Portada Sociedá Pelayo González-Pumariega gana’l Premiu Patac con un estudiu del mapa d’Asturies de Schulz

Pelayo González-Pumariega gana’l Premiu Patac con un estudiu del mapa d’Asturies de Schulz

by asturnet

El XVIII Premio Padre Patac, que conceden cada añu la Conseyería d’Educación, Cultura y Deporte d’Asturies y el Conceyu de Xixón, recayó na convocatoria de 2012 en Pelayo González-Pumariega Solís, pol trabayu tituláu “El mapa topográfico de la provincia de Oviedo de Guillermo Schulz (1855)”.

“Guillermo Schulz (1805-1877) foi un inxenieru de mines d’orixe alemán, que pasó tola so vida profesional al serviciu del estáu español. El so primer destín foi Galicia, onde trabayó con una intensidá tal qu’en pocos años remató’l primer mapa xeognósticu del país, cola so correspondiente descripción de tol territoriu dende’l puntu de vista xeolóxicu y mineru. Esta magna obra, fecha en condiciones precaries y metanes les convulsiones de la dómina, representa un finxu de tal calibre, qu’asitió per munchos años a Galicia a la vanguardia de la conocencia xeolóxica.

Llueñe d’arriquecese colos descubrimientos de nueves mines realizaos mientres la confección del mapa o prosiguir un cómodu llabor como Inspector de Mines, l’espíritu honestu y entamador de Guillermo Schulz llevólu a salir de Galicia pa prosiguir l’estudiu d’otres rexones, arreyándose tamién na regulación de los estudios d’inxeniería de mines y asumiendo responsabilidaes na Alministración española. Ente otros puestos importantes, foi presidente de la Comisión del Mapa Xeolóxicu d’España, organismu precursor del actual Institutu Xeolóxicu y Mineru d’España.” [Fonte: Isabel Rábano Gutierrez del Arroyo].

El procesu d’impresión del mapa enllargóse mientres cuatro años, nos que Guillermo Schulz (1805-1877) llograba pruebes de cuatro grabadores. Finalmente fíxose en Madrid, nel establecimientu litográficu de J. Donon y el grabador foi Gustavo Pfeiffe. El mapa ponse a la vienta a finales de 1855, sol títulu Mapa topográfico de la provincia de Oviedo, formáu por orde de la S.M. la Reina, por D. Guillermo Schulz, inspector xeneral de Mines. Ta consideráu unu de los más importantes del reináu de Sabel II, llevantáu con criterios científicos y fíxose como soporte pa otru proyectu oficial que se-y encamentara: el Mapa xeolóxicu de la provincia d’Uviéu, que se publicar en 1857. Del Mapa topográficu de la provincia d’Uviéu fixeron seis ediciones (1855-1927).

Pelayo González-Pumariega Solís ye profesor titular del departamentu d’Esplotación y Prospección de Mines (área d’Inxeniería, Cartografía, Xeodésica y Fotogrametría) de la Universidá d’Uviéu. La so tesis doctoral yá trató sobre Guillermo Schulz y la so obra: aportaciones a la modernización d’Asturies y Guillermo Schulz. En collaboración con Angel R. Vidal Valdés y Eugenio Sáez, publicó en 2000 (KRK) Guillermo Schulz y los primeros proyectos para la enseñanza en materia de minas.

Tamién te podria gustar