Podemos Asturies apuesta pola oficialidá col mesmu tratu que les demás del Estáu

Podemos Asturies apuesta pola oficialidá col mesmu tratu que les demás del Estáu
06 mayu 15:26 2016 Imprimir

Podemos Asturies apuesta pola oficialidá d’una llingua de toes y toos, col mesmu tratu que les demás del Estáu”. Con esti slogan, el partíu asturianu perafitaba esti vienres el so compromisu cola oficialidá de la llingua asturiana nel marzu del Día de les Lletres, nun comunicáu nelq ue tamién piden que nos medios de comunicación de titularidá pública s’emitan programes de conteníos diferentes y empobinaos a tolos públicos. y garantizar la enseñanza en toles etapes educatives.

Un añu más, llegase na opinión de Podemos al Día de les Lletres Asturianes “con una llingua en situación llegal anómala, con respecto a les demás llingües que conviven nel Estáu español. La llingua asturiana y el gallego-asturiano nunca foron motivu de conflictu ni de problema nengún ente la xente asturiano, más que nada porque simplemente foi y ye ferramienta de comunicación pa munches asturianes y asturianos y, más nada. Hai quien tuvo y tien tentaciones d’usar l’idioma como arma política pa echar contra otros grupos que nun piensen como ellos”. Pero la realidá ye otra pa Podemos Asturies: “les llingües son patrimoniu cultural de toos y toes y una ferramienta de comunicación de quien llibremente faiga usu d’ella”.

En Podemos Asturies consideren que la politización n’escesu de les últimes décades torgó la posibilidá d’un ampliu consensu social y políticu qu’amplíe los derechos sociales y que garantizare la vitalidá y el futuru de la llingua. Pa francer estes dinámiques negatives pa col idioma, consideramos fundamental desenvolver delles midíes que se recueyen na Carta Europea de les Llingües Minoritaries o Rexonales, y que foi aprobada y refrendada por gobiernos españoles tanto del PP como del PSOE.

Les midíes de consensu que pueden aprobase dende yá, col sofitu de la mayor parte de los partíos con representación na Xunta Xeneral y respaldaes pola inmensa mayoría de la sociedá asturiana pueden ser les siguientes:

-Ante una situación de desigualdá, los falantes d’asturiano y del gallego-asturiano han tener los mesmos derechos llingüísticos que los falantes d’otres llingües del Estáu.

-Que nos medios de comunicación de titularidá pública s’emitan programes de conteníos diferentes y empobinaos a tolos públicos.

-Garantizar la enseñanza del asturiano y el gallego-asturiano en toles etapes educatives, asina como poner en marcha iniciatives na qu’estes sían llingüa vehicular pa los escolinos que voluntariamente lo soliciten.

-Que les alministraciones locales y autonómica faigan un usu públicu normalizáu xunto col castellano.

-Aprobar los reglamentos necesarios pa un total desenvolvimientu de la Llei 1/98 del Principáu d’Asturies, del 23 de marzu, d’Usu y promoción del Bable/Asturiano.

-L’aprobación de la toponimia tradicional nos conceyos onde tovía nun se tenga aprobao, asina como les denominaciones billingües de los nomes de conceyu.

Por toes estes cuestiones, “Podemos Asturies quier manifestar que la supervivencia del asturiano y el gallego-asturiano nun ye una cuestión política que respuenda a ser d’iaquierdes o de dereches, sinón que tien que ver cola necesidá y obligación, de los asturianos y asturianes, de mantener el so patrimoniu cultural, penriba de cualesquier ideoloxía política. Nesi sentíu, dende Podemos Asturies convidamos al restu de formaciones polítiques a apostar y trabayar por asegurar el futuru de les nuestres llingües, ensin mirar a la esquierda o la derecha, sinón mirando de frente pa construyir un futuru onde la sociedá asturiana tenga los mesmos derechos que’l restu de la ciudadanía del Estáu”.

Loading Facebook Comments ...