PP, PSOE y C’s torguen otra vuelta l’usu del asturianu na Xunta Xeneral

PP, PSOE y C’s torguen otra vuelta l’usu del asturianu na Xunta Xeneral
15 febreru 21:05 2016 Imprimir

Si daquién tenía dalguna duda, la xunta de portavoces resolviérala esti llunes 15 cuando’l PSOE y Ciudadanos xuníense al PP pa torgar otra vuelta usar l’asturianu na Xunta Xeneral, nesti casu pa convocar una comisión pa falar del idioma, amosando que namái la oficialidá pue igual el problema  y que la llei d’usu ye papel moyao.

Nun fizo falta más que sentir al PP con dir a los tribunales pa que Fernando Lastra, en nome del PSOE, camudara les sos pallabres y la so opinión de la selmana pasada pa torgar el pasu al asturianu: de nun paece-y mal que s’emplegara l’asturianu nes convocartories de la “Comisión non permanente d’estudiu sobre’l réxime de protección y promoción del asturianu” a camentar que como la llingua nun se contempla nel reglamentu de la Xunta nun se puen “buscar subterfugios” pa favorecer lo que nun s’alcuentra regulao. En principiu, la Llei d’Usu obligaría a que se regule, pero paez que ta meyor ensin regular, pa poer emplegar esa disculpa siempre que-y pruya al PSOE o al PP.

Los demás partíos políticos, inclusu Ciudadanos que de mano nun s’amosara partidariu, quedaben ablucaos pola torga sistemática de PP y PSOE, puesto que la propuesta yera namái pa facer la convocatoria de los aconceyamientos de la Comisión nuna versión billingüe. Pero Ciudadanos camudó como’l PSOE d’opinión y votó en contra.

Nicanor García, de Ciudadanos dixo que nel marcu d’esta Comisión nun s’oponíen al usu del asturianu, pero voto en contra. Concha Masa, d’Izquierda Xunida, llamentaba esta “torga dafechu” al emplegu de la llingua asturiana na xera de la Comisión que va estudiar el réxime de protección y promoción del asturianu, amosando que mal entamamos si la llingua de la que se va falar promover y protexer nun se pue emplegar. Y Daniel Ripa, de Podemos, tamién foi claru al proponer “meyorar el reglamento” si fai falta pa usar l’asturianu y al criticar a Mercedes Fernández del PP por usar l’asturianu pa polemizar y evitar falar de corrupción.

La historia entamó cuando Concepción Masa, diputada d’IX facía una propuesta na Xunta Xeneral hai una selmana, de manera informal na Xunta de Voceros, pa que les convocatories de la Comisión non permanente d’estudiu sobre’l réxime de protección y promoción del asturianu y les sos distintes alternatives fueren billingües en castellán y asturianu. Y en sin venir a cuentu atopose cola oposición de la vocera del Partíu Popular, Mercedes Fernández que negó esta posibilidá del usu de la llingua y asina lo manifestó a los periodistes nes sos declaraciones. D’esta manera, a xuiciu d’IX el PP reniega de la mesma llei qu’aprobó l’únicu Gobiernu que presidió’l PP n’Asturies, la Llei d’Usu y Promoción del Asturianu, vixente dende 1998.

Concha Masa, la diputada d’IX que preside esta comisión, propunxo que les convocatories pudieren mandase n’asturianu y castellán, cuidando que la primera d’elles fuera convocada solo en castellán y fízolo porque n’Izquierda Xunida “nun esperábamos qu’hubiera nenguna reacción en contra per parte del restu de los grupos, porque esiste una llei aprobada yá va munchos años”.

Loading Facebook Comments ...