Sociedá El Cafetón d’Avilés celebra la so VI Selmana Cultural by asturnet 2 d'agostu, 2006 El Cafetón d’Aviles celebra hasta’l prósimu día 14 la so VI Selmana Cultural, basada nuna serie de nueches nes que s’entemecen la maxa de los cuentos y de los magos, col teatru y la música, asina como los alcuentros solidarios nos que se van esponer diapositives informatives y organizar charres a beneficiu del Sahara, Nicaragua, Gambia y Colombia. Tolos díes, a partir de les nueve y media la nueche, va poder esfrutase de diferentes sesiones como son les performances d’Anxel Nava y Nel Amaro, cuentos de la mano de Roxelio Crespo, Berto Peña, Rafa Ordoñez, Belen Rubio y Carlos Alba, maxa de Xulín d’Aviles y Guillermo, monólogos de Julio y teatru col grupu Momo. Diferentes nueches musicales dedicaes al jazz y al folk, asina como la proyección de cortos n’asturianu son otres de les ufiertes de la VI Selmana Cultural del Cafetón d’Aviles que va durar hasta’l prósimu día 14 d’agostu. 2 d'agostu, 2006 0 FacebookTwitterPinterestEmail
ConvocatoriesFiestes L.lena convoca una nueva edición del so concursu de cuentos by asturnet 1 d'agostu, 2006 L’área de Cultura del Ayuntamientu de La Pola L.lena convoca una nueva edición del so famosu concursu internacional de cuentos, que cuenta col apoyu de la Consería de Cultura del Gobiernu del Principáu d’Asturies. El certame, nel que suelen participar autores d’abondos países europeos y americanos, tien una dotación económica de 3005 euros pal cuentu ganador. Les bases del concursu desixen que la obra presentada tea mecanografiada a doble espaciu y que nun pase de los ocho folios d’estensión. De tema llibre, los cuentos han de ser ineditos, nun pueden tar premiaos por otros concursos y nun han de tener compromisu anterior d’espublización. Les obres han d’unviase a la Casa Cultura de La Pola, faciendo constar los datos personales del autor, la dirección postal y el so númberu de telefonu. 1 d'agostu, 2006 0 FacebookTwitterPinterestEmail
Emigración El Centru de La Rioja prepara una sardinada pa celebrar el Día d’Asturies by asturnet 1 d'agostu, 2006 Aprovechando’l paréntesis del branu, el Centru Asturianu de La Rioja prepara dalgunos de los actos que va celebrar en setiembre: una gran sardinada’l día 9, con motivu del Día d’Asturies; la fiesta de San Matéu y l’amagüestu tradicional que coincide col empizu de la seronda. El Centru Asturianu de La Rioja prepara, aprovechando’l parentesis del branu, dalgunos de los festeyos que van tener llugar el prósimu mes de setiembre, que van empezar col Día d’Asturies, el día 9. Cuatrocientos quilos de sardines van asase nuna gran sardinada que se va preparar na plaza enfrente’l centru, onde nun va faltar la sidra y otres especialidaes típicamente asturianes, amenizao too ello por música rexonal. Va siguir otra de les fiestes grande que celebra’l Centru de La Rioja, la de San Mateu, equí llamada tamien fiesta de la vendimia. Una xornada dedicada a Asturies, onde tamien se va degustar sidra, empanaes, chorizos a la sidra y quesu cabrales, ente otros productos asturianos. L’actuación de grupos folclóricos va dar pasu a la proyección d’un videu sobre Asturies. Tamien se va poner un puestu dende’l que se van repartir folletos informativos sobre’l Principáu. El tradicional amagüestu va dar pasu al empiezu de la seronda, que se va celebrar con castañes y sidra dulce. Como novedá esti añu va mayase sidra na propia plaza y ta pensándose na posibilidá de montar un llagar nel mesmu sitiu. El Centru Asturianu de La Rioja nació hai una decada. Juan Ignacio Cossent Aguínaco, un uviedín afincáu en tierres riojanes dende hai años, ta al frente d’el dende entós. Trátase d’un centru particular, yá que foi montáu mayormente por xente mozo y como respuesta a una situación: “víemos qu’Asturies taba en declive, mentes La Rioja se ponía nel otru estremu y pensemos que yera’l momentu d’esparder les rellaciones entre les dos comunidaes p’apoyar la nuestra tierra”, afirma Cossent. En tou esti tiempu fíxose un hermanamientu cola sidra, al travies del Conseyu Regulador de La Rioja, y un hermanamientu de la llingua castellana cola asturiana, cita que se fixo nel emblemáticu Monesteriu de San Millán de la Cogolla, cola asistencia de representates del Gobiernu asturianu. “Queremos que tolo que faigamos tenga repercusión social y fomente’l conocimientu y rexonalismu ente Asturies y La Rioja”, diz el so presidente. La Escuela de Gaita ye otra de les sos iniciatives. Formada esti añu, ye ún de los sos grandes arguyos y un pasu más nesta xuntanza ente asturianos y riojanos. Unes 70 families participen nel Centru, munches d’elles ensin tar rellacionaos con Asturies, pero con un sentimientu común: l’amor por tolo asturiano. El prósimu mes de setiembre va celebrase un hermanamientu cola localidá de Baños del Riu Tobía, una zona chacinera con escelencia, que cunta nestos momentos con 20 empreses d’esti tipu en funcionamientu, y que tien una idiosincrasia mui asomeyada a Noreña. L’actu va tener llugar el 21 de setiembre. Ente tanto, una delegación del centru va dir hasta’l Principáu pa participar nel Congresu d’Asturianía. 1 d'agostu, 2006 0 FacebookTwitterPinterestEmail
Gastronomía El Ministeriu d’Agricultura y el Gobiernu Asturianu roblen un conveniu pa promocionar la sidra by asturnet 25 de xunetu, 2006 El Ministeriu d’Agricultura robló ayeri un conveniu col Gobiernu asturianu pa promocionar y meyorar la sidra, l’alcuerdu, que ta empobináu a la promoción de los productos asturianos con sellu de calidá, centraráse especialmente na sidra. Areces dio anuncia de la celebración nel primer semestre del añu que vien d’un “foru mundial de la sidra” nel que cuenta traer especialistes y productores de los paises con mayor cultura de la sidra. Elena Espinosa, ministra d’agricultura, y Álvarez Areces roblaron un alcuerdu por 857000 cola fin de promocionar el consumu de los productos asturianos con denominación d’orixe mediante la publicidá en dellos espacios audiovisuales. Pa la responsable de l’agricultura española “los consumidores nun acaben d’entender porqué han pagar el doble polos productos con denominación”. El presidente del Executivu asturianu aprovechó la presencia de la responsable española pa dar anuncia de la cellebración del I “Foru Mundial de la Sidra de calidá” au van acudir especialistes de Bretaña, Normandía, Inglaterra, Galés, Escocia, Estaos Xuníos, Canadá y Xapón. L’oxetivu d’esti foru mundial son, en pallabres del presidente Areces, “debatir los problemes y retos que se-y presenten a esta bebida singular, que nunca contó con un actu d’estes característiques” Pola so parte’l presidente del Conseyu Regulador de la Denominación d’Orixe Protexida Sidra d’Asturies, José Cardín, pidió que s’axilizara al másimu la campaña nacional de promoción de la sidra. Areces dixo qu’anguaño se ta trabayando en figures de protección pa productos como’l Chosco de Tinéu, Quesu Casín, Quesu de los Beyos y la Miel asturiano. Noticia relacionada El Gobiernu Central va destinar 600000 euros pa la promoción de la sidra asturiana 25 de xunetu, 2006 0 FacebookTwitterPinterestEmail
Emigración Los emigrantes amuesen la cultura asturiana nel Festival Celta del Potomac by asturnet 22 de xunu, 2006 El Festival Celta del Potomac, n’America del Norte, ta acabante de pesllar con esitu la última edición onde les ocho naciones celtes, incluyida l’asturiana, desfilaron izando les banderes de los sos respectivos países. La comunidá asturiana emigrante lleva años trabayando cola collaboración de l’Axencia Asturiana d’Emigración, asina como de colectivos asturianos como la Fundación Belenos, pa que la cultura, la música y la tradición de la tierra consoliden la so presencia nesti multitudinariu alcuentru. Nos dos díes que dura cada añu, el Festival Celta del Potomac inaugúrase con un desfile de banderes na que l’asturiana nunca falta, pa pasar depues a celebrar una serie d’actividaes de diferente naturaleza que representen la cultura de cada nación. Nos puestos llevantaos pa la ocasión cuentense cuentos tradicionales, ensíñase a tocar dalgún instrumentu típicu, pueden vese les actuaciones en directo de grupos de música folk de prestixu internacional (los asturianos Llan de Cubel y Brenga Astur, por exemplu, visitáronlu nel añu 2001), asina como se faen exhibiciones de baille o d’oficios artesanos. Alfonso Díaz, emigrante de Cangues d’Onís n’EEUU y organizador de la representación asturiana nel Potomac, ta mui satisfechu de la participación nel Festival. “Esti añu dime cuenta que la xente yá ta mui entreverada en lo que se refier al conocimientu d’Asturies. Anque ye cierto que tovía hai xente que nun sabe qu’esistimos, hai muncha otra, sobre too de los que frecuenten estos certámenes o de los que-yos gusta la historia, que sí nos conocen. Prueba d’ello ye que dalgunos van al tendayu astur pa saludar y tomar un culín (los más atrevíos yá quieren escancialu ellos), otros van a preguntar por Brenga Astur y Llan de Cubel, a los qu’escucharon otros años, y dalgunos quieren saber de los sos parientes de va dos o tres sieglos. Hebo una persona que vieno con un documentu en Mexico nel añu 1691, redactáu polos sos antepasaos al llegar a la ciudá dende Llanes”. Amás d’organizar el puestu asturianu nel que nun faltaben revistes, semeyes, música y folletos sobre la rexón, Alfonso Díaz dio dos charres sobre Asturies, repasando la mitoloxía, la cultura, la música y la historia de la comunidá. “Quiero dar les gracies a tola xente que dende Asturies apurrió lo que pudo de diferente manera. A l’Axencia Asturiana d’Emigración, a la Fundación Belenos, n’especial a Astur Paredes y a Fernando Montes de Brenga Astur pola so guía colos contactos y los testos, y tamien a Art Zoeller, quien fue mui valiosu nel nuestru stand”, terminó Díaz, trabayador incansable, quien yá prepara la edición del Festival Celta del Potomac del añu qu’entra. 22 de xunu, 2006 0 FacebookTwitterPinterestEmail
Música La nueche de San Xuan enciéndese cola música asturiana by asturnet 21 de xunu, 2006 La nueche de San Xuan, la nueche más máxica del añu, va encender les sos tradicionales fogueres al son de la música asturiana. Xixón, Llugones, Uvieu, Nava y Mieres, son dalgunes de les ufiertes musicales pa la nueche d’esti vienres na qu’Asturies va danzar alredor de les cenices del fueu y al son de grupos como Lliberdón, Xuacu Amieva, Dixebra o Victor Manuel. Amás de la multitudinaria propuesta mierense que va traer al veteranu Victor Manuel xunto a Ana Belen, otres ciudaes tamien presentaron el so programa festivu pa la nueche más máxica del añu, que marca’l solsticiu de branu. Asina, la plaza de la catedral uvieína va valir pa presentar el nuevu trabayu de Xuacu Amieva, que va xubir a los escenarios acompañáu de dalgunos amigos y músicos d’excepción, como Ramón Prada, Sergio Fernández, Jorge García, les pandereteres de Dulcamara y les bandes de gaites El Llacín y Naranco, ente otros. Los veteranos Lliberdón van ser los encargaos de poner música a la foguera xixonesa, que va ser prendida a les doce la nueche na playa de Poniente, mentes que los rockeros Dixebra van facer lo propio en Nava. Pela so parte, la foguera de Llugones trai a un ampliu repertoriu de músicos asturianos de prestixu. Dende les ocho la tarde hasta la madrugada los sones más tradicionales van llenar el Parque La Paz, de la mano d’artistes tan conocíos como Jorge Tuya, Luis Estrada, Xuan Nel Expósito, Emilio Martínez, La Bandina, McGoldrick, Corquieu y Skama la Rede. 21 de xunu, 2006 0 FacebookTwitterPinterestEmail
Gastronomía El Gobiernu Central va destinar 600000 euros pa la promoción de la sidra asturiana by asturnet 19 de xunu, 2006 La ministra d’Agricultura, Elena Espinosa, confirmó-y ayeri a la conseyera de Mediu Rural, Servanda García, que’l Gobiernu Central va destinar finalmente y 600.000 euros pa financiar la campaña de promoción nacional de la sidra asturiana, que va ser xestionada dende Asturies y que va cuntar con un presupuestu total de 900000 euros. La noticia d’esta campaña llega dos años más tarde de la fecha na que debiere ponese en marcha. Esta noticia vien a responder a les demandes de los llagareros que lleven años naguando por una acción ambidiosa que fomente’l consumu de la bebora rexonal fuera de les llendes d’Asturies. De los setenta millones de llitros que se producen al añu, la rexón consume unos trenta millones, repartiendose’l restu per España y l’estranxeru, onde sólo llega un cinco por cientu de la producción d’esti productu que cunta cola denominación d’orixe. 19 de xunu, 2006 0 FacebookTwitterPinterestEmail
Sociedá ‘Asturies, memoria encesa d’un país’ cumple diez años by asturnet 8 de xunu, 2006 El Club de Prensa Asturiana de La Nueva España acueye esta tarde a partir de les ocho una charra titulada ‘Diez años d’una aventura asturianista’, cola que se remembra’l decimu aniversariu de la revista ‘Asturies, memoria encesa d’un país’. Esta revista, recuperadora de tou tipu de documentos, informaciones y noticies hestóriques rellacionaes con Asturies, va ser esta tarde presentada pol antropólogu y academicu de la llingua asturiana, Roberto González-Quevedo. Editada pola Fundación Belenos, que collabora na celebración d’esti actu, ‘Asturies, memoria encesa d’un país’ lleva diez años averando a los asturianos a la conocencia de la hestoria propia, de les sos tradiciones y vezos, asina como a la reconstrucción de la memoria del pueblu asturianu. Nel actu de presentación d’esta tarde van participar los miembros del conseyu de redacción d’esta revista Ignaciu Llope, psiquiatra, escritor y portavoz de partíu Izquierda Asturiana, asina como Xose Nel Riesgo, xeógrafu y escritor tamien. 8 de xunu, 2006 0 FacebookTwitterPinterestEmail
Escéniques La Casa de Bernarda Alba llega a Xixón nel 70 aniversariu de la muerte de Lorca by asturnet 29 de mayu, 2006 La conocida obra de Federico García Lorca, ‘La casa de Bernarda Alba’ llega esta selmana al teatru Xovellanos de Xixón baxo la dirección d’Amelia Ochandiano y col un elencu d’actrices de gran prestixu. Margarita Lozano, María Galiana, Concha Hidalgo, Marta Calvó, Ruth Gabriel, Saturna Barrio, Coizalde Núñez, Adriana Ugarte y Palmira Ferrer van xubir los díes 1 y 2 de xunu a los escenarios xixoneses esta famosa pieza nel mesmu añu que se cumple’l setenta aniversariu de la muerte del so autor, asesináu en Granada na Guerra Civil española. Tres meses antes de ser asesináu en Granada, Lorca acababa esta obra con unes palabres que sedríen preludiu de la so muerte: “Y nun quiero lloros. La muerte hai que mirala cara a cara. ¡Silenciu! Fundiremonos nuna mar de llutu. ¿Oyísteisme? ¡Silenciu, dixi silenciu! ¡Silenciu!”. A piques de cumplise los setenta años d’estos fechos, Amelia Ochandiana adapta esta obra maestra cola que quier demostrar que la llucha de les muyeres, el glayíu rebelde de los oprimíos y los peligros de los grupos o sociedaes zarraes sobre si, tán a la orden del día. Les actrices Margarita Lozano, María Galiana, Concha Hidalgo, Marta Calvó, Ruth Gabriel, Saturna Barrio, Goizalde Núñez, Adriana Ugarte y Palmira Ferrer, formen un espectacular repartu pa un proyectu ambiciosu nel que destaca’l mestizaxe de la so banda sonora, que cuerre a cargu de Las Voces Búlgaras y el cantador Enrique Morente. 29 de mayu, 2006 0 FacebookTwitterPinterestEmail
Educación L’Academia abre’l plazu pa los cursos de branu by asturnet 21 de mayu, 2006 LAcademia de la Llingua abre esti llunes 22 de mayu y hastal 2 de xunu el plazu de matrícula pa los cursos de branu que desendolca na Escuela-Hogar de Santantolín-Ibias del 31 de xunetu al 11 d’agostu de 2006. Xunta los cursos elemental y avanzáu ufiértense dellos cursos dafondamientu, amás dotros en collaboración cola Universidá dUviéu.Los cursos tan abondo solicitaos polo que nos primeros díes suelen ocupase dafechu toles places. Dirixíos por Xosé Antón González Riaño y cuntando como secretariu con Pablo Xuan Manzano Rodríguez los cursos de branu de lAcademia son abondo nomaos ente los universitarios asturianos y ente los docentes que tienen de ver con materies que cinquen a la llingua, la lliteratura y dellos otros ámbitos de les humanidaes. Desendólquense en réxime dinternáu y ufierten una bona riestra de posibilidaes que van dende la obtención de los diplomes de conocencia básica o avanzada de la llingua asturiana a la capacitación pala traducción al asturianu o estayes pedagóxiques relacionaes coles nueves texnoloxíes. Estos cursos tienen la calterística especial de que sólo puen siguise en réxime dinternáu y pa matriculase lAcademia dispón dende esti llunes dun horariu que va de llunes a xueves de 9 a 15 hores y de 16 a 19 hores y el vienres de 9 a 14 hores. Síguese un orde rigorosu d’inscripción. Y amás del importe de la matrícula y una semeya, hai qu’enllenar tamién l’impresu de matriculación que se facilita na Academia. Estos Cursos tienen reconocencia oficial per parte de la Conseyería d’Educación del Principáu d’Asturies, darréu de l’acreitación de l’ALLA como “Entidá Organizadora d’Actividaes de Formación Permanente del Profesoráu”. Ello afita a tolos efeutos la reconocencia d’estos Programes Formativos dende’l puntu de vista alministrativu (currículum, méritos, sexenios, etc.) pal profesoráu d’Educación Primaria y Secundaria del Principáu d’Asturies. Más información sobre los cursos na páxina web de l’Academia 21 de mayu, 2006 0 FacebookTwitterPinterestEmail