ComunicaciónLliteraturaMúsicaPolíticaSociedá El mundu la cultura firma un manifiestu pa que la RTPA preste atención a lo asturiano by redacción asturnews 24 de setiembre, 2020 Escritores, músicos, editores, promotores… y hasta más de 100 personalidaes vinculaes en xeneral a la cultura asturiana firmen un manifiestu, asoleyáu esti xuveve4s, onde reclamen mayor y meyor atención nos medios de comunicación públicos y piden una presencia digna, global y permanente de la cultura asturiana na RTPA. Siguir lleendo 24 de setiembre, 2020 0 FacebookTwitterPinterestEmail
ComunicaciónConvocatoriesEducaciónSociedá ‘Agora’ y ‘Agora ye’l momentu’ van llamar a la manifestación pola oficialidá by redacción asturnews 17 d'abril, 2018 Los cancios ‘Agora’ y ‘Agora ye’l momentu’ van llamar a la participación na manifestación pola oficialidá, que’l 21 d’abril va tar amenizada por dos bandones de gaites, un grupu de pandereteres, una batucada y un soundsysten. Siguir lleendo 17 d'abril, 2018 0 FacebookTwitterPinterestEmail
LliteraturaSociedá Iniciativa pol Asturianu llamenta la muerte del poeta Pablo Ardisana by redacción asturnews 3 d'abril, 2017 Na madrugada del domingu al llunes finaba Pablo Ardisana, poeta n’asturianu consideráu ente los contemporáneos de más calidá, con obres como Armonía d’anxélica sirena (1986) y Azul mirar d’amor (1989) y esti llunes delles organizaciones de defensa del idioma, con Iniciativa pol Asturianu en primer llugar llamentaron la noticia. Siguir lleendo 3 d'abril, 2017 0 FacebookTwitterPinterestEmail
Música “Aire quintetu” actúa’l sábadu 23 na Escuela del Llacín by asturnet 14 de mayu, 2015 El próximu sábadu 23 de mayu a les 20 hores va tener llugar na Escuela Municipal de Música Tradicional de Llanes un Conciertu del Grupu Aire Quintetu, dientru de los ciclos de Folk de Cámara 2015 entamaos nesa Escuela Municipal de Música tradicional, que tres el exito del pasáu añu continúen con importantes músicos y grupos del folk y de la música tradicional asturiana ya internacional. Esta formación so la dirección del Maestru Jacobo de Miguel afonda na tradición asturiana dende la perspectiva de cantares y melodias instrumentales d’acordión diatónicu, dotándoles d’una harmonía actual , que-y da un nuevu sabor con ciertu calter improvisatoriu. Aire Quintetu trata de xuntar les conocencies y esperiencia musical de los mesmos miembros en diversos campos. Parte de la esencia tradicional del acordión diatónicu de Xuan Nel Expósito, xuntu col Bouzouki de Elias García. Dambos provenientes de la música tradicional y Folk de grupos como Felpeyu, Llan de Cubel o Tuenda. A ellos xunese la maestría del percusionista Fernando Arias y l’amplia y esperimentada carrera dientro del Jazz de la mano de la contrabaxista Mapi Quintana. Xuniendo finalmente l’aire fresco de l’harmonía y el virtuosismu del pianista Jacobo de Miguel. Presentando asina un nuevu conceutu jazz-folk. La idea d’esta formación , naz pola grabación que se realizó del discu Enrite a finales del añu 2012, trabayu que se vio reconocíu por crítica y públicu , quedando finalista a meyor cantar n’asturianu 2012 y llogrando por reconocencia popular el Premiu AMES 2012 a meyor discu folk del añu. Esti conciertu forma parte de Los ciclos de Folk de Cámara 2015 entamaos na Escuela Municipal de Música tradicional de Llanes, que tres el exito del pasáu añu continúenn con importantes músicos y grupos del folk y de la música tradicional asturiana ya internacional. Estos ciclos formen parte del conxuntu de más de cincuenta actividaes que fuera del cursu ordinariu entama la Escuela Llacín, La Banda Gaites Llacín y el Conceyu de Llanes pa 2015. 14 de mayu, 2015 0 FacebookTwitterPinterestEmail
Música Elías García y Mapi Quintana asoleyen “Severina” by asturnet 26 de mayu, 2014 El dúu asturianu fomáu pola cantante Mapi Quintana (Blima, Aire) y el bouzoukista Elías García (Llan de Cubel, Tuenda) espublicen, el prósimu día 1 de Xunu, la so primer referencia discográfica: “Severina”. Dempués d’un periodu de descubrimientu y selección de canciones tradicionales recoyíes nel conceyu L.lena, Elías García y Mapi Quintana entamen a estructurar ya arreglar, nel mes de Mayu de 2012, un repertoriu basáu nel material recoyíu, na búsqueda d’un nuevu contestu estéticu pa eses melodíes tradicionales. Al traviés de progresiones armóniques heredaes del jazz y la música europea del sieglu XX, amás de la improvisación ya una aprosimación fresca y novedosa al indie-jazz más contemporáneu, Mapi y Elías consiguen xenerar una nueva ya enriquecúa atmósfera sonora, qu’ofrez nueves perspectives de la música tradicional asturiana na que se basa. Frutu d’esti trabayu, el dúu rexistra, en Payares de 2013, 9 temes grabáos en directu. baxo’l títulu “Severina”. El discu dixital ya ta disponible al traviés del siguiente enllaz, onde podéis escuchalu al completu, de forma totalmente gratuita: http://quintanaygarcia.bandcamp.com. Asimesmo, adelantámosvos que’l conciertu-presentación de “Severina” tendrá llugar nel Teatru Vital Aza (La Pola – Conceyu L.lena) el prósimu día 22 de Xunu, a les 19.30h [entráes prósimamente a la venta] El discu pue escuchase de baldre na web 26 de mayu, 2014 0 FacebookTwitterPinterestEmail
Música Capercaillie repitió conciertu tres años depués en Lorient by asturnet 9 d'agostu, 2013 Capercaillie torna a Lorient cada tres años que suelen facese llargos pa los seguidores que tienen equí que son munchos. En 2010, facía 3 años que Capercaillie nun pasaben por Lorient y agora en 2013 vuelve paecer que foi ayeri cuando lo ficieron. La misma fuercia, la mesma calidá, la mesma intensidá y la mesma dedicación, con una plantel d’invitaos enforma interesante como siempre y un públicu que persabe agradecer detalles como los que se-y ufrieron na nueche del xueves en Lorient, depués de que Llan de Cubel ficiera de aperitivu. Karen Matheson tornó a brillar otra vuelta cola so personalidá perconocida, pero los años nun pasen de baldre, magar la so voz siga como siempre y esta vegada notóse un pocu más qu’hai tres años. Los movimientos y les transiciones son más lentes, ensin dinamismu y l’escenariu faise enforma más grande. Donald Shaw sigue faciendo del curdión una caxa máxica y Charlie McKerron fai col vigulín maravilles . Un conciertu de más d’una hora y media, con Llan de Cubelde teloneros, nun pue ser sinon una nueche inolvidable, como la fuere la del xueves nel Espace Marine de Lorient. Una nueche que tendrá de facese esperar más de tres años en Lorient, a nun ser que la producción del grupu amuese novedaes que, pel momentu, nun son a albidrase. 9 d'agostu, 2013 0 FacebookTwitterPinterestEmail
Música Tuenda, Hevia Trío y Llariegu: Asturies na constelación Celta by asturnet 6 d'agostu, 2013 Yá se palpaba nel ambiente que la d’esti 2013 diba ser verdaderamente la Gran Nueche d’Asturies, pero nengún profesional o artista de cuantos componen la delegación asturiana podía imaxinar que’l prestu algamaría les cotes qu’amosábamos entrada la madrugada del martes 6 d’agostu. Y pa abrir esa nueche máxica de realcuentru cola más pura esencia de lo que Lorient significa pal mundu de la música y la cultura popular asturiana dende la Transición teníamos al meyor introductor posible: Tuenda. Una formación que cunta con dos firmes soportes de lo que foi l’andamiaxe musical del folk n’Asturies: Elías García, miembru fundador del míticu Llan de Cubel, Pepín de Muñalén (Pepín Menéndez) de La Bandinal Tombu y Xosé Ambás, fundador de Narba y auténticu animador de la escena musical tradicional. La capacidá comunicativa de Ambás, xunío al rigor musical de Elías y Pepín, componen una ufierta fácilmente digerible pa cualquier tipu de públicu tratáu na música popular, inda cuando namái sía dende una perspectiva sentimental. Y como yá fixeren nel montaxe La voz de la tierra col que se abría la participación asturiana nel Gran Teatru de Lorient el sábadu, supieron conectar al momentu col públicu y faer una propuesta sele y participativo allegando al so repertoriu más trabayáu. Una pequena ayuda del grupu Xeitu danciando alredor del escenariu ponía la guinda a lo que nun yera sinón un estraordinariu aperitivu de la Gran Nueche de l’Asturianía en Lorient. Hevia: 25 años dempués Sí. Tuvieron que pasar 25 año pero mereció, y enforma, la pena. Porque l’espectáculu qu’ufiertaron na Gran Nueche d’Asturies tantu Hevia Tríu como la Banda de Gaites Llariegu asitiara a años lluz de los seles intentos d’hai un cuartu de sieglu, cuando Asturies entamó a ufiertar propuestes na escena internacional del folk al traviés del festival intercélticu de Lorient, con más desnudez que vestimienta de gala como la que s’amosó esti llunes en Lorient. Na Gran Nueche de Asturies, nel Espace Marine de Lorient, Hevia Tríu y Llariegu dieron una bona amuesa de la evolución incesante que tuvo la música tradicional asturiana y la so adaptabilidá y maridaxe con tou tipu de ritmos y cultures, de les tradicionales con raigañu más céltiques a les populares con ritmos más simples y comerciales. Hevia Tríu empecipió col so soníu sólidu l’actuación, pero bien ceo dió nicios de que la nueche diba ser perespecial. El tríu que componen José Ángel, la so hermana María José y la pianista Dina Majada fai una propuesta bien equilibrada, perfectamente afecha al planteamientu del conciertu na carpa principal de Lorient: casi dos mil persones sentaes y sollertes, en llugar d’un espaciu abiertu pa baillar como suel n’ocasiones plantegase esti tipu de conciertos. L’apaición na escena de propuestes de Edith Piaf, ritmos brasileños, compases bretones y solos de tambor tradicional asturianu, envolubráu por María José en vestimientes bretones y escoceses pa mayor espectacularidá yá abarruntaben la escepcionalidá del conciertu. Pero lo meyor llegó cuando Hevia, que celebraba los 76 años del so padre col “cumpleaños feliz” a la gaita, demostraba que con ella pue facese tolo qu’un bon gaiteru se proponga: hasta tresformala vía electrónica nun acordión diatónicu pa interpretar “Vueltes” o nel summum de la maestría que yá-y conocemos convertir la gaita nuna guitarra ya interpretar en casi imposible “Asturies” de Isaac Albéniz. Una execución d’esti “Asturies” de Albeniz nerviosa nel empiezu, arriesgada al minutu d’empecipiase y perfecta nel ecuador de la interpretación, que punxo al públicu en pié nun sentíu y emocionante tributu al qu’Hevia namái pudo responder cola humildá y l’alma que lu caractericen… Y un rellumu tenue nos güeyos que nos fixo recordar les palabres de fai 25 años de José Angel. Que nos fixo recordar qu’en Lorient un asturianu siéntese más asturianu si cabo qu’en cualesquier otru llugar del mundu, Asturies incluyida. Y Llariegu pa faenos saltar pel aire Y si la emoción nun fuera abonda con Hevia Tríu, l’espectáculu de la Banda Llariegu que yá tuvo una primer esposición en La Llaboral de Xixón, atopó nel Espace Marine el so llugar aparente pa consiguir una nueche memorable. La Banda consiguió sacar lo meyor de Kepa Junquera na primer parte del so espectáculu o de Héctor Braga nel ecuador del mesmu y xubió adulces de tonu cuando empezó a proponer viaxes a otros ritmos y a otros maridaxes instrumentales alloñaos del acordión y la música tradicional. El so popular poutpurri d’ésitos musicales de les últimes décades con “Gloria” como exa central y la so adaptación al estilu de les Big Band americanes col aprovechamientu máximu d’una potente sección de metal nun anduvo lloñe de la perfección. Como tampoco lo fizo la percusión, con una batería inmensa realzando cada minutu de la última parte del conciertu. Conciertu con bises esixíos más que pidíos por un públicu exultante que dificilmente va escaecer que Asturies superó con matrícula la so presencia nel añu de la crisis. 6 d'agostu, 2013 0 FacebookTwitterPinterestEmail
Música Taranus gana’l Premiu al Meyor Cantar y representará al asturianu nel Festival Liet by asturnet 4 de marzu, 2013 La gala celebrada esti sábadu nel teatru de La Llaboral de Xixón, y retresmitida en diferío na TPA, cuntó con una asistencia baxa en comparanza cola rexistrada nel Festival Liet celebráu nel mesmu teatru a finales de 2012. La única incidencia xurdió cuando al salir la Directora Xeneral de Política Llingüística a dicir unes pallabres, el públicu entamó a pidir la oficialidá del asturianu, dexándo-y darréu terminar el so discursu. Cinco cantaraes competíen por esti Premiu al Meyor Cantar qu’acabó siendo pa Taranus por “Ensin ti”, con lletra de Diego Díaz Martino. Esti va ser por tantu’l representante nel Festival Liet de llingües minoritaries que va celebrase anguaño en Córcega. Taranus Col nome del dios celta preséntase esta banda xixonesa nacida nel 2009, pionera nAsturies de la fusión del folk col metal; xustamente esa ye la so característica fundamental, la simbiosis ente los soníos seles de los instrumentos acústicos (gaita y flauta sobre manera) y los más duros. Vinieron a enllenar un furacu na escena musical asturiana, al ser los únicos representantes duna tendencia que nel restu dEuropa tien bien de bandes, con nomes reconocíos polos sos siguidores. Taranus define la so música como dark-folk, una especie de cruz ente Llan de Cubel y Manowar, onde nun falten los ritmos pesaos y duros con pasaxes calmos y tiempos medios. Depués destos años, grabaron el primer discu, de títulu homónimu, con once pieces mui representatives del so estilu, y onde sobresal la collaboración de la sopranu Susana Mortem, que-y da una dimensión nueva a la música que faen. Temáticamente, les lletres van de les cuestiones sociales a les de calter mitolóxicu. Ensin ti 4 de marzu, 2013 0 FacebookTwitterPinterestEmail
Música Cultura asoleya un discu con poemes de Mánfer de la Llera musicaos by asturnet 12 de mayu, 2011 La Conseyería de Cultura del Gobiernu d’Asturies asoleyó, coincidiendo cola Selmana de les Lletres Asturianes, un discu tituláu 13 X Mánfer, que tien como oxetivu recuperar parte de la obra poética del escritor llangreanu Manuel d’Andrés Fernández, Mánfer de la Llera. La discográfica Ámbitu-LAguañaz preparó esta edición na que participen trece grupos y artistes adaptando poemes del autor de Ciañu. El trabayu ábrese con una sesión d’electrofolk a cargu de Sergio Rodríguez, onde pue sentise la voz del propiu Mánfer recitar el poema «Nueche d’insomniu»; sigue la voz d’Anabel Santiago faciendo una tonada del testu «Cuando»; ensin dexar la canción asturiana, anque nesti casu más llixera, los Hermanos Valle Roso, col acompañamientu del pianu, dialoguen vocalmente con «Silenciu». Apaecen tmamién Xabel, del que se recupera’l tema «L’Asturies eterna» (aparecíu hai años nel so únicu discu, onde precisamente ponía música a dellos testos de Mánfer); Toli Morilla, del que tamién se rescata una pieza grabada enantes, «Nueche d’insomniu» (tema central del espectáculu del mesmu nome); Alfredo González, que pon el so estilu particular al serviciu de «Tracamundiu»; y Xel Pereda (miembru de Llan de Cubel y guitarrista de la banda qu’acompaña a Nacho Vegas), que firma una pieza titulada «Soledá». Una formación hestórica que perteneció al movimientu del Nuevu Canciu Astur, Renacencia, que vuelven a xuntase pa grabar en clave de pop-rock sesenteru «Les hores muertes», incluyendo la voz del fíu de Mánfer, Efrén dAndrés y la guitarra del so ñetu Oscar. Pela so parte les pandereteres d’Herbamora y el grupu d’intérpretes que les acompaña convierten nun ramu tradicional la poesía «Atetuyu ante la muerte». La grabación sigue pelos soníos folk con Felpeyu y la so adaptación de «La carbonera». L’electrofolk vuelve con Xera y el poema «Yo quixera». «13 x Mánfer» piésllase con Dark la eMe y la so adaptación hiphopera d’«Asturies, patria querida», la primer grabación del raperu nasturianu y Dixebra, que fai rock del poema «Contrastes». El discu presentóse nel Teatru Nuevu de La Felguera, dientro de los actos de la 32 Selmana de les Lletres Asturianes. 12 de mayu, 2011 0 FacebookTwitterPinterestEmail
Entrevista de la selmana José Pérez Vidal: ”Nun recibimos nin un euru públicu pa la Noite Celta de Porcía” by asturnet 27 d'agostu, 2010 Esti sábadu Porcía, pueblín asitiáu nel conceyu occidental d’El Franco, acueye la ventiocho edición de la nueche folk más conocida y vieya de les asturianes, la Noite Celta. Nesta ocasión cunten con grupos como Felpeyu, DRD o l’escocés David Munnelly. Pa conocer más detalles d’esta célebre folixa y de la so organización falamos con delles de les persones qu’organicen esti eventu, los miembros de l’Asociación Cultural Alameda, con José Pérez Vidal, el so presidente, a la cabeza. Trescribimos les sos respuestes como nos falen, en gallego-asturianu. -Programar ún de los festivales celtes más prestixosos del Arcu Atlànticu, y decanu de los asturianos, tien de ser una responsabilidá importante, ¿cómo lleven alantre esi trabayu d’escoyeta d’artistes? -Al cabo de ventisete anos, déunos tempo a conocer personalmente a un bon puñao de músicos folk y aparte, tentamos de trer sempre algúa banda de fora que s’ameza al peteiro de grupos asturianos que normalmente ocupan a mayor parte del cartel. Mantemos muito búa rellación coellos y tamén nos deixamos asesorar pra poder trer a grupos de renome internacional y dar, al mismo tempo, acoyida todos os anos a xente nova que nun tuvo inda oportunidá de tocar na Noite Celta de Porcía, sempre dentro das posibilidades que podemos ofrecer. ¿Cuántes persones trabayen na organizacion y desenrrollu de la Noite? -A Noite Celta depende d’un bon número de xente, fundamentalmente del llugar del Franco, d’unde el conceyo coyéu el nome, hoi na parroquia de Valdepares. Nun saberíamos precisar el número con exactitú, peró entre úa cousa y outra ben sei que nos achegamos ás 30 personas. A Noite Celta nun existe sola nel actividá da xente que la amaña, suposto qu’el Asociación Cultural Alameda, responsable da súa organización, fai tamén outros llabores al cabo del ano. El más representativo, xunto coa Noite Celta, é sin duda el organización da Romeiría da Nosa Señora dos Remedios, el ocho de setembre; é, ben seguro, a romeiría más multitudinaria d’esta contornada d’Asturias. Tamén se fai con regularidá as actividades culturales que cualquera asociación d’este xeito amaña al llargo de todo un ano. -Pela Noite Celta pasaron dalgunos de los grupos mas conocíos de les trés décades últimes, ¿ye complicao caltener la calidá y presentar novedaes añu tres añu? -Sempre. El compromiso da xente é esencial y conseguir financiación abonda, claro ta, tamén. É un trabayo llargo da xente del poblo que dura más d’un ano, xa qu’antes qu’acabe úa edición xa se ta amañando a arrancar cousas prá del ano que vén. Más inda nel entorno unde se fai, unde hai que recordar que se trata d’un isla arrodiada pol río Porcía, que nun tén acceso natural ás personas y al tráfico rodao. -Nesta ocasión apuesten pola musica del escocés David Munnelly y de dellos grupos asturianos. ¿Qué suel tener más ”tirón”, lo llocal o lo foriato? -Supoñemos qu’eso depende de muitas cousas, como os horarios, el tempo, el reportorio dos grupos, por exemplo. Temos visto al público casi nel “éxtasis” tanto con grupos rexonales, como Llan de Cubel, como con grupos de fora, por exemplo el caso de Fred Morrison y a súa banda. De cualquera xeito, na Noite Celta de Porcía, tamos abertos a cualquera proposta musical que s’axuste al criterio del que se vén celebrando dende hai ventisete anos, buscando sempre calidá nun festival, pensamos, mui a medida da xente qu’asiste al Alameda, sin grandes produccióis nin parafernalias. -Si en dalgo se diferencia la Noite folk de Porcía, amás del guapu espaciu nel que se fai, ye pola orixinalidá de cuntar con parrillada de sardines. ¿Cuántes lleguen a consumise nuna sola edición? -Hasta qu’a xente se farta (rises). El maestro Patricio del Murillo y os sous pinches nun abandonan el carro hasta que s’acaban os varios centos quilos que se train cada ano. -Esti añu, en plena crisis, ¿tuvieron d’asistir a recortes de presupuestu? -Non. Pensamos que nos caracterizamos por ter úa financiación sostenible pra os nosos festivales, inda condo nun podemos negar que temos crisis perpetua nun sito pequeno como el Franco, y que nun se cumplen nunca as nosas expectativas. Tamén, como pasóu este ano, únicamente recibíronse 300 (trescentos) euros d’úa entidá privada, y outra axuda d’outra entidá que sempre nos fai precio nos sous servicios. Nin un peso das alministracióis públicas. A financiación das nosas actividades recain principalmente nos vecíos da parroquia de Valdepares, xunta col cobro dos postos y bares que se poin pra dar servicio na Noite Celta y na Romeiría dos Remedios. Consumir nel bar da festa é tamén importante neste sentido, y esperamos qu’a xente sepa apreciar el esforzo que supón poñer á súa disposición todos os anos lo que pasa neste festival. -¿Cuánta xente acude cada añu a la Noite folk? -Inda que nun temos un conteo exacto, podemos fer úa comparativa con outra actividá da terceirá edá que se celebra nel mismo campo del Alameda de Porcía, na qu’a conta das personas é prácticamente exacta. A partir desto, podemos dicir que superamos ampliamente as 4.000 personas nos últimos anos. El 8 de setembre na Romeiría dos Remedios xúntanse úas 12.000. -Queden dos años pa un númberu redondu, la trenta edición, ¿hai dalgo yá pensao pa celebralo? -Algo hai, peró nun será por aquí unde vos lo dígamos. (rises)Esperámosvos pra esa edición, pras que quedan y, sobretodo, esperámosvos este sábado. Seredes ben recibidos. 27 d'agostu, 2010 0 FacebookTwitterPinterestEmail