Paz Andrés tomó posesión como defensora universitaria

by redacción asturnews | marzo 17, 2017 10:01 am

El rector, Santiago García Granda, presidió la toma de posesión de la Defensora Universitaria, Paz Andrés, que se celebró’l xueves nel Paraninfu de la institución docente asturiana. El rector, en felicitando a la nueva defensora, recordó la frase que “Miguel  de Cervantes ponía en boca de Sancho Banduyu: “Confía nel tiempu que suel dar dulces salíes a munches amargoses dificultaes”.

Santiago García Granda animo a la nueva defensora a que faiga honor al so nome velando pola paz universitaria. Y dixo tamién que “dempués d’oyer les sos palabres, nun me quepe nenguna dulda, daes les sos intenciones de cercanía y tresparencia, lo mesmo que de desenvolver relaciones fluyíes y de collaboración. Ye, amás, la primer muyer que desempeña esti cargu na nuesa Universidá. Esta circunstancia, tráinos l’alcordanza de la celebrada máxima de Petra Karin Kelly, conocida activista pola paz, quien señalaba que: “Los homes siempres busquen táctiques pa encarar los problemes; les muyeres tán preparaes pa detectar ónde tán los problemes”. Por eso, el rector dixo compartir la cita que fixo del famosu xurista, filósofu y politólogo italianu Norberto Bobio, n’orde a la protección de los derechos.
Esbozó’l rector el cometíu específicu de la figura de la Defensora Universitaria aludiendo a que tien  de velar pol respetu a los derechos y llibertaes de profesores, estudiantes y personal d’alministración y servicios, a que’l so fin les sos actuaciones, dirixíes a llograr la meyora de la calidá universitaria en tolos sos ámbitos, nun van tar sometíes a mandatu imperativu y van venir rexíes polos principios d’independencia y autonomía”.
Aludió tamién a que Paz Andrés, como reputada internacionalista, puede contribuyir a la proyección internacional de la Institución. Dixo que “esa perspectiva internacional ye amplia y reconocida. Pero, nesti momentu interésame destacar sobremanera’l so espaciu européu dientro del cual tópense asitiaos los y les Defensores españoles.”.
Paz Andrés afirmó na toma de posesión del so cargu como defensora universitaria que taba abriendo una nueva etapa na so vida y que yera un gran honor qu’estimaba al órganu que lu hai escoyíu, el Claustru. La nueva defensora afirmó que “al atribuyir la misión de defender los derechos y llibertaes, la llei añede que les actuaciones del defensor tienen de dir siempres dirixíes escontra la meyora de la calidá universitaria en tolos sos ámbitos”, lo qu’esplica que’l Reglamentu aprobáu pol Conseyu de Gobiernu de la universidá incluya ente les sos funciones “non solo’l resolvimientu de les quexes sinón tamién la formulación d’encamientos y suxerencies, la mediación y la ideación de fórmules de conciliación y superación de desalcuerdos y conflictos. Esto ye asina porque nuna comunidá moderno y democrático faen falta interlocutores  qu’escuchen, encaucen y ayuden a resolver problemes: esti puestu respuende tamién a esta necesidá. Nesti sentíu, daquién dixo qu’el ombudsman trabaya por que les organizaciones sían más sensibles para coles persones a quien sirven. A última hora, trátase de procurar el bienestar de les persones que componen la nuesa comunidá y coles mesmes d’ameyorar el serviciu públicu qu’emprestamos”.
Terminó’l so discursu diciendo que “Norberto Bobbio, falando de los derechos humanos, señaló que’l problema de fondu güei nun ye tantu’l de xustificalos como’l de protexelos. N’efectu: el derechu ensin exercitase nun ye derechu. Pueden tar seguros de que voi emplegar los mios meyores esfuerzos pa defender los de los miembros de la comunidá universitaria y pa nun defraudar l’enfotu que depositaron en mi”.

Source URL: http://asturnews.com/paz-andres-tomo-posesion-como-defensora-universitaria/