Penguin Random House adquier Ediciones B

Penguin Random House robló’l pasáu xueves un alcuerdu de compra col Grupu Zeta p’adquirir Ediciones B. Através d’esta operación, el grupu editorial pretende publicar 2.000 títulos añales y potenciar la so presencia nel mercáu hispanofalante, según informó la editorial nun comunicáu.

Ediciones B, creada en 1986 en Barcelona, ta compuesta polos sellos B, Bruguera, Vergara, Nova, B de Blook, B de Books, B de Bolsu y B.cat. La compra d’Ediciones B al Grupu Zeta dexa a Penguin Random House Grupu Editorial incorporar al so catálogu nomes como Sarah Lark, John Katzenbach, Patricia Cornwell, P.D. James o Anne Rice.

Pero sobremanera, l’alcuerdu implica sumar al grupu Penguin Random House autores superventas del cómic como Francisco Ibáñez, ceador de personaxes como Mortadelo y Filemón -con vientes de más de 29 millones d’exemplares-, Rompetechos o 13 Rue de la Perceba. Tamién pasa a les sos manos el fondu de la centenaria revista TBO y personaxes como Zipi y Zape, de Escobar, El Capitán Truenu, de Víctor Mor y Ambrós, o Súper López, de Jan, que fueron adquiríos por Ediciones B tres el zarru de la conocida editorial Bruguera, en 1986.

La firma de l’alquisición asistió’l director xeneral de Penguin Random House, Markus Dohle, al pie de el presidente de Grupu Zeta, Antonio Asensio Mosbah. Anque l’alcuerdu yá se fixo públicu, la operación nun se va llevar a cabu hasta que se cumplan los requisitos xurídicu y alministrativu pertinentes. Penguin Random House informó de que Núria Cabutí Brull va siguir ocupando’l cargu de CEO Directora Xeneral d’esta compañía, col sofitu del director xeneral d’Ediciones B, Román de Vicente.