Emigración Especial Día dAsturies na emigración 2005 by asturnet 9 de setiembre, 2005 Dende hai un añu’l Principáu d’Asturies complementa los sos actos institucionales de celebración del Día d’Asturies dientro de la rexón, con una fiesta dedicada a la emigración. Esti compromisu, establecíu ente’l Conseyeru de Xusticia, Seguridá Pública y Relaciones Esteriores, Francisco Javier García Valledor, y el Presidente de la FICA, Jose Luis Casas, va fraguase esti añu na ciudá arxentina de Buenos Aires. Les razones poles que foi elixía foron apuntaes pol director de l’Axencia Asturiana d’Emigración, Luis Miguel Fernández Romero, nel actu de presentación: ‘Buenos Aires ye la ciudá del mundu, fuera d’España, onde más asturianos residen. Y porque pal Principáu resulta una obligación moral, reconocer y homenaxear a Manolo del Campo, un añu depues de la so muerte’. El pasáu añu celebrárase en Madrid esti día, en colaboración col Centru Asturianu de dicha ciudá, por dos razones que destacó Romero: ‘Por ser la ciudá española na que más asturianos residen y por homenaxear a un pueblu qu’acababa de sufrir un horrible atentáu’. El programa d’esti añu va siguir los actos que tradicionalmente vienen organizando los asturianos de Buenos Aires. Una fabada nel Centru Asturianu pa conmemorar la xesta de Cuadonga y un espectáculu compuestu polo meyor del folklore fechu dientro d’Asturies, coordináu pol grupu folklóricu ‘Vezos Astures’, y lo meyor del folklore fechu fuera de la rexón, organizáu pol ‘Grupu Pelayo’, fundáu por Manolo del Campo hai más de cincuenta años. Estos actos tendrán el so prólogu na ciudá de Mendoza, onde’l día 10 van inaugurase les nueves instalaciones cola presencia del espectáculu de ‘Vezos Astures’. Otra manera, Jose Luis Casas, presidente de la FICA, fue invitáu pola Conseyería a acompañar al conseyeru, Francisco Javier García Valledor, y al director de l’Axencia Asturiana d’Emigración, Luis Miguel Fernández Romero, a los actos de conmemoración del día d’Asturies en Buenos Aires. Aprovechando esta visita, Jose Luis Casas va reunise’l día 12, a les 10:30 hores na Se social del Centru Asturianu de Buenos Aires, con representantes de los demás Centros Asturianos de l’Arxentina, pa tratar asuntos d’interes de la FICA, como la prósima reforma de la Llei d’Asturianía. Amás de pol presidente de la FICA, el conseyeru de Xusticia va tar acompañáu pol director de l’Axencia Asturiana d’Emigración, Luis Miguel Fernández Romero, el Vicepresidente del Conseyu de Comunidaes Asturianes y el coordinador del Gabinete del Conseyeru. Pero, mentes Buenos Aires prepara’l so Día d’Asturies, otros centros asturianos del mundu tamien entamen les sos fiestes de celebración de la festividá de la Santina de Cuadonga. Ésti ye’l casu de dalgunos centros españoles, como’l de Madrid, el de Barcelona, A Coruña, Cantabria, Salamanca y Torrevieja; y de dalgunos centros asturianos de fuera d’España, como’l de Bruseles, el de Nueva York, el de Monterrey en Mexico o’l de Sâo Paulo. El CA de Sâo Paulo preparó, como cada añu, la so Fiesta d’Asturies aprovechando la festividá del Día de la Independencia brasileña. Los actos de celebración escomenzaron el pasáu 7 de setiembre, en Lagoas, a les once y media la mañana, con una gran romería asturiana. Tres de la misa campal, fíxose distribución del bollu preñáu y la botella vino ente les más de doscientes persones congregaes; y anque taba previsto terminar la celebración con un torneu de bolos, el mal tiempu fixo que nun pudiere xugase. Pela nueche emitióse dende la Radio Imprensa FM un programa dedicáu dafechu al Principáu onde participaron el Presidente del CA, Jose María Aldariz, y el gaiteru astur-brasileñu, Carlos Luiz Bacelar. Pero los actos nun terminen equí. La 49 edición d’estes fiestes siguirá’l sábadu 24 de setiembre, a les ocho la tarde, cola presencia del director Luis Miguel Fernández Romero, que va aprovechar pa esponer la relación del Principáu colos emigrantes y de les ayudes asistenciales que promueve l’Axencia dientro del Plan d’Emigración. Tres d’esti actu, va facese la presentación del Coral Iberico na Sociedade Hispano Brasileira. La fiesta culminará’l domingu 25, a les dos de la tarde, con una gran fabada asturiana na Sociedade Hispano Brasileira na que se va facer presentación del gaiteru Bras Rodrigo y Lorena Gómez, que tarán acompañaos polos gaiteros y cuerpu folklóricu de la SHB. Siguiendo n’America, el Centru Asturianu de Monterrey (Mexico) presenta’l so programa de fiestes pa celebrar el día d’Asturies, que se va facer el prósimu domingp, día 11. El programa previstu pa la conmemoración de Nuestra Señora de Cuadonga cunta con una misa y ofrenda floral a la Santina na ilesia de la medaya milagrosa, asina como la entrega de los premios ‘Urogallo’, que sirven como reconocimientu a aquelles persones que destacaron pol so llabor a la comunidá. El Centru Asturianu de Bruseles abre la celebración el sábadu día 10 con una recepción na sala d’actos del ayuntamientu de Bruseles, onde’l so alcalde, Fredy Thielemans, recibirá los directivos del Centru Asturianu de Bruseles, los directivos del Centru Asturianu de Lieja. asina como a les personalidaes invitaes. A les doce la mañana, los grupos folklóricos desfilarán col ramu hasta’l Mannekenpis, que va ser vistíu con traxe d’asturianu pa la ocasión, y onde se va facer una degustación de sidra. A les dos de la tarde, el Presidente del Centru dará un discursu de bienvenía, al que va siguir l’actuación de los grupos folklóricos ‘Puxa Asturias’, ‘La Santina’, ‘Los pequeños de La Santina’, ‘Esbardu d’Aviles’ y la banda de gaites del Centru. Depues de la xinta y de la misa, a les ocho la tarde, el centru fadrá entrega del so galardón l’Horru d’Oro. El Centru Asturianu de Nueva York fue más adelantáu nes sos celebraciones y el pasáu domingo reunió a un centenar de persones nel Círculu Español de Queens, onde oficiaron una misa y esfrutaron d’una xinta de la hermandá. Ellí, la gaita de Xuacu Amieva amenizó una comida na que s’axuntaron varies xeneraciones d’emigrantes españoles. N’España, los centros asturianos tamien preparen les sos propies celebraciones. Como’l Centru Asturianu de Madrid, que’l domingo día 18, na Quinta Asturias, abre la xornada con un torneu de bolos asturianos, de petanca y de tiru a la rana. A les doce la mañana celebrarán una misa cantada pol Coru del centru, al que siguirá una procesión de la Santina. El pregón d’esti añu cuerre a cargu de la escritora, periodista y premiu Mazana d’Oru, María Teresa Álvarez, Condesa de Latores. Al terminar, el coru y los gaiteros del centru van actuar, pa dar pasu depues a una espicha a la que tán invitaos tolos asistentes. A les cinco la tarde actuarán el Grupu Vocal “Cantariego” y de l’Agrupación Folklórica “L´Alborá” Per otra parte, los díes 9, 10 y 11 de setiembre, el Centru Asturianu de Barcelona celebrará la Santina 2005. Dientro de los actos destaca’l Festival de Música Celta previstu pa güei que va cuntar coles actuaciones de los siguientes grupos: “City of Barcelona Pipe Band”,“Chundarata”(Centru Aragones-Casa d’Aragón, “Risca L’Alba”,“Dealan” y el solista “Iñaki Sánchez Santianes” ganador del certame Ciudá d’Uvieu 2005, modalidá gaita. Amás, va contase con solistas de gaita irlandesa y catalana (Sac de gemecs ). Mañana, a les siete la tarde, Ferrán Bello, Director Xeneral del Departarment de Cultura de la Generalitat, fadrá llectura del pregón, pa depues actuar la cantante de Tonada Dª Mª Rosario González Martínez. De siguío gran recital del Coru del Centru, dirixíu por Eva Villena. Al acabar l’actu ufiertaráse una degustación de sidra y aperitivu asturianu, qu’ofrecerá’l Centru a los socios asistentes y convidaos. El día 11 será’l día d’Asturies en Barcelona, qu’entamará col Concursu de Bolos, modalidá ‘Cuatreada’. A les once y cuartu la mañana saldrán en solemne procesión y misa n’honor de la Virxe de Cuadonga, a la que se-y fadrá una ofrenda floral. Namás acabar, el centru entregará la so distinción, l’Asturcón de Plata. A les doce y media ta prevista una muestra de Música y Danza asturiana, cola participación del grupu “Andecha pol Raigañu” y Rosario González. Tres de la xinta, actuará’l Ballet Folklóricu de Sarriá “Esbart Sarrià” a quienes se-yos rinde homenaxe na cellebración del so cincuentenariu. El Centru Asturianu de Cantabria, en Santander, celebrará los díes 14,16, 17 y 18 de setiembre la fiesta la Santina. El pregón d’apertura de la fiesta va ser a cargu del catedráticu d’Inxeniería Electrica de la Universidá de Cantabria, Luis Gáspar Vega, nun actu que va tener llugar nel Hotel Bahía, el día 14, a les nueve la nueche y que va tar dedicáu a los más de siete mil asturianos que residen na rexón. Los salones del Centru Asturianu van ser oxetu’l día 16 d’una conferencia sobre gastronomía asturiana, tres de la que’l Coru Ronda Altamira va facer una actuación pa tolos presentes. L’actu va entamar a les ocho la tarde. Al día siguiente, nel mesmu sitiu, va haber un concursu d’escanciaores de sidra natural asturiana. L’actu central dedicáu a la festividá de la Santina va ser el domingo 18, cuando a les once y media la mañana entame una procesión n’honor a la patrona, que saldrá de la Finca d’Altamira. A mediudía, va oficiase una misa cantada pol coru de la Fundación Principe d’Asturies, na que se va facer una ofrenda floral a la santa. A les ocho la tarde, y como broche a los actos de celebración, va facese una romería típicamente asturiana. El Centru Asturianu de A Coruña entamó los sos festeyos el pasáu día 7 y van durar hasta’l prósimu martes 13 de setiembre. Les fiestes patronales escomenzaron pasáu miercoles nel salón de actos del local social de l’asociación, cola llectura del pregón a cargu del periodista asturianu Jose Francisco Rodil. Les celebraciones acabarán el martes a les ocho la tarde con una misa en memoria de los socios fallecíos. Otru centru que yá empezó coles sos celebraciones ye’l de Salamanca. Como otros años, el Centru Asturianu de Salamanca montó una carpa nel Campu San Francisco xunta les del Centru Gallegu, l’Extremeñu y la Casa d’Andalucía. Como’l día 8 de setiembre coinciden la patrona de Salamanca, la Virxe de la Vega, el día d’Extremadura y el día d’Asturies, el centru asturianu de la ciudá salmantina celebra con ellos esti día, aprovechando les instalaciones de les Feries y Fiestes de la ciudá. Amás de preparar degustaciones de productos típicos asturianos y de repartir cartelos y catálogos informativos sobre la nuestra comunidá, güei actuará’l grupu ribeseyanu de música folk Corquieu nel escenariu instaláu nel recintu de les Cases Rexonales de la banda gaites Villa del Adelantado. Mañana, el Centru celebra los díes d’Asturies y Extremadura con una procesión que sal dende la Puerta de Zamora hasta’l Campu San Francisco, que va ser acompañada pola Banda de Gaites Villa del Adelantado y un grupu folklóricu extremeñu. Nel recintu de les Cases Rexonales, fadráse una misa campestre oficiada por cuatro sacerdotes: un gallegu, un extremeñu, un andaluz y un asturianu. El Centru Asturianu de Torrevieja nun ye menos y tamien se suma a les celebraciones de la festividá asturiana. Mañana, a les diez de la nueche, entamarán una verbena dedicada a la Santina na que va actuar l’artista xixonesa ‘Elena’. El domingo, a les once y media, entamará una procesión dende’l centru hasta la ilesia de San Roque, onde habrá una misa n’honor a la Virxe, amenizada pol grupu ‘L’Estruendu’. Terminada la misa, la procesión volverá a la se de l’agrupación, acompañada poles autoridaes asturianes y torrevexenses presentes nel actu. La Banda Gaites del CA d’Alicante ufiertará un conciertu a la una y media la tarde, pa que depues dea comienzu’l tradicional repartu del bollu y la botella vino pa los socios. A les seis y media, el centru tien previsto organizar un concursu d’escanciaores, mentes qu’a les siete y media entamará un festival públicu a cargu de l’Agrupación Artística Xixonesa, nel que van participar los siguientes artistes. En canción lixera: Silvia García, Susana Valles, Nerea Vázquez, Alejandro Nosti y Nerea Menendez. La canción asturiana va tar representada por Lito Cabal. Mentes que la canción española va selo por Antonio Montero. Acabáu’l festival va dar comienzu la representación teatral de les obres ‘La dama de las camelias’ y ‘La separación’. Jose Ramón Uría y Susana van presentar la Danza Clásica Española, a cargu de Fernando Luis Mendez Fraga y onde se va contar cola participación estelar del sociu de la entidá Jose Antonio del Cantu La Vara, campeón de tonada asturiana. Como dicimos, estes namás son dalgunes de les munches celebraciones del Día d’Asturies que se fain a lo llargu del mundu polos nuestros emigrantes col fin de festexar la patrona de la so tierra d’orixe, recordando la so cultura y l’asturianía que sienten más allá de les fronteres y les distancies. 9 de setiembre, 2005 0 FacebookTwitterPinterestEmail
Música Daniel Barenboim entusiasmó n’Uviéu nel so conciertu pola paz by asturnet 31 de xunetu, 2005 La Fundación Príncipe d’Asturies quería remembrar con esti conciertu a dos de los galardonaos colos sos premios dientro los actos d’alcordanza del so venticincu aniversariu. Barenboim recibió en 2004 el Premiu Príncipe d’Asturies de la Concordia xunta al so amigu y escritor Edward Said. El músicu, arxentín d’orixe xudíu y l’escritor, palestín emigráu a los Estaos Uníos, representaben a xuiciu del xuráu que-yos concedió’l galardón un exemplu de superación de los conflictos del nuestru tiempu y de llucha moral contra ellos. La Orquesta East-Western Diwan ye una amuesa de la colaboración entamada ente Bairenboim y Said, un conxuntu sinfónicu integráu por mozos y moces de diferentes nacionalidaes, cultures y relixones. 31 de xunetu, 2005 0 FacebookTwitterPinterestEmail
Música Daniel Barenboim va dirixir a la Orquesta West-Eastern Divan nun conciertu n’Uviéu d’homenaxe a Edward Said by asturnet 18 de xunetu, 2005 El director arxentín Daniel Barenboim va ufiertar un conciertu pola paz y d’homenaxe al escritor palestín Edward Said cola Orquesta West-Eastern Divan nel Auditoriu d’Uviéu. La nueche del prósimu 31 de xunetu ye la fecha escoyida pa esti conciertu que forma parte de los actos programaos pola Fundación Príncipe d’Asturies pa remembrar el venticincu aniversariu de la creación de los premios que lleven el so nome. Baremboim xunta’l desapaecíu Edward Said recibieron el Príncipe d’Asturies de la Concordia en 2002. Entrambos colaboraron nel proyectu de la Orquesta West-Eastern Divan, un sitiu d’alcuentru pa mozos de diversos países: Israel, Palestina, Siria, Xordania, Exipto, etc., más alló de cualquier llende relixosa o étnica. El programa del conciertu que va entamase’l 31 de xunetu a les 20.00 hores nel Auditoriu d’Uviéu ta compuestu pola Obertura de la Ópera Abu Asan, de Carl Maria von Weber; la Sinfonía Concertante en Mi bemol mayor KV 297b, de Mozart y la Sinfonía nº 1 de Mahler. Daniel Barenboim (Bonos Aires, 1942) recibió con Edward Said el Premiu Príncipe d’Asturies de la Concordia en 2002 porque, según recoyó l’acta del xuráu: con independencia de la so destacada proyección artística ya intelectual, realicen una xenerosa y emponderable xera a favor de la convivencia y de la paz, simbolizada na colaboración de xóvenes músicos que, superando antagonismos históricos, fomenta el diálogu y la reflexón. La Orquesta West-Eastern Divan, creada en 1999 por iniciativa de Daniel Barenboim y Edward Said, ye un taller pa músicos procedentes de diversos países, como Israel, Palestina, Líbano, Siria, Xordania, Exipto y España. Combina l’estudiu y el perfeccionamientu musical col conocimientu y la mutua comprensión ente pueblos, trescendiendo d’estamiente la dimensión puramente musical pa erixirse n’alcuentru nel que tienen cabida les inquietúes de los xóvenes artistes que van participar dalgún día nel futuru cultural y políticu de los sos respectivos países d’orixen. El primer taller dirixéronlu Daniel Barenboim y Edward Said, acompañaos de Yo-Yo Ma, miembros de la Staatskapelle de Berlín, la Filarmónica de Berlín y la Orquesta Sinfónica de Chicago. Tres les dos primeres temporaes en Weimar y la tercera en Chicago, onde Barenboim ye director musical de la Orquesta Sinfónica, el taller del West-Eastern Divan estableció la so sé en Sevilla col apoyu de la Fundación Tres Culturas del Mediterráneo. El West Eastern Divan reún en cada nueva edición a un promediu d’ochenta participantes, artistes en formación elexíos tres un llaboriosu procesu de selección con más de mil audiciones. El taller desarróllase a lo llargo de varies selmanes, col oxetivu final d’interpretar públicamente dellos conciertos, como los que ya se celebraron enantes n’Estaos Uníos, España y Alemania (2002), Reinu Uníu, Francia, Alemania y Marruecos (2003) y España, Reinu Uníu y Suiza (2004). 18 de xunetu, 2005 0 FacebookTwitterPinterestEmail
Sociedá La capitalidá cultural concedida pola Unesco centrará la promoción turística d’Asturies by asturnet 28 de xineru, 2005 Asturies empezará por Xapón pa ‘vendese’ como “capital cultural del mundu”. El Gobiernu autonómicu abrirá nel país asiáticu la so nueva campaña de promoción turística, que tará centrada en destacar la capitalidá cultural concedida a Asturies pola Unesco ente ochobre de 2005 y payares de 2006, periodu nel que los Premios ‘Príncipe’ cellebrarán el so 25 aniversariu con una bayurosa axenda d’actividaes. El presidente autonómicu, Vicente Álvarez Areces, confirmó esta mañana en Madrid l’apueste del Gobiernu por promover una imaxe d’Asturies como epicentru cultural del mundu, y avanzó que’l primer ‘stand’ que’l Principáu asitiará nel estranxeru p’abrir esa promoción sedrá la Esposición Universal de la llocalidá xaponesa de Nagoya, el prósimu mes de xunetu. N’otres pallabres, l’aniversariu de los premios ‘Príncipe de Asturias’, que traerá al Principáu a dellos premiaos de relevancia internacional paparticipar en conferencies, conciertos y esposiciones, marcará l’axenda turística del Gobiernu autonómicu, nel mesmu añu nel que se cumplen dos décades de la creación de la imaxe institucional del ‘Asturias paraíso natural’. Los xestores públicos del turismu n’Asturies intentaránen 2005, poro, atrayer al Principáu a un mayor númberu de turistes estranxeros pregonando les bondaes del aniversariu de los premios ‘Príncipe’. Álvarez Areces asistió güei al Día d’Asturies na Feria Internacional de Turismu de Madrid (Fitur) en compaña, ente otres personalidaes, del presidente de la Fundación ‘Príncipe’, José Ramón Álvarez Rendueles. 28 de xineru, 2005 0 FacebookTwitterPinterestEmail
Sociedá Fundadores de Conceyu Bable proponen un resurdir del collectivu y piden la coficialidá 30 años depués by asturnet 23 de payares, 2004 Un nuevu Conceyu Bable adaptáu a los tiempos. Fundadores del hestóricu collectivu asturianista abrieron güei n’Uviéu, 30 años depués de la fundación de la entidá, el debate sobre la conveniencia de da-y continuidá al grupu, nun realcuentru impregnáu de la demanda d’oficialidá y la necesidá de buscar la concordia na reivindicación llingüística. “Igual se necesita un nuevu Conceyu Bable”, afirmó ensin rodeos ún de los fundadores del grupu, Lluis Xabel Álvarez, ‘Texuca’, pa quien tres carencies básiques marquen l’Asturies d’anguaño: La triple ausencia d’oficialidá de la llingua asturiana, d’una fuercia política tamién xenuinamente “asturiana” y d’una notable proyección d’Asturies nel mundu, a partir de los ámbitos hispánicu y européu. La idega d’una posible refundación de Conceyu -o del so espíritu- pusiérenla previamente enriba la mesa el cantautor Carlos Rubiera, partidariu d’entamar un “movimientu social ampliu ensin etiquetes que lu frene”, y el periodista Graciano García, director de la revista ‘Asturias Semanal’, en cuyes páxines tomó cuerpu Conceyu Bable dende l’apaición del grupu en payares de 1974. Nesti sen, García, inspirador y ‘factótum’ de los Premios ‘Príncipe de Asturias’, fizo un llamáu a “integrar a toos” nuna defensa collectiva de los raigones d’Asturies, especialmente del idioma, nun movimientu pensáu dende la concordia y consciente de que “ye posible avanzar muncho ensin querer correr demasiao”. Pa ello, Graciano García ufrió como plataforma la inminente cellebración del 25 aniversariu de los premios ‘Príncipe’, que tendrá llugar en 2005 y que nun se concibe, según el periodista, “como una gran verbena, sinón como algo útil pa que queden coses pal futuru”. Magar de too ello, la posibilidá d’un resurdimientu de Conceyu Bable nun-y prestó a otra de les primeres militantes del grupu que güei participó na xinta de realcuentru, la filósofa y ex Conseyera de Cultura Amelia Valcárcel. Na so opinión, ye preciso abrir una nueva etapa, pero ensin les hestóriques siegles del grupu, col “oxetivu finalista corriente” de la coficialidá y la urxencia de que les fuercies polítiques afiten un modelu de convivencia afayadizu pa los asturianos. Pol so llau, Xuan Xosé Sánchez Vicente, otru de los fundadores de Conceyu hai agora tres décades, llamentóse de l’Asturies “en caída permanente” d’anguaño, distinta a la que’l grupu suañaba pal añu 2000 “por respetu a los nuesos pas y los nuesos güelos”, y reivindicó’l llabor de Conceyu Bable como una hestoria “d’éxitos y d’amores collectivos”. Baxo la cordinación del escritor Xuan Bello, y cola ausencia destacada del cofundador de Conceyu Xosé Lluis García Arias, los impulsores del collectivu repasaron la so propia hestoria como una “idea brillantísima que puso en marcha conciencies” y atribuyeron a la so “absoluta inconsciencia” ente les dificultaes los “milagros” del so llabor, ente ellos la “invención” de los actuales himnu y bandera d’Asturies. 23 de payares, 2004 0 FacebookTwitterPinterestEmail
Sociedá Migoya compromete la entrada en vigor del Plan de Normalización pa xineru de 2005 by asturnet 10 de payares, 2004 El documentu col que’l Gobiernu autonómicu planifica y estructura la promoción del asturianu pa los prósimos tres años tará en vigor en xineru de 2005. Asina lo comprometió esti mediudía n’Uviéu la conseyera de Cultura, Ana Rosa Migoya, quien destacó l’aumentu presupuestariu de 1,4 a 1,7 millones d’euros que tendrán l’añu prósimu les polítiques de promoción de la llingua asturiana dende l’Executivu. Nuna comparecencia pública na que detalló les cifres correspondientes a la so Conseyería dientro de los Presupuestos Xenerales del Principáu pa 2005 -cuyu anteproyectu entró el pasáu llunes na Xunta Xeneral-, Migoya precisó que l’aumentu del 20 por cientu na promoción llingüística traduciráse nun incrementu de toles llinies d’ayudes que yá tan en marcha p’alitar l’usu a tolos niveles del asturianu. En total, Cultura manexará en 2005 un presupuestu total de 105 millones d’euros, lo que supón un aumentu relativu del 17,3 por cientu respecto a les cifres de 2003 y favorez al departamentu dirixíu por Migoya como la Conseyería con mayor incrementu presupuestariu. Esi impulsu económicu emplegaráse, ente otres acciones, n’entamar una gran campaña d’ámbitu estatal pa promover Asturies como destín turísticu (3,4 millones d’euros), en sufragar el plan de ‘marketing’ de la Sociedá Rexonal de Turismu (más de 5 millones) y en da-y puxu a la Orquesta Sinfónica’l Principáu, que salvará’l déficit crónicu qu’arrastra con un presupuestu superior a los 4 millones d’euros, un 10 por cientu más que nesti exerciciu. Amás d’eses actuaciones, Cultura sofitará con 840.000 euros los actos conmemorativos del 25 aniversariu de los Premios ‘Príncipe de Asturias’, ingresará nes arques del Conseyu de la Mocedá un total de 343.000 euros y, mui especialmente, apostará por llevar a bon puertu, con 8 millones d’euros, los estremaos proyectos conteníos nel Plan Director de la Universidá Llaboral, en Xixón, que’l Gobiernu prevé tener aprobaos nun plazu másimu de tres meses. Ente ellos figuren la creación d’un centru d’arte y l’habilitación de les instalaciones dende les qu’empezará a emitir, nel segundu semestre de 2005, la radiotelevisión autonómica, ente que consumirá un total de 8,3 millones d’euros pa la so puesta en marcha, incluyendo la construcción de dependencies nel conventu de les clarises de la Llaboral y l’alquisición d’equipos técnicos. 10 de payares, 2004 0 FacebookTwitterPinterestEmail
Lliteratura Los colexos recibirán hasta 20.000 exemplares de ‘El Quijote’ pa conmemorar el cuartu centenariu de la obra by asturnet 5 de payares, 2004 El cuartu centenariu de ‘El Quijote’ llevará a les aules asturianes hasta 20.000 exemplares d’una edición de la obra coordinada por Francisco Rico. El Principáu sumaráse amás a los actos de la conmemoración con una esposición monográfica sobro la dómina de Miguel de Cervantes y vinculará actividaes musicales y escéniques al llibru referencial de la lliteratura en llingua castellana. El cuartu centenariu de la primer edición de ‘El Quijote’, asoleyada en 1605, marcará d’esti mou l’axenda de la cultura pública n’Asturies a lo llargo de 2005, pero habrá compartir protagonismu col 25 aniversariu de los Premios ‘Príncipe de Asturias’, qu’espardirán un programa d’actos mui diversu anunciáu como de gran ecu internacional y con participación de parte de los premiaos en toles ediciones. El director xeneral de Promoción Cultural y Política Llingüística, Carlos Madera, concretó ayeri en Madrid con Manuel Blecua, presidente de la comisión estatal del centenariu de ‘El Quijote’, la participación d’Asturies nel eventu, y comprometió tanto el repartu de baldre ente los escolinos d’exemplares de la obra de Cervantes, como la fechura de talleres y otres actividaes en colexos ya institutos p’alitar la llectura de la hestórica narración. Los asturianos tendrán amás la ocasión de conocer la dómina en que vivió Miguel de Cervantes a lo menos en dos esposiciones, una itinerante qu’aportará al Principáu en tren y otra fixa y comisariada por Gonzalo Anes, director de la Real Academia de la Hestoria. A elles hai qu’axuntar l’amuesa que l’Ayuntamientu de Xixón entamará tamién en 2005 a partir d’una rica colección particular de grabaos, sellos y monedes, y na que s’amosarán dos ediciones de la obra de Miguel de Cervantes editaes en 1605 y custodiaes pola Universidá d’Uviéu. Archivu. Xixón cellebra’l cuartu centenariu de ‘El Quijote’ con una esposición “única” de llibros, monedes y grabaos 5 de payares, 2004 0 FacebookTwitterPinterestEmail
Música La Sinfónica’l Principáu camuda de cara nuna nueva web pensada pa promocionar la orquesta nel esterior by asturnet 21 de setiembre, 2004 La Orquesta Sinfónica’l Principáu d’Asturies remocica la so cara más universal porque “poca xente sabe lo qu’asocede n’Uviéu” y fai falta un preséu pa da-y más difusión, más renome y más músicos a la entidá. Nesos términos presentó esta mañana el director de la OSPA, Maximiano Valdés, la renovada páxina web de la orquesta, que busca internacionalizar l’actividá de la formación musical. La OSPA meyora la so imaxe na rede nun momentu duce de siguimientu por parte’l públicu, yá que, según precisó la xerente de la orquesta, Encarnación Rodríguez, la renovación d’abonos de la temporada pasada algama casi el cien por cien a ocho díes de que se pieslle’l plazu, el númberu d’abonaos crez n’Uviéu penriba les cifres del añu pasáu y la entidá recupera’l públicu ‘perdíu’ en Xixón depués que les últimes dos temporaes nun s’habilitaren abonos pa los conciertos nesa ciudá. Talu interés tien la so proyección fuera d’Asturies: El calendariu d’actuaciones a mediu plazu de la orquesta prevé pa los prósimos 17 y 18 d’abril sendos recitales nel barcelonés Palau de la Música, actuaciones a les que siguirán un tercer conciertu nel auditoriu de Castellón, el día 19, y un recital caberu nel auditoriu de Zaragoza al otru día, 20 d’abril. Hasta entós, el camín de la OSPA sedrá llargu y empezará esta mesma nueche cola participación de la orquesta na temporada d’ópera d’Uviéu, nuna seronda na que la Sinfónica ufrirá dellos conciertos -dalgunos d’ellos, didácticos- n’estremaos puntos d’Asturies y actuará na gala d’entrega de los Premios ‘Príncipe’. La web que la orquesta presenta güei y que yá ta en funcionamientu dende hai una selmana inclúi información precisa sobro l’orixe y la composición de la OSPA, el so calendariu d’actuaciones, la discografía, los precios d’accesu a los conciertos y un formulariu de contactu, too ello con una doble versión en castellán y n’inglés. La Sinfónica’l Principáu arródiase de primeres figures de la música pa la próxima temporada 21 de setiembre, 2004 0 FacebookTwitterPinterestEmail
Emigración Areces planea una entrevista con Lula da Silva como culminación d’una xira per Iberoamérica n’ochobre by asturnet 3 de setiembre, 2004 Cuatro países en diez díes y una entrevista final col presidente de Brasil, Luis Inazio Lula da Silva. Esi ye’l plan de viaxe col que s’ultimen los detalles de la visita institucional que’l presidente autonómicu, Vicente Álvarez Areces, y el conseyeru de Xusticia y Rellaciones Esteriores, Francisco Javier García Valledor, prevén cursar nos diez primeros díes d’ochobre a Chile, Arxentina, Uruguay y Brasil. Según pudo afitar Asturnews, el programa -entá oficiosu- de la xira iberoamericana de dambos miembros del Gobiernu asturianu marca’l viaxe d’ida pal vienres 1 d’ochobre y fixa’l regresu, dende la ciudá brasileña de Sao Paulo y vía Madrid, pal sábadu 9 d’ochobre. El primer destín d’Areces y Valledor sedrá Chile, d’onde los integrantes de la comitiva asturiana partirán depués p’hacia les ciudaes arxentines de Buenos Aires y Rosario, y darréu a la capital del vecín Uruguay, Montevideo. La xira culminará en Brasil, onde’l presidente autonómicu prevé aconceyar cola primer autoridá’l país, Lula da Silva. Magar que los contactos yá tan pesllaos pa garantizar la cellebración d’esi alcuentru al traviés del cuerpu diplomáticu español destacáu en Brasil, fontes de la Conseyería de Presidencia’l Principáu matizaron que la entrevista final con Lula dependerá a la fin de variaciones d’última hora na axenda’l presidente brasileñu. Luis Inazio Lula da Silva, qu’accedió al poder hai agora dos años y abandera una nueva práctica política n’Iberoamérica con ciertu distanciamientu respectu al poderosu influxu d’Estaos Xuníos nos sos vecinos del Sur, viaxó a Uviéu n’ochobre de 2003 pa recibir el Premiu ‘Príncipe de Asturias’ de Cooperación Internacional, que’l xuráu -y concedió n’atención a la so trayectoria política y personal en defensa de los trabayadores y de la llucha contra la probitú, la corrupción y la desigualdá social. 3 de setiembre, 2004 0 FacebookTwitterPinterestEmail