Porcía, la decana de les nueches celtes asturianes, celebra esti sábadu una nueva edición

21 agostu 23:42 2006 Imprimir

La Banda de Gaites El Trasno, el Grupu de Baille El Cabazo, Cádava, Llan de Cubel, Breabach y Skama la Rede van ser los grupos qu’esti sábadu, día 26 d’agostu, a partir de les once la nueche animen na alameda d’El Franco la tradicional Noite Celta de Porcía, decana de les nueches dedicaes al folk n’Asturies.

Nel añu 1983 los vecinos del pueblu d’El Franco garraron la iniciativa y decidieron organizar una romería en recuerdu de la festividá d”El domingín de los Remedios’, que llevaba ensin celebrar dende primeros de los años 60. D’esta manera nacía la Noite Celta de Porcía, na mesma Alameda na que se festeyaba nel sieglu XVII, cola intención d’axuntar les nuestres músiques tradicionales y folclóriques con otres que foren asomeyaes a la tradición folk asturiana.

D’entós p’acá, esti tipu de festivales proliferaron y esapaecieron sobreviviendo dalgunos d’ellos y consolidándose como ye’l casu d’esta Noite Celta d’El Franco, pela que tienen pasao abondos grupos, como La Bandina, Brenga Astur, Os Castros, Tamalin, Citriquinos, Skitarna, Corquieu, Llume de Mar, Gatos del Fornu, Cigua, Xareu Folk, N’Arba, Cambaral, Oijboudjep, Guxán de Lluz, Felpeyu y Tud er Mor, ente otros.

Nesta nueva edición de la Noite Celta de Porcía, pela tradicional Alameda van desfilar, a partir de les once la nueche, la Banda de Gaites El Trasno, el Grupu de Baille El Cabazo, Cádava, Llan de Cubel, Breabach y Skama la Rede.

  Categories:
Loading Facebook Comments ...