Festival de Lorient Alba marca la diferencia de la veteranía nel Troféu Mc Crimmon con una experta interpretación by asturnet 6 d'agostu, 2010 Rubén Alba punxo la diferencia nel Mc Crimmon amosando lo granibles que son 10 años concursando en Lorient y lo mucho que dan dos Trofeos Macallan y tres victories nel Remis Ovalle. La cálida interpretativa de Alba ta nun nivel tan altu que ye bien difícil que se-y escape’l tercer Mc Crimmon, si nun fuere porque les formes de puntuación de los curaos d’esti tipu de concursos sobrepasen davezu la subxetividá pa allegase nun tarrén enferma complicáu de desplicar al profanu, ya inclusu al especialista. En tou casu, salvo una interpretación desaxeradamente espectacular d’Andrea Joglar, que tien teúnica pa ello y experiencia magar la so mocedá, Alba tendría de pelear Pol Mc Crimmon col caberu intérprete gallegu, depués de que’l profesor de gaita del Centru Gallegu de Barcelona, Raúl Lacilla, ficiera una bona interpretación, con tres agites estremaes, una pa cada pieza diferente, pero lloñe del altor al qu’esti sábado en Lorient llevó otra vuelta Rubén Alba a la gaita asturiana cola que tocó también la pieza bretona y la gallega. 6 d'agostu, 2010 0 FacebookTwitterPinterestEmail
Festival de Lorient Andrea Joglar cumplió pa coles espectatives by asturnet 6 d'agostu, 2010 Andrea Joglar cumplió pa coles espeutatives que se punxeren nella y cuajo una actuación como nun se veía en Lorient desde les dómines nes que Tejedor ablucaba a los más veteranos cola so primer participación nel Macallan siendo entá un neñu. Si nesti 2010 nun tuviera de competir cola técnica y la veteranía de Rubén Alba, Andrea sedría nesti 2010 la primer muyer n’algamar el McCrimmon. 6 d'agostu, 2010 0 FacebookTwitterPinterestEmail
Festival de Lorient Andrea lleva pa tierres asturianes el McCrimmon 2010 by asturnet 6 d'agostu, 2010 Andrea Joglar convirtióse esti sábado 7 dagostu de 2010 na primer muyer que ganal troféu pa solistes de gaita asturiana y gallega del festival, que lleva dende va unos años el nome de Mc Crimmon y quhai tiempo se nomara Macallan. Andrea algamól Troféu nuna dura competencia col veteranu Rubén Alba quamuesó una perfeición téunica inigualable, pero la espontaneidá que xune la gaitera asturiana a la so indudable calidá téúnica inclinó la balanza del xuráu a la so parte, penrriba también del so hermanu Rodrigo Joglar que quedó clasificáu en tercer llugar nel concursu de Lorient. Como yera d’esperar, Asturies algamó’l Troféu McCrimmon de 2010 de la man d’Andrea Joglar, que cuayó una perbona actuación, de magar lo valoratible d’un de mocedá pero también d’una calidá como nun había tiempo que se sintiera en Lorient. El segundu lugar algamolu Rubén Alba que se viera perxudicáu como dellos otros años pol formatu de xuráu del Concursu, lo que tampoco nun-y quita méritu a Andrea. Y el terceru foi pal asturianu Rodrigo Joglar. En cuartu llugar quedara clasificáu Pablo Dalama, mentantu que la quinta posición foi pa l’asturianu Jesús Fernández. Nos puestos restantes clasificáronse los siguientes gaiteros nesta posición: Jesús Sánchez, sestu, Raúl Lacilla, séptimu, y Bras García, octavu. 6 d'agostu, 2010 0 FacebookTwitterPinterestEmail
Música Verdasca presentó en Xixón el so discu “D’abéu” by asturnet 20 de xunu, 2010 Verdasca ufrió esti vienres nel Centru Municipal de L’Arena, en Xixón un copnciertu nel qu’amosó’l so repertoriu cola reellaboración de musica tradicional asturiana y composiciones propies del grupu. Verdasca vieno acabante presentar discu nuevu, “D’abéu”, onde faiu una propuesta dafechu acústica, basando la so intrumentación nel emplegu d’instrumentos tradicionales asturianos. En xunetu de 2007 espublizaron la so primer maqueta discográfica, compuesta por una selección de cuatro pieces del so repertoriu onde espeyen el trabayu que llevó a cabu el grupu durante esi primer añu de trabayu, asina como la propuesta musical que quier desendolcar. En agostu de 2007 formen parte de la Delegación Asturiana nel Festival Interceltique de Lorient, onde algamen el segundu puestu nel Trophée de Musique Celtique Cidrerie du Terroir. En 2008 algamen el primer premiu nel Concursu y Muestra de Folclor “Ciudá d’Uviéu”, troféu “Igor Medio y Carlos Redondo” de la modalidá de grupos de folk. En febreru de 2009 reciben el premiu AMAS como grupu revelación del añu 2008. A lo llargo d’esti mesmu añu, el grupu fizo diverses apariciones televisives na TPA (Televisión del Principáu de Asturies) en programes como Pieces, Nos o Camín de Cantares. Verdasca tien actuáo nuna montonera d’escenarios per toa Asturies, amás de visitar otros llugares del Estáu, como Alcobendas, Ourense o Barcelona, y tamién festivales nel extranxeru como’l Festival Intercélticu de Lorient na Bretaña Francesa o ‘l Festival Ethnosuoni y la Festa Internazional de la Zampogna de Scapoli, los dos n’Italia. 20 de xunu, 2010 0 FacebookTwitterPinterestEmail
Música Verdasca toca esti vienres nel Centru Municipal de L’Arena by asturnet 17 de xunu, 2010 Esti vienres, a partir de les 19:30 hores, la formación Verdasca va tocar nel Centru Municipal de L’Arena, en Xixón. El grupu, que basa’l so repertoriu na reellaboración de musica tradicional asturiana y composiciones propies del grupu, ta acabante presentar discu nuevu. En “D’abéu” la so propuesta ye dafechu acústica, basando la so intrumentación nel emplegu d’instrumentos tradicionales asturianos, como la gaita, el curdión diatónicu, el vigulín o les percusiones tradicionales, asina como otros instrumentos como la guitarra acústica o les percusiones llatines. En xunetu de 2007 espublicen la so primer maqueta discográfica, compuesta por una selección de cuatro pieces del so repertoriu onde espeyen el trabayu que llevó a cabu el grupu durante esi primer añu de trabayu, asina como la propuesta musical que quier desendolcar. En agostu de 2007 formen parte de la Delegación Asturiana nel Festival Interceltique de Lorient, onde algamen el segundu puestu nel Trophée de Musique Celtique Cidrerie du Terroir. En 2008 algamen el primer premiu nel Concursu y Muestra de Folclor “Ciudá d’Uviéu”, troféu “Igor Medio y Carlos Redondo” de la modalidá de grupos de folk. En febreru de 2009 reciben el premiu AMAS como grupu revelación del añu 2008. A lo llargo d’esti mesmu añu, el grupu fizo diverses apariciones televisives na TPA (Televisión del Principáu de Asturies) en programes como Pieces, Nos o Camín de Cantares. Verdasca tien actuáo nuna montonera d’escenarios per toa Asturies, amás de visitar otros llugares del Estáu, como Alcobendas, Ourense o Barcelona, y tamién festivales nel extranxeru como’l Festival Intercélticu de Lorient na Bretaña Francesa o ‘l Festival Ethnosuoni y la Festa Internazional de la Zampogna de Scapoli, los dos n’Italia. Entrevista a Verdasca n’Asturnews 17 de xunu, 2010 0 FacebookTwitterPinterestEmail
Entrevista de la selmana Dani Álvarez (Corquiéu): Quiximos dar un vuelcu fusionando los temes con instrumentos impropios a la nuesa música” by asturnet 14 de mayu, 2010 Corquiéu ta acabante sacar discu nuevu, el terceru desta formación, y nAsturnews falamos con ún de los sos miembros, Dani Álvarez, que toca nel grupu la xiblata travesera y les uilleann pipes dende 2006. Sicasí, Corquiéu entama la so actividá muncho enantess, ñaz en Ribeseya nel añu 1997 y dende entós llevó la música asturiana a decenes de festivales, y conciertos en tol Estáu y en países como Francia, Hungría, Chequia y Eslovaquia. De la so hestoria, del discu nuevu, y del futuru, falamos con ellos na Entrevista de la selmana. -¿Qué ufre de nuevo esti discu de Corquiéu? -La música de Corquiéu nun dexa de contener una calidá nos temes vocales gracies a la voz de Gema y esi tastu frescu y cañeru de los instrumentales, polo que dende’l mio puntu de vista pienso que’l grupu nun perdió esa identidá quamosó dende “La Barquera”. Sí, enfotámons muncho nesti discu en cudiar enforma la producción y que too sonara mui compacto y mui a un grupu que, pese a los cambios de formación que’l públicu seguidor pudo apreciar nestos caberos años (onde mincluyo), tien dos trabayos a les espaldes y con mui bonos resultaos. -Sícasí, nel discu cunten con collaboraciones de xente esterno que-y dan de dalguna manera un soníu nuevu… -Quiximos dar un vuelcu nesti discu fusionando los temes con otros instrumentos impropios a la nuesa música. Pa ello cuntamos con renomes de la música asturiana: Moi Suárez a la guitarra, Fredo González al pianu y voz, Rubén Bada na mandolina y banyu, Horacio A. García al contrabaxu, Miguel Herrero col sitar y fliscornu, Héctor Braga al violonchelu y Sergio Rodriguez col baxu llétricu y la co-producción. Xente que sabíemos que mos diba ufiertar esa frescura que necesitábemos nos temes. -Amás dediquen un tema a los músicos Ígor Medio y Carlos Redondo, supongo que ye un homenaxe mui sentíu, dalgo que sal del corazón -Había que facelo… Los miembros de Corquiéu somos grandes collacios al empar que siguidores de la estensa carrera de Felpeyu. Igor formó parte del trabayu de producción del anterior discu. Eso marcó un enantes y un dempués nel sentimientu de los mios compañeros. La lletra del cantar, na que Xandru Martino se llució una vegada más, dizlo too sobre’l bon facer que teníen. ¡N’alcordanza d’Igor y Carlos! -Les lletres del discu, son, como ye vezu, de Xandru Martino, ¿cómo componen: escribe y darréu ponen música, o ye un procesu nel que trabayen xuntos? -La manera de trabayar de Xandru siempre me pareció dalgo ablucante. Yo personalmente soy nefastu a la hora de escribir coses que rimen nun papel, por eso lo que me sorprende ye la rapidez cola que trabaya. A vegaes apaez polos ensayos con una mini grabadora, graba lo que tocamos y dámos-y unos parámetros o un tema del que falar, y al ensayu siguiente tenemos una lletra de les que faen hestoria nos conciertos de Corquiéu. Y remítome a les pruebes, cuando en dalgun conciertu presentando “Salia”, tocóme ablucar dende l’escenariu, viendo al públicu coriar a Gema… -Nel mes d’abril presentaron con gran ésitu nel Teatru Filarmónica d’Uviéu “Suaña”, ¿ónde vamos poder sentivos en directu a partir dagora? -Bono, taremos na foguera de San Xuan de Caravia per segundu añu consecutivu, el 26 de xunu, hai otra presentación oficial del discu, ónde sinón, en Ribeseya, el 17 de xunetu, xunto al grupu Vallarna, nel Festival 5.40 na Plaza Mayor de Xixón el 17 d’agostu y tán trabayándose xires por Bélxica, Italia y Portugal. -Tolos temes del discu son composiciones propies, sacante una La romería, ¿por qué esti cantar tradicional? -Escoyimos esti cantar porque mos paecía una idea perbona de tema pa da-y esi toque “Corquieil” que pensamos que-y pegaba bien. Nesti casu aplaudo a Rigu, el nuesu gaiteru, por esta idea y munches más que tuvo, pero en concretu con esti tema desmostró una vegada más que Corquiéu sigue na so más pura esencia treslladando los temes más míticos del repertoriu tradicional a los ritmos digamos “comerciales” de Corquiéu. -¿Ta notándose la crisis de la música nel folk, o quiciabes afecta menos la piratería qua la música más comercial? -La piratería nel folk pienso que tamién sestila, nun ye’l mío casu porque yo lo de casa suelo mercalo todo, de toos moos nun mos afecta tanto como a los artistes de nivel estatal, porque al nun ser una música de gran abanicu comercial, la ganancia en discos nun ye muy allá. Yo soi más partidariu de que m’escuchen pela rede y me llamen pa facer conciertos que realmente ye onde más partíu sacamos a la nuesa música. Tampoco descarto esa idea que deambula agora de comprar temes sueltos per internet, a fin de cuentes los CD’s van acabar siendo un soporte físicu de promoción. -¿Y los conciertos, salen menos en tiempu de crisis? -Sí, la crisis ta poniéndonos pelos suelos. Los músicos de la escena, falando ente nós, llegamos a la conclusión questi “escelentísimu gobiernu” si de daqué tien que quitar cuando se ve mal de presupuestu, ye en tolo que tien que ver con cultura. Colo que tamos viendo cada día más la decadencia masiva de les nueches celtes y demás eventos culturales. -¿Entós, nun sapoya a la música asturiana dende les instituciones? -Afortunadamente creo quhai más apoyu que fai unos años. Va entrando un poco más pel güeyu, de toes formes yá te digo, ye de lo primero de lo que recorten. -Falemos agora de la so carrera personal, meteórica dende bien pequeñu, yá que con 13 años queda segundu nel concursu McCallan del Intercélticu de Lorient, en 2009 algama un Premiu Amas, collabora con músicos como Victor Manuel, Amistades Peligrosas, El Sueño de Morfeo, etc. ¿qué-y queda por facer nel mundu de la música? -¡Munches coses! Soi de los que piensa que la carrera dun músicu ye una carrera de fondu y quen pasando los años tien que dir a más. Nun sé ya si a curtiu o a llargu plazu, pero llevo munchu tiempu pensando en sacar dalgo en solitario y por unes coses y otres toi dexando’l tiempu pasar. Dalgun día espero ver cumplise’l mio propiu “Suaña”. Páxina web del grupu 14 de mayu, 2010 0 FacebookTwitterPinterestEmail
Entrevista de la selmana Rodrigo Fernández Joglar (Verdasca): “Facemos música col envís de pasalo bien faciendo disfrutar a la xente” by asturnet 30 d'abril, 2010 Esti vienres na Entrevista de la selmana, Asturnews interésase por ún de los grupos folk asturianos más mozos, quayeri mesmu presentabal so primer discu na Feria Muestres de Xixón, Verdasca. El grupu surdió en 2006 de la xuntanza de músicos nuevos procedentes de la Escuela de Música de Llanera y la banda de gaites “La Raitana”, y dempués de más de cuatro años dactividá tienen muncho que cuntanos. Rodrigo Fernández Joglar, curdión diatónicu y coros del grupu, fala con nós de la trayectoria de la formación y del momentu que vivel folk asturianu. – Va pa cuatro años quapaez Verdasca nescena, ¿qué ufren pa diferenciase de los munchos grupos de folk quesisten anguaño? -L’estilu de música que facemos enmárcase dientro del folk acústicu asturianu d’influencia atlántica. Una de les diferencies que podríemos señalar con respeutu a otros grupos ye la introducción na reellaboración de la tonada asturiana, un xéneru entá pocu esplotáu no qu’al folk acústicu se refier. -Yá en 2007 espublicen el so primer trabayu, ¿camudó muncho la propuesta de vueso dende entós o yá teníen clarul camín a siguir? -La nuesa propuesta dende los anicios vien siendo una combinación de reellaboraciones de pieces y cantares tradicionales asturianos per un llau y los arranchos de nueves composiciones propies. Personalmente, creo qu’esa foi la propuesta d’esa primer maqueta y la que mantenemos anguaño nel discu. -Pesie a ser una formación tan moza, consiguieron importantes premios dientro dAsturies, comol primer premiu nel Concursu y Muestra de Folclor “Ciudá d’Uviéu”, y lAMAS como grupu revelación del añu 2008, ¿cómo sienten estos premios, afalen a siguir y esforciase o cuérresel peligru de créeselo demasiao? -Los premios y reconocencies siempres presten muncho y animen a siguir alantre, pero sabemos que ye perimportante tener en tou momentu los pies en suelu, trabayar día a día, con compromisu, modestia y ganes de facer les coses bien si se quieren algamar verdaderamente les metes fixaes, tanto na música como na vida en xeneral. Evidentemente, los concursos son una bona ferramienta a dase a conocer, perol verdaderu trabayu amuésase a diariu, en cada conciertu, en cada canción o en cada ensayu. -Y ye que los premios lleguen tamién del esterior, quedando, por exemplu, segundos nel Trophée de Musique Celtique Cidrerie du Terroir del Festival Intercélticu de Lorient, ¿sienten que presta la música asturiana fuera de les nueses llendes? -La participación cola delegación asturiana nel Festival de Lorient foi la nuesa primera salida al esterior, pero yá dende esí pudimos comprobar qu’al públicu foriatu-y gusta un montón la música asturiana. La nuesa esperiencia n’Italia en 2008 y 2009 foi tamién perpositiva nesi sen; la música asturiana gusta, y muncho, fuera les nuestres fronteres. -¿Qué tal respuenden los medios de comunicación asturiana, especialmente los públicos, miren pa la carrera de los grupos folk más mozos, como Verdasca? -La verdá ye que nun tenemos quexa pel momentu de la cobertura informativa que se fai de la nuesa actividá. Tuvimos entrevistes de prensa, radio y tamién dalguna aparición televisiva, anque sí ye verdá que la cobertura de les actividades culturales podría ser bastante más bayurosa. -Agora presenten discu nuevu, Dabéu, un nome que yá lo diz too, ¿ye polo tanto, esti, pensáu pa la folixa? -La intención que teníamos col nome yera la de trasmitir una idega de mocedá, frescura, folixa, que ye la intención que tenemos a la hora de facer la nuesa música: pasalo bien faciendo a la xente pasar un bon trechu. -El discu inclúi cantares tradicionales y dalgún nuevu, ¿cómo funcionen pa componer, failo unu de los miembros, dellos, una persona esterna…? -No tocante a los cantares, toos a excepción d’ún, “Entre ríos y entre soutos”, son melodíes tradicionales iguaes pol grupu. Les lletres son cuartetes tradicionales, na mayoría, si bien rescamplen les collaboraciones de los poetes Miguel Monteavaro, que nos escribió la lletra en gallego-asturiano pal tema antes nomáu, y Pablo Texón, con una lletra n’ayerán pal cantar “En cel.lero’l corazón”. -Ayeri mesmu presentaben esti discu nel ciclu “Músiques del sieglu XX” de CaxAstur, na Feria Muestres de Xixón, ¿qué tal acoyida tuvo? -El discu ta teniendo una acoyida perbona, sicasí, nun será hasta dientro d’una temporada cuando podamos facer una valoración real de la mesma. Lo que sí podemos dicir ye que tamos mui contentos del resultáu en directu. -¿Ónde vamos poder sentir a Verdasca nos meses vinientes? -De momentu, tenemos la presentación del discu en Posada de Llanera, el día 5 de xunu, y un par de conciertinos per Xixón, ún el día 18 de xunu nel Centru Municipal de L’Arena y otru el 26 de xunu nel Tendayu del Pueblu d’Asturies. La xente puede tar al tantu de les nueses feches al traviés de www.myspace.com/verdasca -Como gaiteru, ¿cómo vel panorama desti instrumentu? -Anguaño tamos viviendo los últimos coletazos del “boom” gaiteril de los años 90, cuando yo entamé a tocar la gaita, y habrá que ver cual ye la dirección que se toma col instrumentu. Personalmente, creo que tenemos una cuenta pendiente cola investigación nel desarrollu del instrumentu, tenemos instrumentos mui bonos, pero échense en falta más investigaciones pa meyorar l’instrumentu n’aspeutos acústicos, nueves tonalidades, etc. como se ta faciendo por exemplu, en Galicia. Lo deseable sería qu’esistiera n’Asturies una escuela de luthería d’instrumentos tradicionales que sirviera de plataforma pa toes estes cuestiones que comentamos. -¿Tán funcionando bien les escueles de música? -El llabor de les escueles de música n’Asturies ye perimportante, tanto a nivel de música tradicional como en xeneral, ufiertando la posibilidá de deprender a tocar un instrumentu na mayoría de conceyos asturianos. Nel casu de los instrumentos tradicionales, na mio opinión ta pernidio que de nun ser por elles, el relevu xeneracional, de los años 80 a l’actualidá, nun hubiera sido posible. Parezme tamién dignu de mención el llabor de la Escuela d’Asturianía pa formar monitores de baille, gaita y percusión nos distintos Centros Asturianos de tol mundu. -¿Y los estudios profesionales del Conservatoriu? -Nesi sen, por unes razones o por otres, tamos en pañales entovía. Anque la entrada de los estudios de gaita nel Conservatoriu foi un fechu perimportante y la culminación d’una reivindicación histórica no que al estatus profesional de los gaiteros se refier, tando por fin al mesmo nivel que los demás músicos, faen falta más obres de repertoriu,tamién hai que ver qué va a pasar con nós cuando finemos el Gráu Mediu, si va a haber un Superior, con qué característiques, qué opciones profesionales vamos tener los titulaos en gaita, etc. En cualquier casu, los estudios profesionales son una perbona oportunidá pa dar un saltu cualitativu importante en lo qu’a formación musical se refier nel panorama de la gaita asturiana, lo que namás puede apurrir coses positives nun futuru, asina que podemos tar contentos nesi sen. MySpace del grupu Verdasca 30 d'abril, 2010 0 FacebookTwitterPinterestEmail
Música Verdasca presenta discu nuevu na Feria Muestres de Xixón by asturnet 29 d'abril, 2010 La presentación de “D’abéu”, el nuevu discu de Verdasca, va tener llugar esti xueves a les 20:00 hores nel pabellón de CaxAstur de la Feria Muestres de Xixón. Nel mesmu, van poder sentise los nuevos temes desta formación moza que surde el mes de xineru de 2006 de la xuntanza d’ún grupu de músicos procedentes de la Escuela Municipal de Música de Llanera y la banda de gaites “La Raitana”. Mañana vienres, la formación va ser amás protagonista de la Entrevista de la selmana nAsturnews. Basen el so repertoriu na reellaboración de musica tradicional asturiana y composiciones propies del grupu. La so propuesta ye dafechu acústica, basando la so intrumentación nel emplegu d’instrumentos tradicionales asturianos, como la gaita, el curdión diatónicu, el vigulín o les percusiones tradicionales, asina como otros instrumentos como la guitarra acústica o les percusiones llatines. En xunetu de 2007 espublicen la so primer maqueta discográfica, compuesta por una selección de cuatro pieces del so repertoriu onde espeyen el trabayu que llevó a cabu el grupu durante esi primer añu de trabayu, asina como la propuesta musical que quier desendolcar. En agostu de 2007 formen parte de la Delegación Asturiana nel Festival Interceltique de Lorient, onde algamen el segundu puestu nel Trophée de Musique Celtique Cidrerie du Terroir. En 2008 algamen el primer premiu nel Concursu y Muestra de Folclor “Ciudá d’Uviéu”, troféu “Igor Medio y Carlos Redondo” de la modalidá de grupos de folk. En febreru de 2009 reciben el premiu AMAS como grupu revelación del añu 2008. A lo llargo d’esti mesmu añu, el grupu fizo diverses apariciones televisives na TPA (Televisión del Principáu de Asturies) en programes como Pieces, Nos o Camín de Cantares. Verdasca tien actuáo nuna montonera d’escenarios per toa Asturies, amás de visitar otros llugares d’España, como Alcobendas, Ourense o Barcelona, y tamién festivales nel extranxeru como’l Festival Intercélticu de Lorient na Bretaña Francesa o ‘l Festival Ethnosuoni y la Festa Internazional de la Zampogna de Scapoli, los dos n’Italia. 29 d'abril, 2010 0 FacebookTwitterPinterestEmail
Música Fred Morrison torna a Mieres con Caxastur by asturnet 19 de marzu, 2010 La Obra Social de Caxastur presenta al gaiteru escocés Fred Morrison, que va actuar en Mieres dientro del ciclu de Música del Sieglu XX de Caxastur esti vienres nel Centru Cultural de Jerónimo Ibrán 10, a les 20.00 hores. Fred Morrison ta consideráu’l meyor intérprete de gaita escocesa, algo que vien respondío por non yá la crítica especializada y los sos esitosos conciertos, sinón por ganar siete veces el troféu Macallan nel Festival de Lorient y por crear la border pipe, cruce ente la gaita escocesa (highland bagpipe) y l’irlandesa (uillean pipe). 19 de marzu, 2010 0 FacebookTwitterPinterestEmail
Entrevista de la selmana Miguel Ánxel (Xera): El Premiu ta permitiéndonos una presencia mediática cola que nun cuntábemos” by asturnet 5 de marzu, 2010 El grupu Xera consiguió facese va menos de dos selmanes col Premiu al Meyor Cantar 2010 con Tierra, un tema que va representar a Asturies nel Liet Internacional, festival de la canción en llingües minoritaries, questi añu va celebrase nEscocia. Falamos na Entrevista de la selmana con Miguel Ánxel, miembru del grupu, pa conocer les primeres sensaciones y les sos perspectives dempués desti importante premiu que concede la Conseyería de Cultura y col que superaron a grupos como Dixebra, Misiva, Brandal y Lafu&Rebeca. -¿Esperaben facese con esti premiu, en viendo la bona collecha musical nasturianu desti añu? -Ensin valorar n’escesu nin menospreciar el creitu que pue tener esti premiu, pa nós ye un trunfu col que nun contáremos. Somos sabedores polos años de vida de Xera, que marcamos una diferencia non solo na propuesta musical, sinón que los diferentes plantegamientos que configuren el proyectu nun atopen el so sitiu dientro de los círculos musicales tradicionales. Asina que teniendo en cuenta qu’hebo más d’un centenar de propuestes na primer fase del concursu, que d’estes la mayoría taben sovencionaes pola Conseyería de Cultura, qu’asoleyamos el trabayu al traviés d’una llicencia llibre y lo que cuesta encaxar la propuesta de nueso tanto nel folk como na lletrónica, considerámonos afortunaos dafechu porque l’alministración ponga a “Tierra” a l’altor de meyor cantar. -Amás, la so música calificóse como la propuesta más arriesgada del Premiu, ¿foi esa orixinalidá la clave pa ganar? -Nun sabemos los criterios escoyios pol xuráu pa otorgar la payarina. Dende Xera la creencia no que facemos ye daqué incuestionable. Pa ser sinceru desque naciere “Tierra” considerábemoslu’l meyor cantar independientemente que dalguién lu reconociere oficialmente col gallardón. Lo que si queremos ye da-yos la norabona a los grupos finalistes. Foi mui candial y digno compartir l’actu con ellos y elles. -¿Cómo lo celebraron, recibieron munches felicitaciones? -Lo más valoratible pa nós ye compartir la gayola cola xente más averao a la nuesa vida. Les families, les amistaes y los nuesos vecinos y vecines son más conscientes de la importancia qu’esti premiu pue tener pal puxu de la propuesta de nueso. Ven, comparten y respeten l’esfuerciu invertíu de toos estos años y sienten un fonderu agradecimientu por que seya reconocíu institucionalmente. Esto enllénanos d’arguyu. Per otru llau, l’impactu mediáticu que ta teniendo l’algame d’esti premiu ye daqué a lo que Xera nunca tuviere l’accesu que precisare. Agora ye noticia y nestos tiempos nos que mos tocó vivir sabemos que si nun tas nos medios, paez que nun esistes. Vivimos un momentu melgueru enforma. -¿Qué-yos paez la iniciativa desti premiu, ye un sofitu importante pa los grupos? -Enxamás entramos a valorar la repercusión d’esti premiu. Siguimos les ediciones anteriores pero dende una perspectiva cola cual nun mos sentiémos identificaos. Agora que presenciamos tol procesu, sentimos que ye una aportación más ente toles propuestes afayadices pal lentu procesu de normalización llingüísticu. Viendo’l nivel de los cantares finalistes y de les bones propuestes que quedaren fuera, nos próximos años de xuru que vamos presenciar una bayura de bones creaciones na música asturiana. -¿Qué esperen desti gallardón nel añu de promoción que tienen per delantre? -De momentu tamos percontentos cola repercusión mediática que va desendolcándose al rodiu d’esti premiu. Qu’apaecieren tan bones crítiques nos principales medios de comunicación del país ye un sofitu perimportante pa espardir el mensaxe a xente nuevo. Naguamos por qu’esto seya bono pa poder algamar l’accesu a más conciertos onde poder ufierta-yos el nuesu directu. -De toes formes, anque esti yel primer premiu que consiguen, participaron yá en numerosos festivales, ¿ye una bona forma de promocionase pa los grupos que nun tán en grandes compañíes musicales? -Ye verdá. Xera participó en dellos concursos, na so mayoría rellacionaos col Folk. Ellí onde tocamos: Getxo, Ortigueira, Lorient, Etnosur… siempre hebo una bona acoyida, pero enxamás algamamos nengún de los premios a los qu’optábemos. La “orixinalidá” de Xera (pallabra cola que dalgunes vegaes se valoró la propuesta) nun paez qu’encaxe bien en dalgunos círculos del folk. Nun ye ánimu de menospreciar a naide pero no que cinca a los concursos alcontramos de too. Sicasí amosar el proyeutu nos directos ye la meyor forma de promoción que cualesquier grupu pue facer, más cuando carez de sofitu discográficu. La respuesta’l públicu siempres foi prestosa y gratificante enforma pa nós. -Y esi viaxe a Escocia pa participar nel Liet Internacional, ¿van dir col oxetivu de ganar o lo importante ye participar? -Pregunta comprometía (rises). Si contesto que vamos cola fin de ganar podemos pecar de prepotentes y grandonos. Si la rempuesta ye que vamos a participar nun toi diciéndote tola verdá. Digamos qu’esa participación vamos plantegala como una más dientru de les esperiencies de directu de Xera. Siempres damos tolo de nós y esta nun va ser una escepción. Dalguna sorpresa reservaremos pa esi día, pero vamos tener qu’esperar a que llegue. -Dendel grupu trabayen siempres embaxo llicencies llibres Creative Commons y pola autoedición, ¿qué opinen de les polémiques actuaciones de la SGAE? -El deséu de Xera dende los anicios yera poder llegar col so mensaxe a cualesquier sitiu del mundu. Creemos nel drechu inalienable de les persones pa col accesu a la cultura y sentímonos comprometíos dafechu nesti sen. Hai unos años paecía que si nun teníes los medios o si nun rexistrabes el to trabayu con determinaes entidaes xestores nun había mena d’espublizar un discu. Desque internet entró a formar parte de la comunicación global, l’accesu a la información permitió comtemplar otres alternatives, ente les cuales, descubrimos la Llicencia Creatives Commons cola que mos acoyenos a un marcu llegal no que cinca a la xestión de los drechos de la obra, y mos permite configurala de tal mena que la ufiertamos llibremente al públicu. Les maniobres que cualesquier entidá privao faiga p’amoldiar y aprovechase de les lleis d’un estáu abúltenme un insultu pal pueblu. Dende llueu nun creo qu´estes polémiques reflexaes a diariu nos medios sirvan como estratexa pal sofitu de la cultura. La xente nun ye fato y sabe qu’hai un gran pastel que la industria y los representantes de la “llegalidá cultural” se reparten demientres mos tachen de delincuentes y pirates. Díes atrás, asoleyaben nel diariu Times un estudiu onde reflexaben el puxu nos beneficios de los músicos qu’enfoquen el so trabayu al directu en detrimentu de les ganancies de la industria discográfica. Son delles variables que medren y mengüen proporcionalmente y que reflexen que munchos de les alegatos manifestaos pierdan cualesquier tipu d’argumentu válidu. -Amás del tema ganador Tierra, ¿con qué tipu de música podemos atopanos nel so discu últimu? -Tierra ye’l cantar homónimu que-y da´l nome al discu. Esti compónenlu diez temes. La so sucesión configura una trama argumental concreta. L’argumentu de dicha trama céntrase na interacción de la persona pa col Universu analizando los efectos y cambios qu’esta rellación provoca n’ella. Xera intenta esperimentar coles emociones derivaes del discursu individual y el camín d’emociones esperimentaes poles persones na gueta del equilibriu y la plenitú. La diferencia argumental col trabayu anterior (Lliendes-2006) céntrase nel enfotu na Tierra-Gaia como motivadora de les emociones humanes, sirviendo la música como xuntura ente lo tanxible (tierra-humanidá) y lo intanxible (Gaia-emociones) Como non, el mensaxe modifica’l mediu nel qu’esti ha d’adaptase, de la meyor mena posible. Por tantu, los soníos, les testures sintétiques entamaes en Lliendes, poténciense y arriquécense en Tierra, cola incorporación de nuevos timbres acústicos (la zanfona, por exemplu); asina como la creación d’estremaos soníos de percusión basaos na “deformación de soníos” que busquen afondar nel dramatismu enfotáu na simbiosis fuercia-ternura y que define l’orixe musical de Xera. -¿Cuándo vamos poder velos tocando nAsturies nos próximos meses? -En rellación col premiu, n’Asturies tenemos confirmao dar un conciertu nos actos de celebración del día’l país. Trabayamos pa que nun seya l’únicu y naguamos por ver l’acoyida de la xente. -¿Qué proyectos tienen pal futuru? -De momentu, Tierra sigue siendo la recién ñacida de Xera. Tenemos que cuidala y mimala muncho. Nun sólo tamos falando del trabayu que podemos sentir nel CD, sinón que tol discursu sonoru plantegámoslu pal desenrrollu en diferentes contestos. Les persones que tuvieron na presentación de La Llaboral el pasáu setiembre pudieron ver una amuesa d’ello. El proyectu ye bastante ambiciosu al empar que motivador pa nós y nos próximos meses vamos ver el resultáu de tol trabayu fechu con tantu ciñu. Tierra ye presente y marcará’l camín del futuru de Xera. Más información de Xera 5 de marzu, 2010 0 FacebookTwitterPinterestEmail