Educación Fuelga na enseñanza by asturnet 16 de marzu, 2007 La estaya de mocedá de la Xunta pola Defensa de la Llingua Asturiana convoca una fuelga estudiantil pa reclamar el derechu a estudiar asturianu en condiciones dignes y de normalidá. La fuelga va facese’l prósimu 22 de marzu, a les 12’l mediudía ta convocada una concentración na Plaza d’España d’Uviéu. La fuelga de la Xunta Moza cuenta col apoyu de Mocedá d’Izquierda Asturiana, la Xuventú Asturianista, Mocedá d’Andecha, Coleutivos de Mocedaes Comunistes y el Conceyu Universitariu pol Asturianu. La Xunta Moza convoca esta movilización, la segunda fuelga convocada dende’l movimientu de defensa de los derechos llingüísticos por mor del curriculu educativu presentáu pol conseyeru Riopedre nel que l’asignatura d’asturianu pasaría a ser una materia optativa y non voluntaria como vien siendo hasta’l momentu en cumplimientu cola Llei d’usu y promoción del asturianu. 16 de marzu, 2007 0 FacebookTwitterPinterestEmail
Sociedá Areces recibe les protestes ciudadanes na inauguración del Centru Polivalente de Candás by asturnet 28 de febreru, 2007 La inauguración del Centru Polivalente de Candás axunta les protestes ciudadanes contra la xestión del gobiernu asturianu. L’apertura d’esti Centru atraxó les protestes de los vecinos afectaos pola Zalia, la privatización de Perlora y la oficialidá del asturianu. L’entamu de la precampaña electoral pal presidente asturianu, Vicente Álvarez Areces, ta siendo una cuestión complicada poles concentraciones ciudadanes en defensa de los sos intereses. El presidente asturianu recibió na inauguración del Centru Polivalente de Candás les crítiques de diversos colectivos contrarios a dalgunos aspectos de la so xestión política. La Pita de la Xunta pola Defensa de la Llingua Asturiana participó ente los colectivos ciudadanos na reclamación de la Oficialidá de la Llingua Asturiana nesti actu d’inauguración. El presidente asturianu visitó les instalaciones del Centru Polivalente de Candás, que cuenta con sales de reuniones, espaciu d’internet, talleres o zones d’ociu, y que s’empobina a un aprovechamientu por parte de la ciudadanía del conceyu de Carreño. Nel actu’l presidente tenía prevista la inauguración d’un mural fechu por un grupu de neños y neñes discapacitaos, hai yá tres años con fondos del antigüu IMI, y que por “motivos de seguridá” acabó por nun inaugurar. Esti fechu foi criticáu poles plataformes ellí aconceyaes qu’en tou momentu apautaron coles families de los y les neñes que durante la inauguración del mural nun diben facer nenguna protesta entendiendo que’l protagonismu d’esi actu teníen que lu tener los neños. Esta nun ye la primer vegada na qu’el presidente asturianu ye recibíu poles protestes ciudadanes contraries a la so xestión, tando presente entovía la so visita a La Pola (Siero). 28 de febreru, 2007 0 FacebookTwitterPinterestEmail
Música “Un pasu alantre” ente los finalistes al meyor cantar n’asturianu de los Premios de la Música by asturnet 19 de febreru, 2007 El single asoleyáu pola Xunta pola Defensa de la Llingua Asturiana y fechu pol Colectivu Músicos pola Oficialidá ta ente los finalistes al meyor cantar n’asturianu de los Premios de la Música qu’añalmente convoca l’Academia de les Artes y les Ciencies de la Música. Los otros dos finalistes son Toli Morilla por “Cuando naide lo ve” y Rosaleda Jazz Cuartet por “Na fonte”. Xunta pola Defensa de la Llingua Asturiana 19 de febreru, 2007 0 FacebookTwitterPinterestEmail
Sociedá Miles de persones reclamen la dignificación del asturianu nes escueles by asturnet 17 de febreru, 2007 La manifestación, convocada polos sindicatos d’enseñanza y la Xunta pola Defensa de la Llingua Asturiana, en defensa de la enseñanza del asturianu na educación primaria reune a cerca de 2000 persones n’Uviéu, a pesar del mal tiempu. La manifestación acabó na plaza de la Escandalera onde se lleó un manifiestu conxuntu de les organizaciones nel que s’afalaba a la modificación del curriculu educativu de primariu pa iguar la situación del asturianu pa garantizar l’exerciciu de los derechos educativos de los neños y neñes que quieren estudiar asturianu. Les organizaciones sindicales SUATEA, FETE-UXT, CC.OO. d’Enseñanza, y la Xunta pola Defensa de la Llingua Asturiana afirmaron , dientro del manifiestu, “que l’accesu al estudiu y conocimientu de la nuesa llingua ye un derechu reconocíu espresamente pola llexislación y qu’ha ser respetáu y garantizáu. Dende les entidaes convocantes consideren qu’el futuru currículu educativu ha garantizar la non competencia de l’asignatura con otres materies, sean o non curriclares. Los escolinos y escolines que tengan padres o tutores qu’escueyan nun cursar l’asignatura de Llingua Asturiana o Gallego-Asturianu na zona más occidental han recibir la debida atención educativa, pa que la escoyeta d’una o otra opción nun suponga discriminación nenguna. Esa atención en nengún casu ha llevar al aprendizaxe de contemos curriculares nin asociaos a cualquier área de la etapa, como asina recueye la Llei d’Usu del Asturianu nel so artículu 10, apartáu 3: “…Pa los que lo escueyan, el so aprendimientu o usu nun podrá torgar que reciban la mesma formación y conocimientos n ‘igualdá de condiciones que’l restu l’alumnáu.” 17 de febreru, 2007 0 FacebookTwitterPinterestEmail
Sociedá Valledor muestral so desalcuerdu col borrador de curriculum pal asturianu by asturnet 5 de febreru, 2007 El Conseyeru de Xusticia declaró, tres la reunión del vienres col responsable d’educación, Jose Luis Iglesias Riopedre, que poner l’asignatura d’asturianu como optativa ye discriminatorio pa los alumnos y qu’incumpliría dafechu la llei d’usu.. Valledor que ya se manifestó abiertamente escontra la nueva propuesta de curriculum propuso-y a Riopedre que l’asturiano sía asignatura voluntaria y non optativa pa los escolinos pa dar solución a un conflictu que pon l’enseñanza de la llingua asturiana nuna situación de discriminación notable. Alrodiu del conflictu xeneráu pola publicación d’esti borrador de curriculum de primaria, la Xunta pola Defensa de la Llingua Asturiana y los principales sindicatos asturianos d’enseñanza van convocar una manifestación pa reivindicar la normalización de la enseñanza del asturianu nes escueles. La manifestación va cellebrase na estación de RENFE d”Uvieu’l vienres 17 de febreru a la 1 de la tarde y los convocantes, pol momentu, son la Xunta pola Defensa de la Llingua Asturiana y los sindicatos SUATEA, FETE-UXT y l’estaya d’enseñanza de CCOO. El plazu pa presentación d’alegaciones al borrador de curriculum remata’l día 23 de febreru. 5 de febreru, 2007 0 FacebookTwitterPinterestEmail
Sociedá Pedro Pereira actuará’l sábadu na entrega de los Premios Andres Solar 2007 by asturnet 14 de xineru, 2007 El cantautor Pedro Pereira va actuar el sábadu que vien nel actu dentrega de los XXII Premios Andrés Solar que va entamar a les 19,30 d’esi sábadu 20 de xineru, nel Salón dActos del Antiguu Institutu Xovellanos de Xixón. Sigún asoleya esti día la Xunta Pola Defensa de la Llingua na so páxina web, el cantautor Pedro Pereiro va ser l’atracción principal de la entrega esti añu al grupu musical Felpeyu del l Pegoyu en representación del ámbitu de la música nasturianu, mentantu que la versión negativa destos premios, el Madreñazu, foi a parar nesta edición al presidente Vicente Álvarez Areces. Na ceremonia va haber amás de la entrega mesmamente dicha un espaciu pa la música en directu que sedrá onde s’enxerte l’actuación del cantautor Pedru Pereira. Como ye vezu, nacabando la entrega de premios, la Xunta tien entamada una espicha na sidrería El Candasu na cai Sierra del Sueve. Papuntase a la espicha pue contactase nel corréu info@exunta.org o nel teléfonu 687 830 702. La xunta concede los Premios Andrés Solar a Felpeyu y Vicente Alvarez Areces 14 de xineru, 2007 0 FacebookTwitterPinterestEmail
Sociedá Ana Rosa Migoya y la obligatoriedá de la oficialidá by asturnet 9 de xineru, 2007 La Conseyera de Cultura, Ana Rosa Migoya, nel marcu d’una entrevista a el Diario El Comercio el pasáu domingu, amuesóse contraria a la Oficialidá “por suponer una obligación”. Dende’l Conceyu Abiertu pola Oficialidá afitábase que la única vía de sobreviviencia pal idioma ye la de la oficialidá. Asina mesmo dende la XPDLLA acalariábase que la única obligación, en casu d’oficialidá, correspondería-y a l’alministración y non a la ciudadanía. El domingu pasáu, nel marcu d’una entrevista al diariu El Comercio, la Conseyera de Cultura, Ana Rosa Migoya afirmaba que “la oficialidá del asturiano implica una obligación que nun tamos dispuestos a asumir”. La Xunta pola Defensa de la Llingua Asturiana y el Conceyu Abiertu pola Oficialidá respondieron a estes afirmaciones feches pola responsable de cultura del gobiernu asturianu. La XPDLLA afirma, nel so comunicáu, que “Dicir que la oficialidá supondría la obligación de conocer y usar lasturianu ye desconocer la llexislación en materia llingüística del Estáu, llexislación que namás obliga a conocer y usar el castellanu y non nenguna otra llingua de les comunidaes autónomes” afitando que les úniques obligaciones, nuna situación d’oficialidá, son les de l’alministración. Na entrevista a El Comercio la Conseyera afirmaba, a la entruga sobre la posición favorable d’Izquierda Xunida respeuto a la oficialidá del asturianu, qu’el so trabayu empobinábase a ganar les elecciones por mayoría absoluta. Sobre la cuestión llingüística reafitóse na postura del so partíu “nun somos partidarios de la oficialidá” afirmó la responsable de cultura. Pa la Xunta pola Defensa de la Llingua les pallabres d’Ana Rosa Migoya suponen el reflexu d’una “actitú reaccionaria en contra de la llingua asturiana”. La Conseyera refirióse a que s’amuesaba favorable a la llibertá d’usar l’idioma llibremente, “pero ensin obligación”, sobre esta cuestión la Xunta pola Defensa de la Llingua fai alcordanza d’una moción del Grupu Socialista nel Congresu de los Diputaos na que se define la oficialidá como “Algo muy sencillo, que cada ciudadano tiene la libertad de elegir y el derecho de usar el idioma oficial que le plazca” del Diariu de Sesiones de 14 de febreru de 2006. La Xunta pola Defensa de la Llingua entrúgase nel comunicáu sobre’l fomentu de la llingua asturiana, al que se refier la Conseyera, nel ente de comunicación audiovisual públicu asturianau, nel que la organización de defensa de los derechos llingüísticos considera esisten “prohibiciones al usu del asturianu”. Fernando Ornosa, portavoz del Conceyu Abiertu pola Oficialidá, dixo que “si Migoya considera que l’asturianu ye un patrimoniu tan importante, ¿por qué permite que tea discrimináu?”. Dende’l CAO atacáronse la “zarrazón y intransixencia” de la Conseyera de Cultura asturiana. Asina mesmo dende la plataforma d’asociaciones en sofitu a la oficialidá de la llingua na prósima reforma del Estatutu se facía la comparación con casu del Partíu Popular, que “ta amuesando una actitú muncho más dialogante”. La negativa a la Oficialidá del asturianu, fai que los responsables del CAO s’entruguen si “los asturianos somos diferentes a los demás”, en clara referencia al estatutus xurídicu del restu de llingües nel Estáu español. El portavoz del Cao, Fernando Ornosa, afitó que ye pernecesariu un consensu políticu na Xunta Xeneral que permita arbitrar el cambiu llegal afayadizu pa la sobrevivencia del idioma” estes pallabres facíense en rellación a que la única “vía que certifica’l futuru de la llingua ye la de la oficialidá”. Entrevista en el diariu El Comercio a Ana Rosa Migoya 9 de xineru, 2007 0 FacebookTwitterPinterestEmail
Sociedá Aplázase’l xuiciu en Siero escontra la “Pita” by asturnet 26 d'ochobre, 2006 La Xunta pola Defensa de la Llingua Asturiana concentró a les 13,30 hores delantre los Xulgaos de La Pola (Siero) a un centenar de presones que se manifestaren pola llibertá d’espresión. Seis miembros de la Xunta pola Defensa de la Llingua Asturiana diben ser xulgaos esti vienres en La Pola (Siero) depués de ser denunciaos por una concentración fecha’l 14 de xunu por mor de la inauguración d’un centru de salú en Llugones, al qu’asistía el presidente d’Asturies, pero la vista tuvo d’aplazase hasta’l vienres que vien por defeutos de forma nes citaciones, dao qu’un de los encausaos nun recibiere nin la citación pa esta vista nin pa la del 25 de setiembre. La concentración convocóse dientro de la campaña de la organización de defensa de los derechos llingüísticos pa denunciar la situación “d’acosu y de falta de llibertaes que sofren los y les falantes d’asturianu”. Depués de la concentración los activistes de la Xunta fueron identificaos y reteníos demientres dos hores pa depués ser denunciaos y recibir la citación xudicial. La Xunta considera qu’estes actuaciones son “intolerables”. “Los derechos de llibertá d’espresión y de crítica política son fundamentales en cualaquier democracia”. La Xunta camienta que’l gobiernu asturianu “ha correxir la so política de marxinación llingüística” y nun “criminalizar la vindicación” 26 d'ochobre, 2006 0 FacebookTwitterPinterestEmail
Sociedá Los actos del Día d’Asturies volvieron centrar el debate na reforma estatutaria by asturnet 10 de setiembre, 2006 Los actos de celebración del Día d’Asturies de los partíos políticos asturianos volvieron a centrar el debate na próxima reforma estatutaria y nes elecciones de mayu de 2007. Asina, el coordinador xeneral federal d’Izquierda Xunida, Gaspar Llamazares, metía priesa en Xixón pa la reforma del Estatutu d’Asturies porque, de retrasalu más, ‘les posibilidaes d’arrancar compromisos financieros y d’inversiones del Estáu van ser mui remotes’. Reforma que ye ‘un procesu trescendental’, como lu calificó’l presidente del Principáu, Vicente Álvarez Areces, nos actos oficiales organizaos en Nava. Pela so parte, el Bloque por Asturies avisó a IX dende La Pola L.lena de que ‘les aliances de cara a les próximes elecciones hai que faceles cuanto primero meyor’. El coordinador xeneral federal d’IX, Gaspar Llamazares, manifestó nel actu políticu organizáu pol so partíu en Xixón que lo más importante del procesu de reformes estatutaries ‘nun ye’l debate identitariu, sinón los compromisos económicos’, razón pola que llamó a afalar la situación n’Asturies porque, de retrasala más, ‘les posibilidaes d’arrancar compromisos financieros y d’inversiones del Estáu van ser mui remotes’. Sobre esti tema, Llamazares dixo que yera cuanto menos chocante que’l PP ‘nos sitios que gobierna súmase a les reformes ya inclusive fai bandera d’elles, mentes qu’equí niega’l pan y el sal a los asturianos’. Jesús Iglesias, coordinador xeneral d’IX n’Asturies, tachó tamien la postura de la FSA, que ‘n’otros territorios acepta mayor autogobiernu y la cooficialidá de les sos llingües, mentes qu’equí nun lo fai’. Dende Nava, el presidente del Principáu, Vicente Álvarez Areces, aseguraba que ‘somos profundamente asturianos y españoles’ y tamien señaló la necesidá ya importancia del debate sobre la reforma del Estutu Asturianu. ‘Asturies nun ha de quedar fuera d’un procesu trescendental’, dixo’l llíder socialista, quien mañana va defender nel Parlamentu asturianu la reforma estatutaria. Sin embargo, el Partíu Popular, pesie a les crítiques del restu de formaciones, sigue manteniendo que nun ye’l momentu pa facer un debate sobre la reforma del Estatutu n’Asturies y en boca del so presidente, Ovidio Sánchez, pidió que nun hubiere ‘priesa’ pa esti alderique, posponiendolu pa depues de les elecciones de 2007. Sobre estes elecciones autonómiques tamien xiró’l discursu del Bloque por Asturies que celebró’l Día d’Asturies en L.lena presentando al so candidatu a l’alcaldía del conceyu, Agripino Perez. El portavoz del Bloque, Rafael Palacios, mandó un mensaxe a IX sobre les aliances polítiques de cara a les elecciones, asegurando qu’han de facese ‘cuanto primero meyor’. L’actu l.lenizu tamien valió pa presentar al Bloque de les Mocedaes Asturianistes y al so portavoz, Hector Torre. Otros grupos políticos asturianos ficieron tamien la so propia celebración del Día d’Asturies. Asina, Unión Asturianista organizó un actu delantre del palaciu de Revillagigedo de Xixón nel que los sos presidentes, Xuan Xose Sánchez Vicente y Sergio Marques lleeron entrambos discuros pa facer depues una ofrenda floral ente la estatuta de Pelayo. YAndecha Astur llevó les sos reivindicaciones a la cai con una manifestación que salió al mediudía de la estación de la Renfe d’Uvieu. Pero tamien la Xunta pola Defensa de la Llingua Asturiana tuvo presentes na celebración oficial del Día d’Asturies en Nava. A lo llargo de tol programa festivu, asina como nes siguíes retresmisiones en directu de la TPA, pudo vese a la Pita pidiendo la oficialidá de la llingua asturiana mesmo que se pudieron lleer los carteles que teníen los sos militantes faciendo visible la reivindicación. 10 de setiembre, 2006 0 FacebookTwitterPinterestEmail
Fiestes Les fiestes del Carmen de Cangas dancen un Son d’Arriba reivindicativu by asturnet 13 de xunetu, 2006 Baxo’l lema ‘Ven a beil.lare la música del País’, l’agrupación de la Xunta pola Defensa de la Llingua Asturiana nel Suroccidente, en collaboración colos grupos Sulabarda, Vezos Astures, Son d’Arriba y La Ordaletsa, convida pa esti vienres día 14 de xunetu a les diez de la nueche a danzar un Son d’Arriba reivindicativu. El baille va tener llugar na Plaza Toreno de Cangas del Narcea. Les organizaciones encamienten a la xente de Cangas y a les munches persones que van tar esta fin de selmana nes fiestes d’El Carmen que participen nesti baille popular y reivindicativu. 13 de xunetu, 2006 0 FacebookTwitterPinterestEmail