Pinchos con muncho cuentu y con realidá aumentada: una esposición del alumnáu de llingua asturiana d’Ayande

04 xunu 02:49 2015 Imprimir

L’área d’hostelería n’educación especial del Colexu Públicu d’Educación Básica “La Puela Ayande”, en collaboración cola biblioteca del centru y l’asignatura de Llingua Asturiana vienen acabantes d’entamar una innovadora esposición en realidá aumentada titulada “Pinchos con muncho cuentu/Pinchos con muitu cuentu (RA)”.

El proyectu lleváu alantre polos alumnos d’educación especial na asignatura d’hostelería, consistió nun trabayu socesivu de: documentación sobre relatos de la lliteratura universal en llingua asturiana, el diseñu de productos gastronómicos temáticos asociaos a dalgún aspeutu de les obres documentadas, la preparación de la receta, la ellaboración del productu termináu y la so inclusión na ufierta diaria de la cafetería del centru.

Como remate a tol trabayu, documentase tol procesu en realidá aumentada (RA) al traviés de paneles que s’esponen nel espaciu d’acoyida del centru.

La realidá aumentada (RA) ye’l términu que s’usa pa definir una visión per mediu d’un dispositivu tecnolóxicu d’información virtual ensertada nun formatu físicu. Nesti casu, al traviés de cualquier dispositivu móvil (teléfonu, tablet, etc.) escániense imaxes en paneles al traviés d’una aplicación concreta: la app layar, Asina, el material espositivo en formatu físicu: paneles ya imaxes, apaez ampliáu con archivos en dellos formatos dixitales.

L’amuesa va tar a disposición d’alumnáu, padres y visitantes dende’l miércoles 10 de xunu al martes 30 de xunu, nos espacios d’acoyida delCPEB LA PUELA AYANDE, cai Las Veigas S/N 33880, La Puela, Ayande.

  Categories:
Loading Facebook Comments ...