Pixar defende la diversidá de xéneru nes oficines nel so nuevu curtiu

Dende esti llunes podrá vese un curtiu de Pixar tamién por YouTube. L’estudiu d’animación quier esperimentar con nueves plataformes y llanzar nelles micropelículas d’animación. La primer incursión foi con Purl, un curtiumetraxe que defende la diversidá de xéneru nes oficines.

El protagonista ye un duviellu de llana, qu’entra a trabayar n’una oficina apinada d’homes. Eso nun-y resulta un problema, o siquier asina-y lo fai ver el so calter optimista. El problema llega cuando los sos compañeros de trabayu deciden ignoralu por non ser unu d’ellos, llegándo inclusive a face-y bullying. P’ameyorar la situación, va tratar d’afaese al tóxicu ambiente, anque para ello camude la so forma de ser.

El vídeu tan solo dura ocho minutos, pero son abondos para faer cavilgar al espectador sobro unes cuestiones, presentes inda güei en delles empreses. Una denuncia que se víen obligaes a faer Kristen Lester y Gillian Libbert-Dunca, directora y productora del proyectu. “Ta basáu nes nueses esperiencies propies. Nel mio primer trabayu nel mundu de l’animación yo yera la única muyer na sala, asina que, pa siguir trabayando no que me gustaba, convertíme n’unu d’ellos”, asegura Lester detrás de cámara.

En visualizándolu, fueron munchos los curiosos que se preguntaron si esta yera l’ambiente que s’alendaba na compañía. Ello ye que trátase del primer curtiu desque’l so fundador, John Lasseter, abandonara’l so puestu de xefe creativu na empresa. Unos fechos qu’asocedieron en xunu, dempués de reconocer como verdaderes les acusaciones de les sos trabayadores por comportamientos desaparentes escontra elles.

La cinta tuvo bien bona aceptación nes redes, llegando a atropar 612.000 reproducciones nes sos primeres 48 hores. Dica agora, ta n’inglés, anque tou aquel que lo deseye, puede poner dende la mesma plataforma los subtítulos en castellán.