Bayona.

A lo llargo de la Edá Media, munchos foron los que recalaron n’Abillés, atrayíos polos privilexos que lu adornaben. Sigún nos cuenta la Hestoria, por mediu de la Diplomática, los foriatos o estranxeros que deseaben avecindase nos nuestros llares, amás de xustificar la so residencia na villa amurallada, teníen qu’algamar la Carta de Vecindá, cartafueyu qu’una vegada alquiríu por ser bon poblador, daba tolos drechos del Fueru al nuevu vecín. Asina, amás de con asturianos llegaos de los montes, los valles y la mariña, Abillés abrióse a francos, gascones, xudíos, gallegos, vascos, castellanos y más xentes que nel crisol del tiempu enriquecieron el solar y dieron llugar a lo que nós anguaño somos.

Acabantes d’avecindase, tres algamar el privilexu de la Carta, el nuevu avilesín daba una convidada a los sos vecinos. D’esta manera, con esti ritu iniciáticu, arroblaba’l pautu d’amistá. Hermanábense toos al rodiu d’una mesa enllena d’un bon xintar y regada con un vinu de confraternidá. De la Llingua Griega viennos la pallabra ágape, que significa llacuada, xinta o comida de xermandá. Ye mui significativo, la raíz d’esi términu tien el mesmu aniciu que la pallabra amor.

Podría diseñase una simetría ñidia ente la convidada medieval al avecindase na Villa y la popular Comida na Cai del Llunes de Pascua d’anguaño.

Hai un claru paralelismu ente elles. En dambes la finalidá ye idéntica, esaltar l’espíritu de fraternidá al pertenecer a una mesma colectividá, a una xera conxunta. En dambes l’escenariu ye bien paecíu, una mesa horizontal, igualitaria y fraternal, escenariu d’un xintar, d’un ágape que n’esencia ye un actu d’amistá, d’amor y xermandá. La Comida na Cai nun ye más qu’un capítulu non escritu del Fueru, la firma folixera, con un tresfondu de reafirmación popular d’avilesinismu militante.

* * *

Otru de los ingredientes fundamentales y fundacionales de la nuestra fiesta de Primavera ye la Música. Ye imposible camentar cómo sedría’l Bollo ensin los pasucais, les muñeires, los xiringüelos y ensin los acordes de la nuestra música tradicional enllenando l’almósfera xaranera de la Pascua.

La primer fiesta d’El Bollo, la de 1893, pesiar la bastiada d’agua que moyó los festexos d’aquella xornada, nun foi a torgar que la banda municipal diera un conciertu de tres hores nos arcos de la Plaza les Aceñes. Too un flechazu que daba pasu al noviazgu de la Fiesta cola Música.

Dicir Música ye facer una feliz sinonimia col ser avilesín.

Cinxéndonos a la Hestoria, relataba Solís de Merás, el cronista de Pedro Menéndez, que na campaña de La Florida escontra los hugonotes, los pocos contrincantes prisioneros que llibraben de la espada del Adelantráu yeren los músicos. L’amnistía llevábenla implícita nes sos flautes, nes trompetes, nes xiblates y nos violinos. Quiciabes un puntu de sensibilidá de don Pedro pa colos sos enemigos.

El binomiu Música-Avilés tien dos nomes que resplanden con lluz propia.

Ún d’ellos ye conocíu por toos, Julián Orbón, fíu de Benjamín, musicólogu de prestixu. Julián bien ceu dexó’l so pueblu pa dir cola so familia a Cuba, a L’Habana, la ciudá que bien merez el nome de segundu Avilés. La capital caribeña onde se forxó’l drama de la Modernidá avilesina, el ñeru de los capitales indianos que revirtieron na primer industrialización seria de la nuestra villa. Ellí, al otru llau del océanu, perende acullá de la llinia l’horizonte, el xoven Orbón punxo en pentagrama les idegues que de siempre cantáben-y al oyíu del so maxín d’artista. La so música orquestal, les sos composiciones de cámara valiéron-y un puestu ente los grandes de la música clásica iberoamericana.

El segundu músicu con nome propiu ye un sabugueru, hasta agora poco conocíu. Ramón Fernando de Garay, nacíu en barriu marineru hai cuasi 250 años, un cuartu mileniu. Vieno al mundiu esautamente’l día que’n Saltzburgu el prodixosu Mozart apagaba les velines del so quintu cumpleaños. Toa una premonición.

Afirma’l el musicólogu y direutor, José Luis Temes, que Garay, ensin duldes ye’l padre del sinfonismu español. Esti añu, tovimos la suerte d’oyer a Garay n’Avilés, na Selmana de Música Relixosa. La orquesta Julián Orbón interpretó la so 10ª Sinfonía, d’aire inequívocamente haydinianu. Amás l’estrenu cellebróse na ilesia nueva de Sabugo, qu’ocupa’l mesmu llugar nel que sieglos atrás s’allevantara’l Conventu la Mercé, onde’l padre de Garay taba emplegáu como organista polos flaires mercedarios, a cambiu de comida y vestíu.

Con estos dos puntales, Orbón y Garay, bien merez el nuestru pueblu tar asociáu a les corchees y a les claves de sol, “in aeterno”.

Faláremos enantes de la vinculación d’Avilés a Cuba. Ellí remansara Orbón, y d’ellí tornaren los emigrantes avilesinos tresformiaos n’americanos, n’indianos, cantando los aires cadenciosos, murnios y enllenos de señardá de la Cuba perdida, tarareando les habaneres de los atapeceres equinocciales mudaes en tonos buxos d’apasionáu dramatismu.

En fin, les habaneres de la tan llonxana y cercana Cuba, la música recuperada de los nuestros clásicos, los vibrantes ritmos rockeros, los célticos floreaos de les gaites y l’atávica tonada astur tienen un singular puntu d’alcuentru n’El Bollo nun sincretismu mui nuestru, con sellu d’inconfundible asturianismu.

Faciendo’l contrapuntu musical a estos sones pascuales, esti añu habremos añadir una ritmu más: la samba brasileira, materializada en xeniales llinies arquiteutóniques de fierru y cementu que se reflexen nes agües de la ría: El Cientru Niemeyer, fíu del arte d’un xoven arquiteutu de cien años d’edá.

Otra vez, la vocación tresoceánica d’Avilés surde pelos poros del so vieyu pelleyu. Too un luxu: al llau de la nuestra casa allevántase‘l Niemeyer, un trozu de Brasilia, la capital que suañó don Óscar y surdió delantre los nuestros güeyos en 1956, d’igual edá qu’Ensidesa y, que por una casualidá hestórica, toma’l relevu nel mesmu solar onde una xeneración d’avilesinos escribieron una de les páxines más significatives de la cronoloxía llocal, convirtiendo la Villa del Fueru na Capital del Aceru.

Cientru Niemeyer, arguyosu y gayasperu, cola so figura hemisférica y blanca, avilesín singular que ta acabantes d’avecindase a la solombra’l vieyu Fueru, embaxador del país del Amazones na nuestra ría…

La ría, l’exe del antiguu alfoz de Gozón, columna vertebral de la nuestra Hestoria dictada nel agua por Rui Pérez, Pedro Menéndez, Martín de las Alas, los mareantes sabugueros, los emigrantes a Cuba…. y tamién arteria onde muerren los nuestros ríos, pequeños, de curtia xeografía, pero cargaos de lleendes y mitos, como’l Tuluergo, árbitru que marcó secularmente la frontera ente dos mundios sociales bien estremaos, La Villa y el pueblu de Sabugo. De xuro que’l Tuluergo, como tolos regatos y fontes astures, tien les sos dioses proteutores, les sos xanes filando cadexos d’oru les nueches de Lluna llena.

Como nun podría ser d’otru xeitu n’Asturies, el país del agua, dos d’elles, Xana y Xanina, presiden la Fiesta, dándo-y cara xoven, como xestu de feliz sinécdoque. Elles, más que naide, representen güei lo avilesino. Son el símbolu de la Villa. Nelles espeyámonos toos, pues son les garantes y la garantía de la Fiesta. Saludando dende la so carroza real supervisarán la folixa xeneral, pa que siga la tradición, pa que seya una realidá un añu más.

L’otru símbolu ye’l Bollo, el nome propiu col que bautizó don Claudio Luanco esta conmemoración primaveral. Formalmente llama l’atención el so diseñu. Ye tetraméricu, tien muncho de rosa los vientos; ye sinuosu, con cabos y golfos –como un mapa d’islla con tesoru-, plásticamente perfeutu, tien silueta armoniosa y nació con vocación d’iconu

ensin sabelo; pero percima de too esto, tien el noble oficiu de servir de pan común de fraternidá ente los avilesinos de paz, que -tornando a la patria de la nuestra infancia- güei somos toos nesti milenariu pueblu.

¡Qu’entame la Folixa!

¡Puxa Avilés!

¡Puxa la Fiesta d’El Bollo!

Entrevista a Miguel Solís Santos n’Asturnews

  Categories:
Loading Facebook Comments ...