Podemos reclama un Reglamentu pala Llei d’usu y el II Plan de Normalización

Podemos reclama un Reglamentu pala Llei d’usu y el II Plan de Normalización
06 ochobre 21:06 2015 Imprimir

Podemos Asturies reclama un Reglamentu que faiga cumplir la Llei d’usu y promoción del asturianu, al tiempu que pide un estudiu sociollingüísticu y un nuevu Plan de Normalización Social.

Podemos Asturies presentó col arranque del mes d’ochobre una proposición non de llei pa que la Xunta Xeneral del Principáu encamiente al Conseyu de Gobiernu del Principáu a que, “oyíes les organizaciones y axentes sociales más representativos del ámbitu llingüísticu asturiano, presente un proyectu de Reglamentu pa desenvolver y facer cumplir la Llei del Principáu d’Asturies 1/98, de 23 de marzu, d’usu y promoción del asturianu.

Coles mesmes, reclama la realización inmediata d’un estudiu sociolingüísticu qu’apurra les claves de les actitúes, creencies, mires y vitalidá de la llingua asturiana ente la población. En opinion de Podemos, esto va dexar “detectar les posibilidaes y les reticencies esistentes nesti ámbitu partiendo d’unes bases bien establecíes”.

El grupu parlamentariu de Podemos reclama tamién qu’una vegada concluyíu dichu estudiu y tres un analís del mesmu, ellabórese ya implante con calter urxente’l II Plan pa la Normalización Social del Asturianu, tres del primeru que foi lleváu a cabu ente los años 2005-2007.

No que se refier al ámbitu de los conceyos, Podemos reclama na so proposición non de llei que darréu de la mesma s’encamiente “a toles corporaciones municipales d’Asturies a cumplir y facer cumplir, nel exerciciu de la so competencia, con dicha Llei”.

Finalmente, Podemos pide tamién na so proposición que se modifiquen los currículos del primer y segundu ciclu d’educación infantil, el Decretu 85/2008, de 3 de setiembre, pol que s’establez el currículu del Segundu ciclu d’Educación Infantil y el Decretu 113/2014, de 3 d’avientu, pol que se regula la ordenación de los conteníos educativos del primer ciclu d’educación infantil, col propósitu de “recoyer la realidá sociollingüística del Principáu d’Asturies y regular la enseñanza de la llingua asturiana y el gallego-asturianu en dicha etapa educativa”.

La proposición non de llei presentada, puede descargase en castellán na páxina web de la Xunta Xeneral del Principáu.

Loading Facebook Comments ...