Pattinson, Phoenix y Huppert van animar una Berlinale sol signu del #MeToo

07 febreru 11:19 2018 Imprimir

La presencia d’actores como Robert Pattinson, Joaquim Phoenix y Isabelle Huppert van animar la próxima Berlinale, un festival que va facer honor a la so reputación de sobriedá y que, amás d’amosar bon cine, va encetar l’alderique en redol al #MeToo.

Los escándalos d’abusos o acosu sexual nel mundu del cine adoptaron una “dimensión tarrecible”, indicó’l director del festival berlinés, Dieter Kosslick, al presentar el programa completu de la edición númberu 68, que se va abrir el próximu día 15 con “Isle of Dogs”, de Wes Anderson.

Al pie de sesiones d’alderique con personalidaes del mundu del cine, va activase la plataforma n’internet “Speak out”, destinada a asesorar a víctimes d’acoso, añedió Kosslick, quien primeramente revelara yá que refugó películes con participación de persones qu’almitieron cometer abusos. Pese al impactu d’esos escándalos y les sos consecuencies, Kosslick propónse ufiertar un profuso desfile d’estrelles y directores sobro l’alfombra colorada berlinesa, amás d’una combinación equilibrada de cine comprometíu y de diversión.

Un total de 19 películes van lluchar polos Osos, que va partir un xuráu presidíu pol director alemán Tom Tykwer y nel que participen, ente otros, l’español Chema Prado, exdirector de la Filmoteca española, y l’actriz belga Cécile de France. El filme noruegu “Utøyá”, centráu nos atentaos perpetaos en 2011 pol ultraderechista Anders Behring Breivik, con un total de 77 muertos, foi l’últimu títulu reveláu güei por Kosslick, una y bones el restu fueron anunciaos nes selmanes pasaes.

La llista d’aspirantes al Osu inclúi nomes de relieve como’l mesmu Anderson, Cédric Kahn y Benoit Jacquot, y nuevos talentos como’l paraguayu Marcelo Martinessi y el mexicanu Alonso Ruizpalacios, únicos representantes del cine llatinoamericanu nuna competición na que nun hai presencia española. Ruizpalacios vuelve a la Berlinale con “Muséu”, interpretada por Gael García Bernal, dempués de presentar en 2014 en Berlín, n’una de les secciones paraleles, “Güeros” Martinessi va competir cola so ópera prima, “Les Herederes”, película que cuntó col sofitu de los fondos d’ayuda al cine nuevu de la Berlinale.

L’apertura del festival va dir a cargu del filme de Anderson, una película d’animación a la qu’empresten les sos voces actores como Bill Murray y Jeff Goldblum, a los que s’espera pa l’alfombra colorada inaugural. Amás de “Isle of Dogs”, per Estaos Xuníos concursarán “Damsel”, de David Zellner ya interpretada por Pattison; y “Don’t Worry, He Won’t Get Far on Foot”, de Gus Van Sant, con Phoenix y Jack Black.

El cine francés va tar representáu na competición por “La prière”, de Kahn, y “Eva”, dirixida por Jacquot y protagonizada por Isabelle Huppert. Del cine anfitrión alleguen cuatro filmes: “Transit”, de Christian Petzold; “3 Tage in Quiberon”, de Emily Atef; “In dean Gängen”, de Thomas Stuber; y “Mein Bruder heißt Robert und ist ein Idiot”, de Philip Gröning.

 

  Categories: