Participantes na Feria Avilesina d’Asociaciones (FAVA) llancen un vídeu conmemorativu

Participantes na Feria Avilesina d’Asociaciones (FAVA) llancen un vídeu conmemorativu de la so tercer edición. La pieza puede vese íntegra na canal de Youtube del Conceyu y na web www.avilesparticipa.org.

El Serviciu de Participación Ciudadana del Conceyu d’Avilés realizó un vídeu conmemorativo de la tercer edición de la Feria Avilesina d’Asociaciones, FAVA, celebrada hai xusto un añu, el 27 d’abril de 2019. Al traviés d’una videoconferencia, el conceyal de Participación Ciudadana, Jorge Luis Suárez, caltuvo un alcuentru con delles de les persones organizadores y asociaciones participantes na feria para celebrar l’aniversariu de la so puesta en marcha. Amás l’alcaldesa, Mariví Monteserín, dirixió-yos un saludu nel que destacó’l trabayu de les asociaciones.

Nel alcuentru recordóse la tercer edición y tamién el camín percorríu hasta la fecha, poniendo en valor el trabayu de les entidaes y la medría de participación y d’arribación de públicu comenenciudu nos proyectos que tuvo la feria a lo llargo de les sos trés ediciones.

Nel vídeu apaecen les siguientes persones y l’entidá a la que representen:

• Pedro Mayada, presidente de l’Asociación de Vecinos Polígonu de la Madalena.
• Margot Carrera, presidenta de l’Asociación d’Ames de Casa de Llaranes, ACACIA.
• Reynaldo de Frutos, miembru del Conseyu de Participación de la Zona 4.
• Toño Morán, miembru de la Lliga Reumatolóxica Asturiana.
• Ana María Díaz, vicepresidenta de l’Asociación Rei Pelayo.
• Pablo González, vicepresidente de l’Asociación “Pedro Menéndez”.
• Verónica Canel, integrante de los Conseyos de Participación Ciudadana.

El so conteníu puede vese íntegramente na canal de Youtube del Conceyu d’Avilés al traviés del enllaz  y na web www.avilesparticipa.org. La cuarta edición, na que se taba trabayando dende va trés meses, tuvo que ser suspendida debíu al Estáu d’Alarma deriváu de la crisis del coronavirus.

La Feria Avilesina d’Asociaciones (FAVA) ye una iniciativa que surdió nel senu de los 4 Conseyos de Participación de Zona nos que s’estrema la ciudá, y que ta impulsada y coordinada pol Conceyu d’Avilés. Tien ente los sos oxetivos dar a conocer a tola ciudadanía’l llabor que desenvuelve caúna de les entidaes presentes nel conceyu. Coles mesmes, pretendi ser un puntu d’alcuentru, d’intercambiu d’esperiencies ente toles persones que participen ya implíquense en caúna de les entidaes tou los díes del añu, y qu’inciden n’ámbitos como l’asociativu-vecinal, cultural, deportivu, sociosanitariu, o l’educativu, ente otros.

Celebrose por primer vegada’l 22 d’abril de 2017 nel Centru Sociocultural de Los Canapés con una participación de 54 entidaes. Na segunda edición, yá celebrada na Plaza de los Hermanos Orbón, 60 asociaciones avilesines visibilizaron el so trabayu.

Na pasada edición, FAVA cuntó cola participación de 712 persones. Fueron 185 les encargaes d’atender los stands de les asociaciones presentes, informando directamente a la ciudadanía al traviés de los distintos puestos informativos. A elles sumáronse más de 150 pertenecientes a les distintes entidaes y que participaron nes diverses actividaes de dinamización, compuestes por actuaciones musicales, teatrales, baille, xuegos y talleres, ente otros.