Sociedá La Xunta pola Defensa de la Llingua Asturiana concede los Premios Andrés Solar by asturnet 3 de xineru, 2007 La Xunta pola Defensa de la Llingua Asturiana falló’l pasáu 18 d’avientu los ganadores de los Premios Andrés Solar correspondientes a 2006. El Pegoyu correspondió al grupu Felpeyu, “como reflexu y homenaxe a la creación musical n’asturianu”. El Madreñazu correspondió al presidente autonómicu Vicente Álvarez Areces “pola s trayectoria llamentable de despreciu y agresión constante al nuesu patrimoniu llingüísticu” Los Premios Andrés Solar concédense a les persones que más se destacaron na defensa de la normalización llingüística na so categoría positiva, el Pegoyu. Asina mesmo estos Premios conceden un “galardón”, el Madreñazu, a aquelles persones que se destacaron na so belixerancia y oposición a la normalización social del asturianu. La ceremonia d’entrega de los Premios Andrés Solar va facese’l sábadu 20 de xineru nel Salón d’Actos del Anitguu Institutu Xovellanos de Xixón. La Xunta pola Defensa de la Llingua Asturiana concedió’l Pegoyu al grupu Felpeyu, “como reflexu y homenaxe a la creación musical n’asturianu. Con esti premiu la Xunta pola Defensa de la Llingua “reconoz el llabor dundamental pa la normalización de la llingua asturiana que vienen faceiendo, en xeneral, les persones que trabayen nel ámbitu de la musica n’asturianu, y en particular, el grupu Felpeyu”. La Xunta reconoz el compromisu militante pa cola reivindicación llingüística amuesáu por Felpeyu, asina como la so disponibilidá pa collaborar y respaldar les campañes de la organización pro-derechos llingüísticos. El Madreñazu de los Premios Andrés Solar 2006 correspondió al presidente autonómicu, Vicente Álvarez Areces. Pal xuráu la trayectoria d’Álvarez Areces “ye llamentable” pola so actitú respectu a los derechos y al patrimoniu llingüísticu asturianu. El xuráu fizo mención a l’actitú “represiva y antidemocrática” pa coles persones implicaes na defensa de la llingua asturiana. 3 de xineru, 2007 0 FacebookTwitterPinterestEmail
Sociedá La Xunta pola Defensa de la Llingua Asturiana va facer cursos d’asturianu n’Uviéu y Cangas by asturnet 18 d'avientu, 2006 La Xunta pola Defensa de la Llingua Asturiana va poner dos cursos d’asturianu a partir del 27 d’avientu. El primer de los cursos ta entamáu pola agrupación del suroccidente, y se desenvolverá ente’l 27 y 28 d’avientu, tando puestu pol Académicu de la Llingua Asturiana Roberto González Quevedo. Asina mesmo la organización de defensa de los derechos de los asturiano-falantes abre’l plazu d’inscripción nel so cursu d’iniciu que va entamar el 22 de xineru. L’asociación de defensa de los derechos llingüísticos, Xunta pola Defensa de la Llingua Asturiana, abrió’l plazu d’inscripción nel so cursu d’asturianu básicu. El cursu ye de 60 hores y de tipu básciu, adaptáu a persones que de mano cuenten con pocos y mui pocos conocimientos d’asturianu. Sicasí ye bien completu y permite un bon nivel d’aprendizaxe. Los clase pondránse nos locales de Xunta pola Defensa de la Llingua a partir del llunes 22 de xineru. P’apuntase nel cursu d’iniciu se puede llamar al teléfonu 985229553 o univar un corréu electrónicu a uvieu@exunta.org . El cursu intensivu organizáu pola Xunta pola Defensa de la L.lingua nel Suroccidente entamará a les 10,30 hores del 28 d’avientu na Escuela de Xedré y correrá a cargu del académicu Roberto González Quevedo, amás la nueche del 28 d’avientu fadráse un filandón en casa Fonsiquín, p’apuntase a esti cursu hai que llamar al teléfonu 679908087. Xunta pola Defensa de la Llingua Asturiana 18 d'avientu, 2006 0 FacebookTwitterPinterestEmail
Sociedá La Xunta pola Defensa de la llingua del Suroccidente entama’l II Alcuentru d’Escritores n’asturianu occidental by asturnet 29 de payares, 2006 La Xunta pola Defensa de la Llingua Asturiana nel Suroccidente entama pa los díes 2 y 3 d’avientu’l so II Alcuentru d’Escritores n’Asturianu Occidental. Les sesiones del Alcuentru desenvolveránse nel Teatru Conde Toreno de Cangas. El filólogu, y miembru de la Xunta pola Defensa de la Llingua, Fernando Álvarez Balbuena va entamar los Alcuentros cola conferencia titulada “¿Yía normal escribir na variedá occidental de la l.lingua? Propuesta dunas pautas ortográficas integradoras ya suplementarias a la normativa oficial”, la ponencia esplora les posibilidaes que permite la normativa de l’Academia de la Llingua pa escribir na variante occidental del idioma. Vicente García Oliva falará sobre la historia de la lliteratura nel asturianu occidental nuna conferencia titulada “Nel principiu fue’l cuentu”. Hector García Xil, filólogu, espondrá la so conferencia sobre “La deturpación de la llingua en Cuentos del Sil”, nesta conferencia Hector Xil comentará los diferentes estilos ortográficos nesta monografía sobre los cuentos de la comarca del Sil. Darréu estes ponencies entamaran una riestra comunicaciones nes que participarán Francisco González y Naciu i Riguilón sobre “L’aventura del Cudoxu” y Tradición Oral y lliteratura”. Esti día fadráse un homenaxe La xornada del domingu entamará cola coles comunicaciones de Berto Álvarez Peña, del Conceyu d’Estudios Belenos, Vitorino García, xerente de “El rincón Cunqueiru” y la filóloga Iris Díaz Trancho qu’asoleyarán les sos comunicaciones pa dar darréu pasu a un alderique sobre “tradición oral, cultura popular y territorios na lliteratura n’asturianu occidental” que va moderar Fernando Álvarez Balbuena y que pondrán el peslle de les xornaes. 29 de payares, 2006 0 FacebookTwitterPinterestEmail
Sociedá La Xunta pola Defensa de la Llingua cellebra l’absolución de los 6 de Llugones by asturnet 13 de payares, 2006 La Xunta pola Defensa de la Llingua Asturiana presentó, esti vienres, la sentencia sobre’l xuiciu a los 6 militantes de la organización de defensa de los derechos llingüísticos. Na sentencia, como yá anunciare ASTURNEWS, absuelvese a los encausaos por entender que “Los fechos declaraos probaos nun son constitutivos de falta contra l’orde públicu prevista y penada nel artículu 633 del Códigu Penal.” La Xunta pola Defensa de la Llingua cellebró la sentencia, d’un xuiciu que “nunca debió entamar”. La sentencia, pa la XDLLA, confirma la so valoración d’un fechu qu’entienden “mui grave y preocupante”. L’asociación ciudadana considera qu’el Gobiernu asturianu ta intentando reprimir l’exerciciu a la crítica política y a la llibertá d’espresión. La Xunta considera que dende’l Gobiernu asturianu “nun se ta poniendo reparos en ciminalizar la reivindicación llingüística y en tratar como delicuentes a los ciudadanos que tán trabayando na defensa del asturianu”. Como amuesa d’estes afirmaciones la Xunta recordó qu’el Principáu personóse como acusación particular nel xuiciu cellebráu en La Pola (Siero). La Xunta pola Defensa de la Llingua Asturiana afirmó que nun tán dispuestos a renunciar a nengún tipu de campaña, cuando estes diséñense siempre dientro d’un marcu d’actuación “democráticu”, y entá menos cuando ye por presiones o abusos de poder. La Xunta pola Defensa de la Llingua recordó-y al gobiernu astruianu, y n’especial a Vicente Álvarez Areces, que la vía correcta pa evitar que traescienda a la opinión pública la so actitú belixerante contra la llingua asturiana ye “entaar polítiques que respeten el patrimoniu llingüísticu y los derechos de los falantes”. Pa finar la Xunta pide que nun “s’insita n’esta estratexa represiva, claramente fracasada y antidemocrática”. La pita nel escañu los acusaos 13 de payares, 2006 0 FacebookTwitterPinterestEmail
Sociedá La Xunta pola Defensa de la Llingua Asturiana posicionóse sobre les declaraciones de Javier Fernández. by asturnet 7 de payares, 2006 La Xunta pola Denfensa de la Llingua Asturiana considera, nun comunicáu de prensa, que les declaraciones de Javier Fernández, secretariu xeneral de la FSA-PSOE “suponen un pasu más na escapada de los dirixentes socialistes asturianos hacia les postures más acérrimes y centralistes” en cuantes a la cuestión llingüística. Pal colectivu de defensa de los derechos llingüísticos la relación que fizo’l cabezaleru de la FSA ente la defensa de la llingua y oficialidá col nacionalismu y la imposición nun ye entendible sobre manera cuando “esi mesmu partíu defende la oficialidá nos demás territorios billingües del estáu”. Pa la Xunta “l’intentu de confusión ente la protección qu’ellos defenden y la oficialidá que defendemos otros, busca distraer y engañar a la xente”. La Xunta nel comunicáu de prensa unviáu esti llunes siñala que tán “seguros de que’l Sr. Fernández tien de saber de sobrea que nun ye posible garantizar la sobrevivencia d’una llingua na nuesa sociedá si nun tien validez xurídica y s’iguala en derechos a les otres llingües oficiales. Sábelo bien porque los sos compañeros de partíu n’otres comunidaes defenden la oficialidá de les sos llingües”. El colectivu entrúgase’l porqué de que si Javier Fernández “diz querer tanto a la llingua” puede dexar que’l so usu “seya illegal y ensin validez xurídica”. La Xunta cita “pa vergoña del Sr. Fernández” la proposición non de llei presentada pol grupu parllamentariu socialista nel Congresu onde se destacaba “La protección e impulso de las lenguas propias de las diferentes Comunidades Autónomas en las que rige un régimen de cooficialidad lingüística no sólo no se ha producido en menoscabo de la lengua común, sino que ha generado una dinámica de convivencia lingüística… Los ciudadanos tienen derecho a usar, de acuerdo con su libre elección y con plena validez jurídica, cualquiera de las lenguas oficiales en todos los ámbitos y tipo de relación”. Pa la organización cívica esta proposición non de llei reflexa “lo que significá la oficialidá” sicasí “Asturies pa los dirixentes socialistes asturianos ye diferente” diz la Xunta Pola Defensa de la Llingua nel so comunicáu. Pa la Xunta’l “problema” de la FSA ye que tán faciendo de menos a los y les asturianes al nun considerar la so llingua al mesmu nivel que les demás. “Defenden esactamente lo contrario que defenden n’otres comunidaes y eso la xente sábelo”. La Xunta pola Defensa de la Llingua esplica que se tán negando derechos a una parte de la población d’Asturies cuando la FSA-PSOE ta abanderando bien de derechos pa toles minoríes y non el recorte. La Xunta, p’acabar, pide que la FSA s’axunte a la mayoría d’asturianos y asturianes que ven con normalidá la oficialidá. 7 de payares, 2006 0 FacebookTwitterPinterestEmail
Sociedá Xulguen a seis miembros de la Xunta pola defensa de la llingua tres manifestase con La Pita en Llugones. by asturnet 25 d'ochobre, 2006 La Xunta pola Defensa de la Llingua Asturiana convoca una concentranción pal vienres 27 d’ochobre a les 13,30 hores delantre los Xulgaos de La Pola (Siero) pola llibertá d’espresión Seis miembros de la Xunta pola Defensa de la Llingua Asturiana van ser xulgaos esti vienres en La Pola (Siero) depués de ser denunciaos por una concentración fecha’l 14 de xunu por mor de la inauguración d’un centru de salú en Llugones, al qu’asistía el presidente d’Asturies. La concentración convocóse dientro de la campaña de la organización de defensa de los derechos llingüísticos pa denunciar la situación “d’acosu y de falta de llibertaes que sofren los y les falantes d’asturianu”. Depués de la concentración los activistes de la Xunta fueron identificaos y reteníos demientres dos hores pa depués ser denunciaos y recibir la citación xudicial. La Xunta considera qu’estes actuaciones son “intolerables”. “Los derechos de llibertá d’espresión y de crítica política son fundamentales en cualaquier democracia”. La Xunta camienta que’l gobiernu asturianu “ha correxir la so política de marxinación llingüística” y nun “criminalizar la vindicación” espaciu web de la Xunta pola Defensa de la Llingua Asturiana 25 d'ochobre, 2006 0 FacebookTwitterPinterestEmail
Fiestes La Xunta pola Defensa de la Llingua Asturiana celebra’l Día d’Asturies con una espicha popular by asturnet 7 de setiembre, 2006 Como yá fixere l’añu pasáu, la Xunta pola Defensa de la Llingua Asturiana va entrar nel Día d’Asturies celebrando esta nueche una espicha puplar en La Casa Posafuelles. La espicha, que va empezar a partir de les nueve la nueche, va contar cola actuación de la bandina La Curuxa a partir de les once. 7 de setiembre, 2006 0 FacebookTwitterPinterestEmail
Sociedá Xulguen a 6 militantes de la Xunta pola Defensa de la Llingua por pidir la Oficialidá by asturnet 26 de xunetu, 2006 L’aición vindicativa, pola que van ser xulgaos, fízose’l 16 de xunu na inauguración del Centru de Salú de Llugones qu’inauguraba’l presidente Areces. La “pita” y dellos miembros de la organización de defensa de los derechos llingüísticos entamaron a reclamar la oficialidá cuando fueron reteníos durante una hora poles fuerces de seguridá estatales, pa facer la identificación de los militantes. La Xunta diz que “si al presidente Areces-y molesta que les crítiques tresciendan a la opinión pública, la via pa evitales nun ta na criminalización sinon na corrección de la política de marxinación llingüística que ta llevando alantre’l so gobiernu” La Xunta “quier denunciar questes actuaciones son contraries al exerciciu del derechu a la llibertá despresión y a la crítica política. Ye evidente questo, quen distintos graos llevamos careciendo dende va muncho tiempu, namás persigue callar les voces crítiques cola xestión desti gobiernu”. La Xunta pola Defensa de la Llingua afirma que pela vía xudicial nun van abandonar la denuncia pública de la situación de “marxinación y falta de derechos que carez la llingua asturiana y les persones falantes d’asturianu” Los militantes encausaos “van cuntar cola solidariedá y sofitu de la organización”. Más información en Xunta pola Defensa de la Llingu Asturiana 26 de xunetu, 2006 0 FacebookTwitterPinterestEmail
Sociedá La Xunta pola Defensa de la Llingua Asturiana acusa ‘d’hipócrita’ al Gobiernu asturianu na so defensa del multillingüismu by asturnet 18 de xunu, 2006 La pasada selmana, el Comite de les Rexones de la UE apoyó una propuesta del Gobiernu vascu, defendida por Andalucía, Asturies, Baleares, Canaries, Comunidá Valencia y Extremadura, na que se-y pidía al Parllamentu Europeu qu’autorizare l’usu na so totalidá de les llingües cooficiales d’España. Nun comunicáu unviáu a los medios, la Xunta pola Defensa de la Llingua Asturiana tachó ‘d’hipócrita’ la postura de los representantes asturianos que, defendiendo n’Europa’l multillingüísmu, n’Asturies siguen opiniendose a la oficialidá del asturianu. Los representantes de la Xunta pola Defensa de la Llingua Asturiana acusaron a los representantes institucionales d’Asturies n’Europa de ‘querer dar lleciones sobre defensa de la diversidá llingüística nel Comite Europeu de les Rexones al tiempu que n’Asturies mantienen una política activa de substitución llingüística y marxinación de la llingua asturiana’. Nel comunicáu mandáu a los medios d’información, la Xunta desíxe-y al Gobiernu asturianu que desplique ‘porque n’Europa defende’l derechu al usu del gallegu, catalán y euskera, mientres que n’Asturies defende, consiente, avala y apoya qu’a los asturianos y asturianes se nos niegue de contino’l derechu a usar l’asturianu’. 18 de xunu, 2006 0 FacebookTwitterPinterestEmail
Sociedá La Xunta pola Defensa de la Llingua convoca una concentración contra l’actitú del RIDEA by asturnet 8 de mayu, 2006 La Xunta pola Defensa de la Llingua Asturiana convoca una concentración pa mañana miercoles, día 10, a les siete la tarde ente la entrada del Auditoriu d’Uvieu, en protesta pola actitú del Real Institutu d’Estudios Asturianos, RIDEA, al prohibir la llectura n’asturianu d’una de les ponencies nel congresu qu’entama esti día. La Xunta tacha d’ ‘inaceptable qu’una entidá dependiente de la Conseyería de Cultura amuese una actitú tan reaccionaria y antiasturiana’, al tiempu que condena esta ‘nueva agresión a los nuesos derechos llingüísticos’. Cuando a ta a piques de cumplise un añu y mediu dende que’l Tribunal Superior de Xusticia d’Asturies revocare la retirada de la so llicencia de radio comercial, Radio Sele, col apoyu de la Xunta pola Defensa de la Llingua, convoca otra concentración pal prósimu día 19, a les siete la tarde, na cai Fruela d’Uvieu, en protesta pol bloqueu qu’esta emisora sufre per parte de l’alministración asturiana, que sigue ensin tramitar tala llincencia, consintiendo ‘qu’una persona vinculada al PSOE instale una emisora ensin llicencia de nenguna clase, nel dial que-y correspuende a Radio Sele”. 8 de mayu, 2006 0 FacebookTwitterPinterestEmail