Ponga va cuntar con una escuela de 0 a 3 años nel próximu cursu

by redacción asturnews | marzo 11, 2019 11:19 am

Ponga sumaráse’l próximu cursu a los conceyos de la cuenca oriental con escueles de 0 a 3 de cumplise les previsiones del Conceyu y de l’alcaldesa Marta Alonso que vieno acabante adelantrar qu’anguaño tán trabayando al pie de la Conseyería d’Educación pa crear el nuevu centru, al que tienen d’atopar un allugamientu. 

La busca ta agora «en trámite», cola capital de San Xuan de Beleñu como escenariu y «delles opciones» sobro la mesa. «Nun supondría una gran obra», indica la rexidora sobro los enclaves baraxaos, qu’enagora opta por nun detallar.

El primer pasu de la futura escuela pasa precisamente por estenar la incógnita del allugamientu, pa de siguío resolver les cuestiones burocrátiques. Magar la creación del centru nun ta contemplada específicamente nos presupuestos autonómicos, el conseyeru Genaro Alonso señalaba’l mes pasáu nuna visita a Infiesto qu’esiste «un creitu ampliable p’aquellos conceyos que demanden ampliación d’unidaes o apertura d’estes escueles». D’esta miente, el Consistoriu confía en roblar un conveniu con Educación y dar en continuación a determinar les unidaes necesaries en función de la demanda y contratar al personal acorde. «Ye un serviciu más pal conceyu y amás daríense puestos de trabayu», destaca Alonso, que sostien que’l plazu col que trabayen ye’l de poner en marcha la escuela de 0 a 3 nel cursu 2019/2020.

La estensión de la ufierta educativa dexaría asina que los neños ponguetos estudiaren nel conceyu dende los cero a los dolce años, lo que supondría pa la primer conceyala una ferramienta «bien importante» na llucha contra la despoblación. «Ye una midida más p’afitar residentes, si tenemos esa escuela puede ayudar a que venga más xente», afirma. Alonso indica amás que col nuevu centru un conceyu d’apenes seiscientos habitantes como’l ponguetu «tendría cubiertos los servicios», al disponer tamién de consultoriu médicu, residencia de mayores, farmacia y un aula del Colexu Rural Arrexuntáu (CRA) Picos d’Europa.

La escuela de 0 a 3 de Ponga nun ye la única prevista nel Oriente, pos tamién Parres trabaya anguaño en buscar allugamientu a la suya. Enagora, el llugar refugáu ye l’actual cortil escolar onde s’atopen el IES El Sueve y el colexu Río Sella al nun tar dexaes nueves construcciones por ser zona inundable. Nel so casu, la creación del centro sí ta incluyida nes cuentes rexonales.

Otru de los centros pindios ye’l de Colombres, a la espera d’una adecuación» del espaciu, según señaló’l conseyeru a finales de febreru. Pela so parte, la escuela de 0 a 3 de Infiesto abre mañana les sos puertes, lo que la convierte na primera creada dende 2012 n’Asturies.

Source URL: http://asturnews.com/ponga-va-cuntar-con-una-escuela-de-0-a-3-anos-nel-proximu-cursu/