Hestoria Inaciu Ilesias afirma que les instituciones y una tradición de pensamientu caltuvieron Asturies como país by asturnet 16 de mayu, 2005 Inaciu Iglesias, empresariu, editor y estudiosu de la identidá asturiana, ufierta nel so últimu llibru “Historia del nacionalismu asturianu” una visión particular de la nacencia y desenvolvimientu nel tiempu de los elementos comunes que conformaron el nuestru país. Pal autor d’esti trabayu, fueron les instituciones polítiques, independientemente del so debilitamientu o solidez en cada dómina, les que caltuvieron la entidá nacional d’Asturies. La otra tesis de la obra ye qu’una tradición de pensamientu ilustráu y los movimientos culturales consolidaron na época contemporánea el nacionalismu que llega a los nuestros díes. El llibru del editor de “Les Noticies” y autor d’otros trabayos como “La identidá asturiana”, tenta ser perenriba de too: “un llibru divulgativu, que quier contribuir a un mayor conocimientu d’una hestoria que non siempre se conoz y d’esa ignorancia puede que se despliquen munchos de los erros del nacionalismu contemporáneu”, afirma Inaciu Iglesias. Los oríxenes de la actual identidá asturiana coinciden na tesis d’esta obra colos oríxenes políticos d’Asturies como reinu. Pa Iglesias “les instituciones de gobiernu que tuvo Asturies son les que, unes veces d’una manera más firme, otres más débil, caltuvieron la unidá del país y el sentimientu de pertenencia a la comunidá”. Nesi sen “Historia del nacionalismu asturianu” ta estructurada en capítulos que definen les distintes categoríes qu’Asturies tuvo a lo llargo de la hestoria: “El reinu”, “El reinu en Lleón”, “El Principáu”, “La provincia” y “L’autonomía”. Otru de los motores del desenvolvimientu de la identidá asturiana y la causa principal de qu’anguaño esista un movimientu políticu nacionalista, al empar qu’un movimientu cultural y creativu con puxu importante , ye pal autor d’esti ensayu “la esistencia y continuidá del tiempu d’elementos intelectuales, casi siempre asitiaos na vanguardia del pensmaientu de la so época, nos sectores más ilustraos, y que teníen al so país y la so cultura como esmoliciones propies: del Beatu de Liébana, pasando por Xovellanos y el restu d’ilustraos, a los intelectuales y creadores actuales en llingua asturiana sigue esa tradición”. Preguntáu poles causes que ficieron a Asturies na dómina contemporánea a siguir un destin estremáu al d’otres comunidaes nacionales del estáu qu’afitaron importantes movimientos políticos d’ámbitu propiu, l’autor de “Historia del nacionalismu asturianu”(Ámbitu,2005), afirma que “equí desenvolvióse otru movimientu políticu popular qu’impidió l’afitamientu d’alternatives nacionalistes, y esi foi el movimientu obreru, dalgo que llegó a la época actual y na transición na que sigue apostándose per esa vía y namás en dómines mui reciente, nos últimos tiempos vese un ciertu enclín asturianista en partíos como Izquierda Xunida o la esistencia d’un sector pequeñu nel mesmu PSOE”. En cuantes a la fragmentación del nacionalismu asturianu anguañu y la so falta de relevancia social Iglesias caltién que “la razón ye qu’en toos esos años hubo xente que paecía más preocupada por restar que por sumar y a les mesmes organizaciones preferíen proponer les sos alternatives unitaries si otres se sumaben a elles y non tentando sumar ente toes”. Hai otru factor a xuiciu del autor de “La identida asturiana” y ye el de “la xente, ente los políticos nacionalistes nun hai xente como sí lo hai n’otros ámbitos con éxitu como’l de la cultura, que se dediquen al so llabor con tol empeñu, l’ambición y la dedicación profesional cola que se dediquen al suyu escritores, músicos, artistes, los resultaos tamién tán ehí:mientres munchos de los segundos tan algamando ya ésitos considerables, el nacionalismu asturianu va de fracasu en fracasu”. 16 de mayu, 2005 0 FacebookTwitterPinterestEmail
Sociedá El documentu de la X Asamblea d’Izquierda Xunida pide una mayor sintonía cola l’Academia y la so reconocencia by asturnet 17 d'abril, 2005 El documentu políticu que va aprebar la X Asamblea d’Izquierda Xunida d’Asturies valora positivamente los avances en normalización de la llingua asturiana frutu del so pautu de gobiernu col PSOE y al empar, con cierta autocrítica, reconoz que ye necesaria una mayor relación cola Academia de la Llingua y el reconocimientu del so llabor. El documentu tamién defende una implicación más fonda d’IX nos movimientos sociales pola defensa de la llingua y considera primordial “recuperar relaciones y trabayu conxuntu” colos colectivos y plataformes del asturianismu social. Nel terrenu políticu considera imprescindibles la oficialidá y el reconocimientu d’Asturies como nacionalidá na prósima reforma l’Estatutu. La ponencia central que va sirvir de documentu de discusión na prósima Asamblea d’Izquierda Xunida d’Asturies faise una valoración positiva del pautu de gobiernu soscritu col PSOE y de la so política d’aliances que llevó a la coalición federal a xuntase col Bloque por Asturies, al que considera coincidente “na nuestra vocación de tresformación social cola nuestra apuesta pola construcción dAsturies como país”. Pa IX la so xuntura col Bloque: “dos años depués desti alcuerdu, la valoración sólo puee ser favoratible” y caltién que “por ello mesmo tenemos dampliar la rellación ente toles dos organizaciones a tolos niveles, avanzar nel trabayu conxuntu a la fin dincorporar nesta alianza estratéxica a otros coleutivos y persones.”. Igual de “favoratible” abúlta-y a la coalición el marcu creáu pa la normalización del asturianu gracies a los alcuerdos de gobiernu, al pesar de que reconoza les diferencies que caltienen colos socios mayoritarios del executivu autonómicu:”estos avances no se producieron ensin tensiones nel marcu del gobiernu, con resistencies dende la parte socialista”, les diferencies col movimientu social polos derechos llingüísticos tamién se reconocen: “ye evidente quesisten diferentes valoraciones y preocupaciones nos ámbitos sociales del asturianismu, y ye necesaria una mayor iniciativa dende IU-BA nesti campu, recuperando relaciones y trabayu conxuntu pa non solo avanzar en medíes concretes sinón que estas contribuyan al oxetivu de la oficialidá y la normalización efectiva del asturianu y gallego-asturianu”, afirma la ponencia. Nestes llinies déxase entever una cierta autocrítica tocante les tensiones y enfrentamientos que calterizaron la relación d’IX-Bloque col asturianismu social y sobremanera cola Academia de la Llingua dende la presencia de la coalición nel gobiernu. El tonu autocríticu faise esplícitu nes llinies onde se defende recomponer la relación cola Academia y facer una reconocencia del so llabor.La institución llingüística y los sos másimos responsables fueran especialmente críticos dende la firma del pautu de gobiernu con Izquierda Xunida-Bloque y nos últimos meses estes diferencies aumentaran d’intensidá hasta’l puntu d’acusar al gobiernu asturianu nel que participa la coalición de querer “crear una Academia paralela” y nun respetar el so papel después del enfrentamientu algamáu pola Xunta de Toponimia. Nel apartáu de política cultural y llingüística del documentu políticu de la X Asamblea d’Izquierda Xunida hai constantes referencies a que les propuestes recoyíes nesa materia han contestualizase siempre nel enfotu “de la construcción d’Asturies como país” y no referío esclusivamente a la defensa de los drechos llingüísticos asturianos apúestase por combinar les iniciatives institucionales col sofitu activu al llabor de movilización entamáu dende’l Conseyu Abiertu pola Oficialidá, del que diz “fai falta impulsar nos prósimos meses” de cara al debate sobre la reforma estatutaria. 17 d'abril, 2005 0 FacebookTwitterPinterestEmail
Lliteratura Milio R. Cueto tira “L’ultimu volaor” cola sensación de pertenecer más al Acabóse qu’al Surdimientu by asturnet 13 d'abril, 2005 La última obra del escritor Milio Rodríguez Cueto ufierta una recopilación de los cuentos selmanales que vien publicando dende va años nel diariu La Nueva España. Embaxo’l títulu de “L’últimu volador” Cueto presenta una amplia amuesa de los sos artículos, a mediu camín ente’l realismu máxicu y la crónica de costumes, que tenten tomar nota lliteraria del mundu que nos arrodia y qu’alcuando supera les llendes más imaxinatives de la ficción.Cáusticu y llúcidu, l’autor llavianés, confiesa que’l Surdimientu “problablemente se trate en realidá del ‘Acabóse’ pa la llingua asturiana. Rodríguez Cueto ye un de los autores menos complacientes cola so propia obra y cola realidá onde se desenvuelve. Cuándo se-y pregunta el por qué de los títulos puestos a los sos últimos llibros: “Flores de cementeriu”, “L’entierru de Blancanieves” o “L’últimu volaor”, acabante publicar, confiesa que “son llibros de conteníu escatolóxicu, nel sen que se-y en teloloxía: apocalípticos, barruntadores del final, yo tengo munches veces la sensación de que’l Surdimientu nun ye l’empiezu d’una lliteratura moderna pa la llingua asturiana sinón problablemente’l final, l’Acabóse”. La xera del escritor énte estes apreciaciones nun ye inútil sicasí: “non, en cualquier casu va ser un final mui dignu, tendrémos l’orgullu de haber contribuío a que l’asturianu tuviere un final dignu”. Pa Milio Rodríguez Cueto “puede ser triste pa un escritor saber que la so obra nun va algamar la perpetuidá, pero ye más triste sospechar que ye una lliteratura, una llingua y una cultura les que nun van perpetuase”. El pesimismu respective al futuru del nuestru idioma nun supón nel autor de “L’últimu volaror” inacción, pasividá, por eso tien tentao buscar colos artículos publicaos selmanalmente en La Nueva España “a esos posibles llectores que nun tan necesariamente interesaos nel asturiano nin nel asturianismu, por eso procuré nun falar d’asuntos relacionaos con ello, quería probar si escribir n’asturiano puede interesar a dalguién más qu’a los llectores habituales nesta llingua, qu’amás son un públicu mui discretu, mui calláu, nunca se tien la certeza completa de qu’esista”. El recursu al humor o a narrar sucesos casi siempre desopilantes respuende pa Rodríguez Cueto “a la propia realidá d’esti país, somos una sociedá tamién mui discreta, nun facemos ostentación de les desgracies, amortigüamosles cola ironía y amás na vida diaria suceden coses que casi faen prescindible la imaxinación”, l’escritor pon por casu una hestoria que-y cuntaron va tiempu: una residencia xeriátrica montaba a dalgunos internos nuna furgoneta y llevábalos perende pa evitar qu’una inspección descubriere qu’había más internos de los autorizaos: “foi la hestoria qu’apaeció na prensa va pocos díes, hai miles d’hestories asina que suceden tolos díes, el realismu máxicu sal de la mesma realidá”. Mientres sueña con terminar “dalgún día” la novela na que trabaya dende va años: “Etiopía musculata”, Milio Rodríguez Cueto diz que nun tien “mui claro el qu’esti nun sea l’últimu volaor de la fiesta, seguramente nun lo será, el casu ye que’l futuru sin futuru que-y espera a la llingua na qu’escribimos nun invita a tirar volaores” y ye bien críticu colos que considera responsables de la situación: “aparte de la propia sociedá que tiende a ser pragmática, esmolecese polo más inmediato: el trabayu, la vivienda, etc., la responsabilidá absoluta ye de los gobernantes que tenemos dende va años, nun importa’l so signu políticu o la so personalidá, nesti asuntu nun se salva nin ún de los que presidieron Asturies”. L’actual gobiernu tampoco merez mayor consideranza por parte l’escritor: “políticos como Álvarez Areces renuncien a la posibilidá de pasar a la hestoria por habe-y devuelto l’autoestima y la dignidá a un pueblu, a la so llingua, y quieren más pasar por cuatro carreteruques feches y un hospital, ellos mesmos renuncien a ser dalguién, a tener pesu políticu o protagonismu dende Asturies”. Respective a la política llingüística entamada pol gobiernu de PSOE-IU-BA Cueto afirma que “punxeron como responsable d’esa política a una persona pa que sea a él al que-y dan los palos y-y llueven les crítiques mientres ellos permanecen a salvu, políticos como Areces nun tienen nenguna voluntá de normalizar l’asturianu, nun quieren facer coses importantes, lo suyo ye inaugurar tramos de carreteres o poner primeres piedres d’un edificiu qu’a lo meyor dura menos que la so propia carrera pública, ye llamentable la clase de políticos que tenemos”. Nesi sen pa Cueto “la certeza de que’l final de la llingua asturiana ta cerca ye dalgo verificable na realidá actual, énte ello ye coherente escribir llibros escatolóxicos, anuncios d’esi final tan cercanu nel que, siacasu, tuvimos l’honor de pretender que fuere dignu al menos”. 13 d'abril, 2005 0 FacebookTwitterPinterestEmail
Sociedá Los diputaos van usar la llingua na Selmana de les Lletres by asturnet 4 d'abril, 2005 Los versos de los poetes contemporáneos en llingua asturiana van sonar nel parlamentu autonómicu na voz de distintos diputaos de los grupos representaos na Xunta Xeneral. La iniciativa entamada ente la Oficina de Política Llingüística de la Conseyería de Cultura y la presidencia del parlamentu asturianu tenta tresmitir a la sociedá la necesidá de normalizar l’usu de la nuestra llingua en tolos ámbitos. Ye la primer vez que’l másimu órganu lexislativu del Principáu al través de los sos representantes parlamentarios participa institucionalmente nuna iniciativa en favor del usu del asturianu. Fiel al lema col que se presenta la XXVI Selmana de les Lletres dedicada a reconocer y difundir la obra desenvuelta poles tres xeneraciones de poetes contemporáneos: “Poesía en movimientu”, los versos y l’idioma nel que fueron escritos van movese per estremaes fasteres del país. Una d’eses fasteres desavezaes al ecu de les voces revitalizadores de la llingua asturiana, la Xunta Xeneral del Principáu, va ser escenariu d’un de los actos institucionales de la Selmana: representantes de los distintos grupos políticos pondrán voz a poemes d’autores del Surdimientu. Según afirmaron a Asturnews fontes del departamentu de Política Llingüística énte la iniciativa nengún de los grupos presentes nel parlamentu refugó participar y vamos ver, poro, la primer vez a diputaos del PSOE, Partíu Popular y Izquierda Xunida-Bloque por Asturies usando en públicu y nun actu oficial l’asturianu. Va ser un momentu ensin dulda memorable d’esta Selmana de les Lletres que cuenta nesta ocasión con un arropu de luxu na presencia del poeta y premiu Nobel irlandés Seamus Heaney, una de les referencies de los autores contemporáneos en llingua asturiana. 4 d'abril, 2005 0 FacebookTwitterPinterestEmail
Sociedá El PSdG propón l’espardimientu de la llingua y cultura gallega pel Navia Eo, El Bierzo, As Portelas y tres villes de Cáceres by asturnet 28 de marzu, 2005 El grupu parlamentariu de los socialistes gallegos presentó’l pasáu 23 d’abril una iniciativa dirixida a promover l’espardimientu de la llingua y la cultura gallega per delles fasteres d’Asturies, Lleón, Zamora y Estremadura que’l PSdG considera “de fala galega”. El testu presentáu poles diputaes Natividad González Laso, Laura Seara Sobrado y Manuel Luis Rodríguez González articúlase en cuatro propuestes d’actuación ente elles “fortalecer les relaciones ente los gallego-falantes d’estos espacios y los de Galicia” y considera necesario “apoyar l’actitú de los que tán contribuyendo neses zones al espardimientu del gallegu”. Les cuatro propuestes que faen los socialistes de Galicia al gobiernu de la Xunta empobínense a les fasteres de Navia-Eo, El Bierzo, As Portelas y tres villes de la provincia de Cáceres, según publicaba la edición del pasáu 23 d’abril de ‘La Voz de Galicia’. Nelles los diputaos firmantes de la iniciativa consideren “preciso establecer alcuerdos coles instituciones educatives d’Asturies, Lleón, Zamora y Extremadura pa que’l gallego pase a formar parte de manera permanente de les actividaes culturales y educatives d’eses zones”. La segunda propuesta consite en proponer “que los circuitos culturales promovíos pola Xunta de Galicia s’espardan hasta les cuatro zones de fala galega”. Darréu el PSOE de Galicia pide “fortalecer les relaciones ente los gallego-falantes d’estos espacios y los de Galicia, proponiendo programes vacacionales o d’intercambiu al través de los programes de les distintes conselleríes”, al empar qu’instituciones como’l Consello da Cultura Galega incorpore persones representantes d’eses zones, como ya ficiera apocayá l’Academia Galega. A lo último el grupu socialista nel parlamentu gallegu considera “necesario apoyar l’actitú de los que tán contribuyendo neses zones al espardimientu del gallegu y facer participar a la población de les mesmes nes iniciatives culturales que contribuyan a fomentar la difusión del idioma gallegu”. 28 de marzu, 2005 0 FacebookTwitterPinterestEmail
Sociedá IAS acusa a IX-BA de “esconder la cabeza embaxo l’ala” poles ordenances de Xixón by asturnet 27 de marzu, 2005 El voceru d’Izquierda Asturiana (IAS) en Xixón Federico Yustas afirma nun comunicáu que l’Ayuntamientu d’esti conceyu “ta burlándose de la ciudadanía y de la Oficina de la Llingua al nun tramitar la ordenanza del asturianu”. Esta organización acusa a los socios de gobiernu del grupu socialista de “esconder la cabeza embaxo l’ala” énte la negativa de los representantes del PSOE na corporación a asumir y tramitar les ordenances sobro usu de la llingua asturiana n’Administración Municipal elaboraes pola Oficina y refrendaes pol so Conseyu Asesor La situación de bloquéu na que ta esti proyectu pa normalizar l’usu del asturianu nel Ayuntamientu xixonés dende que’l grupu municipal socialista, per boca de l’Alcaldesa, Paz Fernández Felgueroso, se negare a aprebar les ordenances, ye oxetu de dures crítiques por IAS. Pa esta organización nacionalista el fechu de que les principales discrepancies poles que’l PSOE nun ta dispuestu a aceptar el reglamentu, les referíes al derechu de los ciudadanos a dirixise y recibir contestación en llingua asturiana ye “d’una gravedá inusitada ya qu’esi derechu ta consagráu na Llei d’Usu y Promoción del Asturianu”. Según manifestó en feches recientes la conceyala d’Educación, Llingua y Cultura Asturiana, Carmen Rúa, d’IX-BA, l’Alcaldesa, Paz Fernández Felgueroso, tresmitiéra-y personalmente el so desalcuerdu colos artículos de les ordenances referíos a les comunicaciones ciudadanes cola adminstración municipal n’asturianu, dalgo que, la presidenta de la corporación y el so grupu consideren “una oficialidá de fechu”, dalgo polo que nun taríen dispuestos a pasar. Rúa manifestara a Asturnews el so disgustu por esta negativa de los sos socios de gobiernu que se facía “ensin siquier dexar la puerta abierta a una negociación”. La situación permanez estancada dende entós y nun parez haber visos de que se solvente bien lluego. IAS, per boca del so voceru Federico Yustas, esparde les sos acusaciones al grupu d’IX-BA de los qu’afirmen “tán xugando un papel llamentable amosando que tola vehemencia y capacidá de presión qu’amuesen n’otros temes vuélvese docilidá ya inacción cuando se trata de defender la cultura asturiana de los ataques del PSOE” y caltienen qu’énte esti asuntu “IX-BA escuende la cabeza embaxo l’ala”. Por último Izquierda Asturiana de Xixón nel so comunicáu desixe al Ayuntamientu que rectifique y “aprebe en Xixón unes ordenances que’l PSOE asume como propies en L.lena o n’Uviéu”. 27 de marzu, 2005 0 FacebookTwitterPinterestEmail
Sociedá El PP afirma que’l diálogu col CAO nun esclúi la so atención a grupos contrarios a la oficialidá by asturnet 18 de marzu, 2005 El diputáu Joaquín Aréstegui considera positivu l’alcuentru calteníu esta selmana con representantes del Conceyu Abiertu pola Oficialidá ensin que por ello “tamién tengamos interés n’escuchar les opiniones d’otros grupos, incluíos los que tienen planteamientos radicalmente distintos y nos qu’hai persones con un pesu intelectual del que nun se puede duldar”. El parlamentariu popular, sicasí, afirma que’l so partíu apuesta pola “potenciación de la llingua asturiana y del restu de les nuestres señes d’identidá” y que nun-y gustaría que “dalguién acusare alcuando al Partíu Popular de ser el responsable de la desaparición d’una d’eses señes d’identidá”. Respective a la oficialidá, pa Aréstegui, “nun ye una demanda social bultable y lo qu’amuesen les encuestes ye que los asturianos estimen la so llingua y quieren midíes de protección, pero la posición alrodiu la voluntariedá ye la mayoritaria, nun quieren imposiciones”. El diputáu popular considera positivu l’alcuentru calteníu col Conceyu Abiertu pola Oficialidá “porque nesti como en cualquier otru tema toos podemos aportar munches coses y nos nun refugamos nengún debate, incluíu el de la oficialidá, lo que nun quier dicir qu’agora mesmo creamos que la sociedá la demande, los datos de les encuestes reflexen l’enfotu por mantenese dientro la voluntariedá de les midíes pa potenciar la llingua, tal como afita la Llei d’Usu, una llei qu’aprebó, quiero recordar, un gobiernu del Partíu Popular”. Esa posición que los populares comparten col PSOE reflexa a xuiciu d’Aréstegui: “la posición de dos partíos que representen al 90 por cientu de la sociedá y nós tampoco díbamos entender que’l Partíu Socialista nun contara col Partíu Popular a la hora de tratar un tema como esti”. Joaquín Aréstegui considera que l’asturianu “ye una seña d’identidá que los asturianos valoren ente les más queríes” y que tien de protexese “acordies col marcu llegal de la Llei d’Usu y de la Carta Europea de les Llingües” inda nun considera “comparable la situación d’Asturies cola d’otres comunidaes con llingua propia como Baleares, Valencia, Galicia, Cataluña…caduna d’elles tamién distinta”. Preguntáu énte la situación na que diba quedar l’asturianu si, como s’espera, dientro les reformes de los estatutos Aragón recueye nel suyu la cooficialidá d’aragonés y catalán col castellanu Aréstegui declara que “n’Aragón fálense tres llingües, castellanu, catalán nuna franxa y nuna fastera mui pequeña, aragonés,y tampoco ellí ta cerrada esa cuestión énte la reforma del estatutu, referente a Asturies inda nun s’entamó´’l debate de la posible reforma nin tenemos noticies del PSOE al respective, la nuestra posición en cualquier casu ye la de caltener l’actual marcu llegal pal asturianu ensin cerranos a nengún debate con naide”. Respective a la política llingüística desenvuelta pol gobiernu del PSOE y Izquierda Xunida-Bloque por Asturies, Aréstegui tachóla “d’ambigua y insuficiente”, de la que sería un reflexu el Plan de Normalización: “el documentu recibímoslu ayer y vamos estudialu la prósima selmana, nuna primer llectura, sicasí, da la impresión de tar enllenu vaguedaes y ambigüedaes, nun paez mui distintu de lo que se facía hasta agora”. Nesa primer impresión, previa a la valoración política que va facer el so grupu una vez estudiáu el documentu, Aréstegui sí consideró “positivo el que tome como referencia la Llei d’Usu”. Joaquín Aréstegui adelantró qu’en prósimes feches el grupu popular va mantener alcuentros con instituciones como l’Academia de la Llingua y con “otros grupos, ente ellos los que tienen planteamientos radicalmente distintos y nos qu’hai persones d’un pesu y una calidá intelectual de les que nun se puede dudar, y que polo tanto, merecen ser tamién escuchaos”, dixo n’alusión a Amigos de los bables. Pal representante del PP trataríase de “desdramatizar un asuntu que nunca representó un problema grave nin un conflictu n’Asturies y que nun tien por qué representalo nun futuru”. 18 de marzu, 2005 0 FacebookTwitterPinterestEmail
Comunicación L’ex director de TVE n’Asturies denunciáu tamién en Telemadrid por “manipulación informativa” by asturnet 16 de marzu, 2005 Los trabayadores de Telemadrid denunciaron esti martes 15 de marzu “la manipulación ifnormativa” que supunxo la emisión del reportaxe especial “11-M: un año después” que conduxo l’ex-director del Centru Territorial de TVE n’Asturies José Antonio Ovies. El periodista asturianu ye anguañu subdirector d’informativos y entamaba’l reportaxe nun planu mediu entrugando ente otres coses “Quién foi’l primer periodista que dixo qu’ETA yera la culpable del atentáu, qué políticu entamó a falar d’Al Qaeda, o quién planificó los SMS y a qué hora exactamente”. Los Comités d’Empresa del Ente Públicu de Telemadrid y Onda Madrid asoleyaron un comunicáu nel que rechazaben esta “manipulación informativa”, porla “nidia intencionalidá del caberu reportaxe: ufrir sospeches de que los resultaos ellectorales foron influenciaos intencionadamente pola SER”. Amás de participar na cobertura en directu del incendiu na Torre Windsor -quince hores siguíes d’emisión con puntes d’audiencia del 65 por cientu en Madrid-, José Antonio Ovies presenta’l programa selmanal d’actualidá ‘Madrid 7 días’, según informa la web de la cadena madrilana, y ocupa’l cargu de subdirector d’informativos, lo que lu pon a la tiesta de munchos de los trabayos especiales d’informativos de la canal pública. Ovies salió de la delegación asturiana de TVE en xunu pasáu con mala prensa al llombu. Nun informe ellaboráu por trabayadores del centru de Televisión Española en San Esteban de les Cruces, atribuíense-y al periodista, ente otres manipulaciones, la grabación previa d’un informativu ficticiu sobro la fuelga xeneral del 20 de xunu de 2002 y la emisión d’un falsu asaltu con destrozos a la sé’l PP n’Uviéu tres d’una manifestación contra la guerra d’Iraq, con plena conocencia previa de la falsedá de la noticia. Amás, trabayadores de TVE n’Asturies denunciaron en so día el so ablucamientu al comprobar cómo’l so superior decidía abrir l’informativu territorial asturianu del 27 d’ochobre de 2003 cola noticia -d’ámbitu madrilanu- de la victoria de la candidata’l Partíu Popular, Esperanza Aguirre, nes elecciones de Madrid. Destituyíu del so cargu nel Principáu tres de la llegada’l PSOE al Gobiernu central -cuando lu sucedió Pedro Alberto Marcos- Ovies pasó a trabayar a la cadena pública Telemadrid, cuyes directrices básiques marca’l PP, fuercia política mayoritaria tanto nel Ayuntamientu como na Comunidá autónoma de Madrid. Informe íntegru sobro la xestión d’Ovies en TVE-Asturies (orixinal en castellán) 16 de marzu, 2005 0 FacebookTwitterPinterestEmail
Sociedá El grupu socialista refuga les ordenances elaboraes pola Oficina de la Llingua de Xixón by asturnet 9 de marzu, 2005 El testu de les ordenances pa la normalización del usu del asturianu nel Ayuntamientu de Xixón elaboráu pola Oficina Municipal de la Llingua y el so Conseyu Asesor nun cuenta col preste del grupu socialista que gobierna en coalición con Izquierda Xunida-Bloque por Asturies. Los representantes del PSOE nel gobiernu del conceyu manifestaron a los sos socios de pactu el so desalcuerdu con un testu qu’a xuiciu de los socialistes “implicaría la oficialidá de fechu”. En declaraciones a Asturnews, Roberto Colunga, secretariu xeneral del Bloque por Asturies y representante na Fundación Municipal de Cultura de Xixón, amosó el so disgustu y el so desconciertu ente la negativa del PSOE n’admitir unes ordenances “que tán calcaes de les que sí admiten los sos compañeros de partíu n’otros conceyos como Uviéu y L.lena”. El grupu municipal socialista al través de la propia alcaldesa treslladó a la conceyal de llingua y cultura asturianes Carmen Rúa l’encamientu de que se camudaran dalgunos artículos d’estes ordenances p’admitiles y recordó-y que la iniciativa de la Oficina nun taba contemplada nel pactu de gobiernu. Pal representante del Bloque nel grupu municipal d’IX-BA, Roberto Colunga, la situación agora ye “difícil d’entender, nun hai una negativa en redondo del PSOE, pero refuguen aceptar tal como tán estes ordenances que tan aprebaes pol Conseyu Asesor de la Oficina municipal. Con esta negativa de los socialistes les ordenances pal usu del asturianu n’administración del conceyu xixonés vuelven a la vía muerta onde tán desque fueron entregaes pola Oficina de la Llingua a tolos grupos municipales pal so estudiu. La conceyala Carmen Rúa manifestó a Asturnews que la negativa de los socialistes espresada pola alcaldesa Paz Fernández Felgueroso ye “a les ordenances en xeneral,acepten lo referío a publicidá y usu del asturianu en publicaciones pero tolo que se refier al drechu de los ciudadanos a comunicase y recibir comunicación nel conceyu en llingua asturiana recházase de plano”. Al igual que’l so compañeru de grupu municipal Roberto Colunga, Rúa señaló la incoherencia de los socialistes en refugar unes ordenances que “los sos propios compañeros nel Ayuntamientu d’Uviéu nos pidieron pa presentales ellí y que tán negociando col alcalde Gabino de Lorenzo”. La conceyala encargada de la Oficina Municipal de la Llingua señaló qu’hai una entrevista solicitada cola alcaldesa pa tratar de desbloquear la situación y entamar una negociación pa buscar soluciones al empantanamientu de les ordenances. 9 de marzu, 2005 0 FacebookTwitterPinterestEmail
Sociedá La Mancomunidá de la Sidra y Cangas fortalecen la rede de servicios llocales de promoción del asturianu by asturnet 25 de febreru, 2005 Dos pasos alantre na promoción municipal de la llingua asturiana. La Mancomunidá de la Comarca de la Sidra, qu’axunta a seis conceyos del oriente d’Asturies, pon en marcha un Conseyu Comarcal de Política Llingüística col que quier implicar a les asociaciones de Bimenes, Cabranes, Sariegu, Nava, Colunga y Villaviciosa na promoción del asturianu. El serviciu preséntase hores depués que l’Ayuntamientu de Cangas del Narcea aprobare crear un serviciu de normalización propiu. Asina, los votos favoratibles de PSOE, Izquierda Xunida-Bloque y URAS sacaron ayeri alantre la pretensión del equipu de gobiernu de Cangas d’entamar una oficina llingüística, nuna decisión na qu’a la fin abstuviéronse los conceyales del PP pesie a qu’esti mesmu partíu votara antes a favor na comisión municipal de Cultura. A resultes del preste de los grupos políticos llocales, Cangas echará a andar el so serviciu propiu nes prósimes selmanes, tuteláu por personal técnicu inda por contratar y col envís declaráu de “facer normal a nivel institucional lo que yá ye normal na cai”. Na práctica, la creación de la oficina llingüística municipal redactará testos públicos n’asturianu, tornará a esi idioma documentos oficiales y alitará la recuperación de la toponimia tradicional del conceyu. Nesti aspectu, l’Ayuntamientu yá-y empobinó de vuelta a la Xunta Asesora de Toponimia el llistáu de los nomes de llugar del municipiu pa la so validación pol Conseyu de Gobiernu. Nel otru estremu xeográficu’l Principáu, la Mancomunidá de la Comarca de la Sidra presentó esti mediudía na llocalidá de Paraes, en Nava, la puesta en marcha’l denomináu Conseyu Comarcal de Política Llingüística, un muérganu que quier completar el llabor yá en marcha del serviciu llocal de promoción llingüística de la Mancomunidá atropando los encamientos y la participación activa de los collectivos y asociaciones de la comarca. 25 de febreru, 2005 0 FacebookTwitterPinterestEmail