Podemos convoca places nes que valora l’asturianu, pero ‘sólo’ en dellos puestos

Podemos convoca places nes que valora l’asturianu, pero ‘sólo’ en dellos puestos
26 agostu 10:20 2015 Imprimir

Cumpliendo pa col so códigu éticu, Podemos Asturies convoca un procesu de seleición de personal eventual nel que valora la “capacitación qu’acredite solvencia comunicativa oral y escrita en llingua asturiana pero namái que pa los puestos de Prensa y Dinamización Parlamentaria.

Los criterios de valoración llamen l’atención al respective d’esta cuestión, ya que puestos de tanta importancia como los d’asesoramientu xurídicu o económicu nun contemplen valorar el conocimientu de la llingua asturiana y sí otros idiomes, lo que nun casa col enfotu por poner en valir la llingua y la cultura asturianes na actividá política en toles estayes.

Pa tolos puestos desíxese capacidá d’analís, actitú proactiva, habilidaes organizatives y capacidá de trabayu n’equipu, pero depués, cada una tien habilidaes y capacitaciones que se valoren lóxicamente de manera estremada. Poro, destaca que la llingua asturiana nun se contemple como valorable namái que pa dos de los puestos, como si nun fora un conocimientu de valir nel planu económicu, xurídicu, ect..

Como se desplica na so web, basándose no establecío nel so códigu éticu, PODEMOS ASTURIES abre un procesu públicu de seleición pa la contratación de personal eventual pal so Grupu Parllamentariu, abiertu a toles persones que s’identifiquen políticamente col so proyeutu. Pa diches contrataciones Podemos Asturies va aplicar con igual considerancia criterios d’enfotu y de méritu-capacidá. Demientres tol procesu de seleición favoreceráse la igualdá de xéneru.

Les persones interesaes en participar nesti procesu de seleición tendrán d’aceutar los mesmos compromisos éticos que s’esixen a los cargos electos de PODEMOS ASTURIES y que se detallen nel so Códigu éticu .

L’espardimientu de la ufierta d’emplegu va dende’l 19 d’agostu al 2 de setiembre, dambos inclusive, períodu demientres el que les persones interesaes van poder unviar la so candidatura, y tres del cual va dase entamu a un procesu de seleición que va constar de tres fases:

1. Evaluación de los curriculum vitae y preseleición en base a los requisitos establecíos (3 – 7 de setiembre)

2. Entrevista presencial o telemática coles persones preseleicionaes en base a competencies téuniques y personales (8 – 18 de setiembre)

3. Entrevista personal a quienes superaren les fases anteriores (14 – 25 de setiembre)

El procesu de seleición va ser conducíu por una Comisión d’Evaluación compuesta por 2 persones del Conseyu Ciudadanu Autonómicu, 2 persones del Grupu Parllamentariu y 1 persona esterna. La decisión final sobre les persones que finalmente s’integrarán nel cuerpu téunicu del Grupu Parllamentariu correspuende al Conseyu Ciudadanu Autonómicu a propuesta de la Comisión d’Evaluación.

Información importante pa los solicitantes:
La relación llaboral va tar suxeta al Códigu Normativu de Personal y de Réxime Internu de la Xunta Xeneral del Principáu d’Asturies no que se refier a personal eventual, y la duración del contratu, a xornada completa, va tar venceyada a les necesidaes del Grupu Parllamentariu y al prestu del criteriu de confianza.

Les persones que finalmente sían contrataes como personal eventual tendrán d’afacese a les mesmes llimitaciones aceutaes poles diputaes y diputaos del Grupu Parllamentariu (sía que non, máximu de 3 Salarios Mínimos Interprofesionales, salvo aplicación d’un factor de correición).

Les persones que sían escoyíes pa cada unu de los puestos a cubrir tendrán de presentar los documentos acreditativos de los méritos reflexaos nel so curriculum vitae enantes de dar na formalización de la so contratación.

Les persones interesaes en solicitar una de les vacantes ufiertaes o en formar parte del bancu de talentos de PODEMOS ASTURIES tendrán de rellenar el siguiente FORMULARIU de CANDIDATURAente’l 19 d’agostu y el 2 de setiembre , especificando’l puestu al qu’opten y axuntando’l so curriculum vitae y en formatu pdf (ye necesariu agospialo en http://www.filedropper.com/ o en servicios comoDrive, Wetransfer… y copiar l’enllaz nel formulariu). Toles candidatures recibíes van ser respondíes per corréu ellectrónicu.

Pa cualquier consulta o dulda sobre esti procesu de seleición ye posible dirixise atalentos.podemosasturies@gmail.com.

Loading Facebook Comments ...