Palacios solidarízase con Carnero y Morala pide’l reconocimientu ‘al derechu a lluchar pol futuru de les sos families y d’Asturies’

10 ochobre 03:27 2006 Imprimir

El director de l’Axencia Asturiana de Cooperación al Desarrollu del Gobiernu asturianu, Rafael Palacios, fizo pública la so solidaridá y el so apoyu ‘personal y políticu’ a Cándido González Carnero y a Juan Manuel Martínez Morala, históricos dirixentes de la Corriente Sindical d’Izquierdes (CSI), ‘frente al intentu de criminalización emprendíu contra ellos dende determinaos sectores políticos y xudiciales’. La pitición de seis años y mediu de cárcele que pide pa ellos el Ministeriu Fiscal foi definida por Palacios como ‘un despropósitu que, amás, trata de distrayenos del verdaderu problema, que ye’l progresivu desmantelamientu de la industria naval en Xixón’.

Rafael Palacios reconocía públicamente la llucha d’estos dos sindicalistes pol futuru del sector naval asina como de la indentidá industrial de Xixón, yá que ‘ye que públicu y notoriu dende hai bien d’años el so compromisu en causes sociollaborales y solidaries de diversa naturaleza’. Por eso, la pitición de seis años y mediu de prisión que solicita’l Ministeriu Fiscal pola so presunta vinculación coles movilizaciones del sector naval el 10 de marzu del añu 2005 ye, según Palacios, ‘un brutal despropósitu y supón, amás, una cortina de fumu pa distrayenos del verdaderu problema (el progresivu desmantelamientu de la industrial naval en Xixón), una agresión contra dos lexítimos representantes de la clase trabayadora nel nuestru país, Asturies’.

Palacios, como director de l’Axencia Asturiana de Cooperación al Desarrollu del Gobiernu d’Asturies, responsable de la defensa y promoción de los derechos humanos, pidió ‘la retirada inmediata de la denuncia contra estos dos trabayadores y el respetu a los derechos humanos, que pasa pol reconocimientu al derechu a lluchar pol futuru de les sos families y d’Asturies, pol futuru individual y colectivu’.

  Categories:
Loading Facebook Comments ...