Sociedá Un centimu y mediu de cada euro de la Conseyería de Cultura destinaráse al plan de normalización del asturianu by asturnet 8 de payares, 2006 El presupuestu de la Conseyería de Cultura, Comunicación Social y Turismu pal añu 2007 sedrá de 164.387.036 euros, esto ye una xuba del 2.5% respectu al añu 2006. L’Axencia de Comunicación, na que s’inxerta l’ente públicu, recibirá 57.255.956 euros. La RTPA, Radio Televisión Principado de Asturias, inxerta na Axencia de Comunicación, tendrá 18.353.645 anque’l so presupuestu final tará en 23.029.503, esta cifra algamaráse, en pallabres de la responsable de la Conseyería, “mediante la publicidá y l’usu mercantil del ente de comunicación”. La partida empobinada a la promoción y difusión del asturianu medra un 20%, respectu a 2006, llegando a 2.474.416 euros, l’un con cinco por cientu del presupuestu total de la Conseyería. Ana Rosa Migoya, Conseyera de Cultura Comunicación Social y Turismu, afirmó que “da cobertura abondo pal cumplimientu de la última añalidá del plan de normalización social del asturianu y del gallego-asturianu”. El presupuestu de la promoción al asturianu inxértase na Dirección Xeneral de Cultura que tien una xuba del 27%, respectu a 2006, hasta llegar a los 49,206,721 euros. Ente les partíes empobinaes a la construcción y remodelación d’infrastuctures culturales, la Universidá Llaboral de Xixón recibirá una partida de 28.692.000 destinada a la finalización de les obres del edificiu de Cabueñes. El Centru Cultual “Niemeyer” d’Avilés tendrá una partida de 3.178.220 euros y l’ampliación del Muséu de Belles Artes 5.699.846. La construcción de la “Ciudá del Motor”, en Tinéu, y el Circuitu automovilísticu “Fernando Alonso” recibirán cauna un millón d’euros. De la Conseyería de Cultura dependen otros entes de derechu públicu como’l RIDEA, que recibirá 318.725 euros; el Conseyu de la Mocedá d’Asturies, 541.436; el Muséu de Belles artes, 3.033.570 euros. 8 de payares, 2006 0 FacebookTwitterPinterestEmail
Sociedá IX y PSOE alcuerden nuna propuesta de resolución l’impulsu del Plan de Normalización by asturnet 26 de setiembre, 2006 Tres de la segunda xornada del Debate d’Orientación Política, los grupos parlamentarios de PSOE ya Izquierda Xunida rexistraron ayeri de manera conxunta na Cámara de la Xunta Xeneral una propuesta de resolución qu’habrá de ser votada na sesión de güei cola que se solicitaba un nuevu impulsu al Plan de Normalización Social del Asturianu, faciendo especial mención al so usu nel ente públicu de conumicación (RTPA). Socialistes ya Izquierda Xunida propunxeron una serie d’iniciatives conxuntes centraes na revisión de la xestión de los espacios naturales, la ordenación del área central asturiana o l’agricultura ecolóxico, ente otres. Na segunda xornada del Debate del Estáu de la Rexón, los temes que más foron reprochaos al gobiernu tuvieron que ver con tolo tocante a la polemica del pasáu fin de selmana na acampada ecoloxista de Caliao, prohibida pola Conseyería de Mediu Ambiente y defendida públicamente per parte d’Izquierda Xunida, asina como’l desempleu y la emigración moza. El presidente del PP, Ovidio Sánchez, intervino na sala falando de ‘dos llexislatures perdíes’, faciendo repasu pela riestra de demandes sociales pendientes de resolver pol gobiernu nos últimos años. Precisamente’l PP presentó un total de 97 propuestes de resolución ente les que se pide, ente otres midides, que se quite l’impuestu d’hidrocarburos, una baxada del IRPF y el trespasu de les competencies que queden del Estatutu. Cola votación d’estes propuestes, el Parlamentu asturianu va poder fin a tres díes de revisión política na que l’actitú del Presdiente, Vicente Alvarez Areces, foi de siguío criticada por ‘trunfalista’ ya ‘idílica’. 26 de setiembre, 2006 0 FacebookTwitterPinterestEmail
Comunicación TPA empezó a emitir al traviés del satélite Hispasat 1C y pela Internet by asturnet 10 de setiembre, 2006 Televisión del Principáu d’Asturies (TPA) empiezó’l pasáu vienres 8, festividá del Día d’Asturies, les sos emisiones per satelite p’America, Europa y Norte del Africa, al travies del Hispasat 1C. Dende esi día, les emisiones tamien pueden siguise na Internet, na dirección http://www.rtpa.net . La emisión TPA per satelite va dinfundise 24 hores los 365 díes del añu, na modalidá de multidifusión, col envís d’axustar la programación a los diferentes usos horarios de los diferentes países. La señal de la TPA n’America va integrase na plataforma de RTVE, qu’hasta agora espardía un paquete de 7 les canales españoles de Televisión (Canal Internacional de TVE, 24 hores, DOCU TVE; les autonómiques TV3, ETB y TVG y Antena 3 Internacional). Pa Europa y Norte del Africa, TPA va integrse na plataforma Europa, qu’anguaño esparde un paquete de 6 canales españoles (Teledeporte, Canal Clásicu, Docu TVE, TVE 50 años y Clan TVE). La comunidá asturiana fuera del Principáu estímase, según datos del Conseyu de Comunidaes Asturianes, nunes 300.000 persones. 10 de setiembre, 2006 0 FacebookTwitterPinterestEmail
Comunicación La TPA estrena programación matinal y la radio homenaxea a Felpeyu nel empiezu de la emisión en pruebes by asturnet 6 de setiembre, 2006 La Televisión del Principáu d’Asturies va estrenar la so emisión matinal mañana, festividá del Día d’Asturies, con una programación especial dende’l Santuariu de Cuadonga. Pela so parte, la Radio del Principáu va empezar tamien la so emisión en pruebes mañana col tema musical ‘Xirandiyes’, una adaptación de tres dances asturianes fecha por Felpeyu, que s’escoyó como recuerdu y homenaxe a los músicos Igor Medio y Carlos Redondo que morrieron el pasáu mes de xunu nun accidente de tráficu. La celebración del Día d’Asturies va vali-y a la RTPA pa estrenar les sos emisiones mesmo na televisión, cola programación matinal, que na radio. Los periodistes Cristóbal Ruitiña y Diana Sánchez van ser los encargaos de presentar un programa especial dende Cuadonga, nel que se va retresmitir l’oficiu relixosu y la procesión a la Santina. Nesti programa especial televisivu tamien se va poner un reportaxe especial grabáu pela mañana con una cámara subacuática nel Llagu Enol de la qu’unos submarinistes saquen una replica de la Virxe del fondu del llagu. Per otra parte, el periodu de pruebes de la Radio del Principáu d’Asturies va emitir un bucle siguíu de música pa meter, a lo llargo de tol mes de setiembre, los sos espacios informativos. Mañana, amás de rindir homenaxe a Igor Medio y Carlos Redondo col tema de Felpeyu ‘Xirandiyes’, la RPA va poner especial atención nos temes de los grupos que van intervenir nos conciertos programaos en Nava con motivu del Día d’Asturies. 6 de setiembre, 2006 0 FacebookTwitterPinterestEmail
Sociedá IAS tacha d’ ‘engañu’ ‘l pactu de gobiernu de PSOE ya IX énte l’empiezu de la TPA by asturnet 13 de xunu, 2006 El portavoz d’Izquierda Asturiana (IAS), Ignaciu Llope, volvió a denunciar ayeri ‘l’engañu y decepción’ que supón el gobiernu d’izquierda ente l’empiezu de les emisiones de la TPA ensin denguna presencia de la llingua asturiana na so programación. ‘Inclumple nuevamente de forma flagrante l’alcuerdu d’IX y PSOE y supón un pasu firme hacia la muerte de la nuestra llingua’, afirmó Llope, que recordó que nel pactu firmáu nel añu 2003 alcordábase l’apueste por ‘un ente públicu modernu tecnicamente, comprometíu cola realidá cultural y llingüística d’Asturies’. Nel pactu de gobiernu firmáu en 2003 pola FSA ya IX-BA roblábase un ‘impulsu de la llingua asturiana nos medios de comunicación apoyando un usu rigurosu y normalizador’ y un prometedor ‘diseñu y usu activu del futuru Ente de comunicació nesi sen’. Según Llope, ‘dende que’l pasáu vienres la TPA empezare les sos emisiones de forma regular, la presencia del asturianu foi nula, lo que vien a confirmar los piores presaxos, confirmando que la burlla del escacarexáu pactu de la izquierda plural algama dimensiones astronómiques’. Pal portavoz d’IAS esti fechu amuesa que ‘si dalguien tenía dalguna duda de la voluntá normalizadora de los responsables de la RTPA y del gobiernu del PSOE-IX-BA yá quedó espeyada’. ‘Esta televisión pagámosla tolos asturianos colos nuestros impuestos, incluyíos los que falamos n’asturianu’, afirmó Llope, que tachó esta actitú de ‘tomadura de pelo, una ironía que’l lema sía ‘Reflexu d’Asturies’ cuando polo que tamos viendo namás que se dedica a reflexar una Asturies monollingüe, ensin personalidá, una Asturies que sólo esiste na cabeza de los responsables de la FSA’. 13 de xunu, 2006 0 FacebookTwitterPinterestEmail
Escéniques El teatru percuerre Asturies by asturnet 2 de mayu, 2006 Siguiendo colos actos de la XXVI Selmana de les Lletres Asturianes los conceyos d’Uvieu, Xixón, Noreña, Carreño, La Pola L.lena y Cangas del Narcea son l’escenariu güei de diferentes representaciones teatrales. Pela so parte, les xornaes d’Universidá n’escena siguien con una ponencia de Boni Ortiz sobre Felipe Villa y la dignificación del teatru costumista asturianu, y otra de Montse Garnacho sobre cuentos populares llevaos al teatru. Finalmente, la sede de la RTPA, en Cabueñes (Xixón) va ser l’escenariu del DVD ‘Pieces d’obres teatrales y poetiques’ a cargu de Javier Maqua y Ramón Lluis Bande. A les doce la mañana d’esti miercoles 3 de mayu la Sede de la RTPA en Cabueñes (Xixón) va acoyer la presentación del DVD Pieces, de obres teatrales y poetiques, a cargu de Javier Maqua y Ramón Lluis Bande. DVD que va entregase de regalu nel Día de les Lletres cola compra llibros y música n’asturianu nes llibreríes y tiendes de discos collaboradores con esta selmana. L’Asociación pola Recuperación de los Sidros y les Comedies va representar a les seis de la tarde na Plaza la Constitución de Noreña la obra ‘Llegó la modernidá (comedia de guirrios); y una hora más tarde, nel Centru Cultural d’El Llano de Xixón la compañía Higienico Papel fadrá otro tanto cola obra de Dolfo Camilo Díaz ‘Puntu y coma’. Ente les ocho y les ocho y media de la tarde otres tres obres van salir a escena. Telón de Fondo va representar nel Teatru Prendes de Candás ‘Una hora ensin televisión’, de Jaime Salom; la Compañía Asturiana de Comedies va llevar al Vital Aza de L.lena ‘Interdictu o pleitín d’aldea’; y Traslluz representará la obra de Carmen Duarte ‘Tocóme la lotería’ nel Teatru Toreno de Cangas. 2 de mayu, 2006 0 FacebookTwitterPinterestEmail
Comunicación Pérez Ornia comparez na Xunta pa informar de la programación de la TPA by asturnet 20 de marzu, 2006 El director xeneral del Ente Públicu de Comunicación del Principáu, José Antonio Pérez Ornia comparez esti llunes 20 na Xunta Xeneral pa informar de les llinies básiques de la programación de la televisión autonómica y de la parriella cola que va ponese en marcha. La presencia del responsable de RTPA nel parlamentu asturianu ye a pitición propia ya inxértase nes comparecencies informatives avezaes del cabezaleru del Ente. Pérez Ornia va esponer nel hemiciclu autonómicu con qué triba d’espacios va escomenzar TPA les sos emisiones tres el periodu de prebes y los que van dir ampliando la ufierta de la so parriella. La estrena de la programación definitiva de la radiotelevisión autonómica podía producise d’equí a mes y mediu, talu anunciaba’l presidente del gobiernu asturianu, Vicente Álvarez Areces esti domingu 19 nuna entrevista al diariu El Comercio. La última comparecencia nel parlamentu del director xeneral de RTPA fue va un mes, el 21 de febreru. Nella anunció la intención del Ente d’emitir nuna canal internacional pa los asturianos repartíos per tol mundu y recalcó el calter “temáticu” y non xeneralista de la televisión autonómica del Principáu. 20 de marzu, 2006 0 FacebookTwitterPinterestEmail
Sociedá Les subvenciones del Institutu de la Mocedá reciben les crítiques de MIAS by asturnet 1 de marzu, 2006 Les Mocedaes d’Izquierda Asturiana (MIAS) critiquen la convocatoria de subvenciones a asociaciones xuveniles del Institutu Asturianu de la Mocedá pa esti añu espublizada nel BOPA el pasáu 23 de febreru de 2006 y califiquen les bases poles que se rixen les ayudes de ” política censora ensin precedentes”. La convocatoria ya recibiera el malestar del Conseyu de la Mocedá del Principáu d’Asturies (CAMPA) poles atribuciones recoyíes nes bases a la dirección del Institutu de la Mocedá. El portavoz de MIAS, Carlos Suari sofitó les declaraciones del presidente del Conseyu de la , Paulino Feito nes qu’amosaba’l so desagradu pol conteníu de les normes pa distriuir subvenciones a asociaciones. Suari afirmó que nelles “apaez la mano censora de la Direutora del IAM, qu’algama, práuticamente, derechu de vetu, interpretación y resolución de les bases sobre los proyeutos que les asociaciones presenten, abellugándose falsamente siempre baxo criterios téunicos”. La organización moza d’Izquierda Asturiana espresó el so “plasmu” al ver como na convocatoria, les asociaciones o entidaes de mocedá que seyan beneficiaes nún importe igual o superior al 20% del coste total del proyeutu o actividá autoricen al ente de la RTPA a la comunicación pública de les mesmes actividaes. Pal portavoz de MIAS esti fechu “constitúi una intromisión forciada, obligada ya inadmisible na privacidá y na propia imaxe de les actividaes desendolcaes poles asociaciones”. A propósitu de la radiotelevisión autonómica, Suari aprovechó pa desixir “información sobro l’espaciu que va ocupar l’asociacionismu mozu asturianu nel nuevu ente radiotelevisivu”, esperando que, nesti casu, el responsable de la canal asturiana, Pérez Ornia, tenga “más decencia y nun abocane como cuando se-y entruga pola nula presencia de la llingua asturiana na televisión de toles ciudadanes y ciudadanos d’Asturies”. Per último, Suari, perafitó la desixencia que dende les asociaciones d’Asturies se fai a que “esta convocatoria seya iguada y rectificada” en BOPA y nun se pongan entá más torgues a l’actividá del asociacionismu mozu si lo que verdaderamente se quier ye fomentalu, promovelu y espardelu. Pa finar, Carlos Suari, espetó que “si los pilancos, el control políticu y les dificultaes alministratives son los finxos de los planes de mocedá d’esti gobiernu de la izquierda plural nun vamos quedar callaos”. 1 de marzu, 2006 0 FacebookTwitterPinterestEmail
Comunicación Pérez Ornia defende l’Ente autonómicu como xenerador d’empléu directu ya indirectu by asturnet 22 de febreru, 2006 José Antonio Pérez Ornia aprovechó la so comparencencia esti martes 21 na Xunta Xeneral pa defender l’Ente Públicu de Comunicación como xenerador d’empléu directu ya indirectu. El director de la radiotelevisión autonómica desgranó les cifres de los ingresos y gastos de la empresa dende la so creación. Coincidiendo cola presencia d’Ornia nel parlamentu miembros de la Xunta pola Defensa de la Llingua manifestáronse pa protestar pol tratamientu dau al idioma nel ente autonómicu. Pérez Ornia, defendió los beneficios que pal sector audiovisual d’Asturies supón la pueta en marcha de la RTPA que, según los sos cálculos, pueden ser un cientu de puestos de trabayu directos y alrodiu de doscientos indirectos con preferencia pa empreses con mayoria de capital asturianu. A la contra, el diputáu del PP Fernando Goñi criticó al ente públicu polos sos costes dende la integración de la televisión asturiana na FORPA (Federación de Radiotelevisioens Autonómiques), que cifró en 800.000 euros amás de 325.000 euros como pagu anual. A eso, hai qu’añadir, según el parlamentariu popular, 1,2 millones de euros pola tresmisión de partíos de fútbol de Primera y Segunda División hasta’l final d’esta temporada y 445.221 euros pola emisión de películes. Mientres Ornia comparecía nel parlamentu autonómicu un grupu de militantes de la Xunta pola Defensa de la Llingua manifestóse énte les puertes del hemiciclu con una pancarta na que se pidía una televisión asturiana n’asturiano. Díes enantes, esti domingu, la organización cívica tentó desplegar esa mesma pancarta nel estadiu Carlos Tartiere nel partíu del Real Uvièu retresmitíu pola TPA y personal del club azul impidiólo pola fuerza. 22 de febreru, 2006 0 FacebookTwitterPinterestEmail
Sociedá La Xunta desenvuelve una campaña por una televisión autonómica n’asturiano by asturnet 24 de xineru, 2006 La Xunta pola Defensa de la Llingua tien puesta en marcha una campaña por una televisión autonómica n’asturiano coincidiendo cola emisión en periodu de prebes de Radiotelevisión del Principáu d’Asturies (RTPA). Les imáxenes de los cartelos y pegatines de la campaña parodien los anuncios corporativos del Ente Públicu de Comunicación personificando nel presidente Álvarez Areces les sos crítiques a la esclusión de la llingua asturiana na televisión autonómica. La Xunta, amás de la campaña publicitaria, entamó nes últimes selmanes delles acciones reivindicatives como’l despliegue d’una pancarta nes grades del estadiu Carlos Tartiere d’Uviéu el pasáu 15 de xineru na retresmisión del partíu ente’l Real Uviéu y el Real Unión. Militantes de la organización cívica tentaron repetir l’acción el pasáu domingu 22 nel estadiu del club carbayón y los encargaos de la seguridá del estadiu impidiéron-yos l’accesu. 24 de xineru, 2006 0 FacebookTwitterPinterestEmail