Pedro Menéndez xube al escenariu de la plaza de Camposagrado pa remembrar so allistamientu

Fiel a la so cita añal, Pedro Menéndez, encarnáu pol actor Pablo Castañón, va volver a reclutar marineros d’Avilés que lu ayuden na so espedición a La Florida. Les midíes de seguridá frente a la pandemia del COVID-19 obligaron a treslladar la recreación del históricu allistamientu de les cais de la ciudá al escenariu que se va asitiase na plaza de Camposagrado, esti sábadu, 10 d’ochobre, a les 18.00 hores.

Con aforu llindáu a 100 asientos, ye necesaria la inscripción pa poder asistir a esti eventu gratuitu entamáu pola Asociación de Vecinos Pedro Menéndez. Cumpliendo cola normativa sanitaria, tendrá de facilitase nome, apellíos, DNI y teléfonu de contactu. Puede realizase al traviés del WhatsApp nel númberu 697 105 308, el corréu electrónicu asocpedromenendezhotmail.com y el Facebook de l’Asociación Pedro Menéndez.

El dramaturgu José Ricu tresformó l’habitual pasacalle nuna teatralización pa escena, que va ser dirixida por Nacho Montera y protagonizada un añu más pol reputáu intérprete asturianu Pablo Castañón, con una duración averada d’una hora. Collaboren na so puesta en marcha, amás de la AAVV Pedro Menéndez, l’asociación Auniendo Fronteres y el colectivu Art Street Palacio Valdés.

Na nueche anterior, esti vienres 9 d’ochobre, va tener llugar la cena d’Acción de Gracies, que conmemora les viandes y los bailles que Pedro Menéndez ufiertó a los sos marineros y a los indíxenas en San Agustín de La Florida en 1565, cola participación de Pablo Castañón.

Entamada por Auniendo Fronteres, va tener llugar a les 21 hores nel Hotel 40 nudos, con un preciu de 30 euros el cubiertu, ya inscripción nos WhatsApp de los teléfonos 649 759 701 y 684 602 714.