Emigración La colonia asturiana de Sao Paulo va animar a Fernando Alonso nel Gran Premiu de Brasil by asturnet 14 de setiembre, 2005 La colonia asturiana en Sao Paulo va xuntase’l prósimu 25 de setiembre pa siguir la preba del Gran Premiu de Brasil na que Fernando Alonso puede convertise dafechu en Campeón del Mundu de Fórmula 1. Una fabada y música del país a cargu del gaiteru Bras Rodrigo y la tamboritera Lorena Gómez van acompañar a los emigrantes nesta xuntanza n’honor del pilotu uvieín. A la folixa de los asturianos residentes en Sao Paulo van asistir el nuevu Cónsul Xeneral de España en São Paulo, Fernando Martínez Westerhausen; la xefa de la Oficina Llaboral del Consuláu Xeneral de España en São Paulo, Ana María Serrano y el director da Axencia Asturiana d’Emigración, Luis Miguel Fernández Romero. Fernando Alonso puede converise en campeón del mundu de Fórmula 1 el prósimu 25 de setiembre si llogra facer podiu na preba del Gran Premiu de Brasil. 14 de setiembre, 2005 0 FacebookTwitterPinterestEmail
Emigración Valledor dexa nidio en Buenos Aires que “los presupuestos de la emigración son intocables” by asturnet 13 de setiembre, 2005 El Conseyeru de Xusticia Seguridá Pública y Relaciones Esteriores del Principáu, Francisco Javier García Valledor tornó otra vuelta a afitase nel so compromisu colos emigrantes hasta’l puntu de dicir nuna rueda de prensa al meudía d’esti llunes na Arxentina que “los presupuestos de la emigración son intocables” como rempuesta a una entruga de los periodistes alrodiu de como van afectar los recortes de los fondos comunitarios a los que se destinen a la emigración. El Conseyeru fizo estes declaraciones nuna rueda de prensa na que tamién afitó’l desendolcu del Plan d’Emigración recién puestu en marcha pela so Conseyería y calificó de Día hestóricu’l d’esti llunes en Buenos Aires pola xunta que desendolcare la FICA y na que elli participó. La xunta de la FICA tuvo presidida por José Luis Casas, Presidente de la Federación Internacional de Centros Asturianos, y entamó a les 10:30 hores na Sé social del Centru Asturianu de Buenos Aires, con representantes de los demás Centros Asturianos de lArxentina, pa tratar asuntos dinterés de la FICA y sobre la prósima reforma de la Llei dAsturianía. Nesa xunta recibieron amás los reconocimientos d’Asturianía los Centros Asturianos de La Plata y Mendoza ente otros. El Conseyeru de Xusticia Seguridá Pública y Relaciones Esteriores del Principáu, Francisco Javier García Valledorsu, amuesó na mañana del llunes el so compromisu pa colos emigrantes asturianos na Arxentina y prometió un «esfuerzu mui importante» coles ayudes que se vienen ufiertando a la emigración naquel país. Valledor dexó tamién afitao que “se ta faciendo un esfuerzu mui importante dende’l punto de vista social y vamos seguir faciéndolu”. Valledor tamién asoleyó na rueda de prensa mentada que’l Gobiernu asturiano tien dedicao al Plan d’Emigración 2004-2007 quince millones d’euros, lo que supón doblar la dotación destinada a los paisanos y paisanes d’esta comunidá que viven nel esternu, con respeutu al períodu anterior. Valledor tamién participó esti llunes nun seminariu que se desendolcó pela tarde nel Centru Asturianu de Buenos Aires alrodiu de la relación ente “Comunicación y Emigración” nel que participó el grupu Vezos d’Uviéu y nel que tamién intervinieron los periodistes Marcos Foglia, Editor Xefe de Clarin Dixital, Cristina Civale, escritora esperta en temes d’emigración, y Próspero Morán, Profesor de la Universidá Carlos III de Madrid. El Conseyeru de Xusticia, qu’aportó’l vienres a l’Arxentina y participó’l sábadu en dellos actos que cincaben a la reinauguración del Centru Asturianu de Mendoza, tien previsto treslladase esti día a la ciudá de La Plata, 50 kilómetros al sur de Buenos Aires, onde va ser nomáu “Huesped de Honor”, entrevistándose tamién col secretariu xeneral de la Presidencia arxentina, Oscar Parrilli. 13 de setiembre, 2005 0 FacebookTwitterPinterestEmail
Emigración Valledor tresllada a los emigrantes na Arxentina’l ciñu de tolos asturianos by asturnet 12 de setiembre, 2005 “Vosotros sois los nuesos meyores embaxadores, meyor diría yo, que Fernando Alonso”. Con estes sentíes pallabres finaba’l so discursu institucional el Conseyeru Francisco Javier García Valledor esti domingu na quinta que’l Centru Asturianu tien en Buenos Aires. Un discursu enmarcáu nel Día d’Asturies nel esternu que por primer vegada se desendolcaba na Arxentina, después de que la primer edición tuviera llugar l’añu pasáu en Madrí. Francisco Javier García Valledor aportaba a Buenos Aires depués de pasar por Mendoza y visitar a los asturianos residentes nesa importante ciudá arxentina. Y facíalo pa asoleyar la importancia que la so Conseyería de Xusticia y Relaciones Esteriores y el gobiernu mesmu al que pertenez-y dan a los emigrantes y, de manera especial, a los emigrantes n’América. El Conseyeru desplicó que l’añu pasáu cellebrárase en Madrí esti Día d’Asturies especialmente empobináu a la emigración non sólo porque tea na capitál del estáu Español el mayor númberu d’emigrantes, sinon tamién como homenaxe a los asturianos y españoles que padecieron el 11-M. Y esta vegada venía a desendolcase esti Día tan especial nel llugar del esternu onde más asturianos hai y tamién como un homenaxe mui especial a un asturianu tamién mui especial que nos dexó esti añu y que nun yera otru que l’artífice del grupu folklóricu del centru de Buenos Aires, Pelayo, y de tola activida alrodiu de la cultura tradicional que se fizo na capital Arxentina nes caberes décades: Manolo del Campo. El Conseyeru, Francisco Javier García Valledor, fizo un repasu a la importancia del trabayu de Manolo del Campo y fizo alcordanza del so trabayu favoratible pa col folklor y la llingua asturiana nel Centru Asturianu “que tan intensamente trabayó pa llorgrar esta cellebración de güei”. Valledor faló de la “deuda hestórica que se tien cola emigración” y dexó afitao que yera “un elementu de xusticia alcontrase equí con vosotros y vosotres”, imaxen nidia de lo que ye la emigración asturiana nel mundiu. L’actu que se desendolcó na quinta que tien en Vicente Flórez el Centru Asturianu entamó con partíes de Bolos y siguió tres de la Misa tradicional coles actuaciones del grupu Folklóricu Pelayo y el grupu Vezos, que viniere dende Asturies pa participar nesti día y pa siguir depués dellos díes actuando per estremaos llugares de l’Arxentina. Tres de les actuaciones folklóriques, nun día enforma soleyeru, pero abondo fríu, desendolcose la tradicional fabada na que sd’abellugó l’actu institucional”. Xunta’l Conseyeru que mañana sigue en Buenos Aires y el martes viaxa a la ciudá de La Plata, alcontrábense presidiendo esti actu’l presidente del Centru Asturianu, José Antonio Nespral, el Consul Xeneral d’España en Buenos Aires, Manuel Fairén, y el Direutor de la Axencia Asturiana d’Emigración, Luis Miguel Fernandez Romero, amás de delles otres aurtoridaes asturianes, como l’alcalde de Belmonte en representación del Conseyu de Comunidaes, y representantes de tolos Centros Asturianos de l’Arxentina. 12 de setiembre, 2005 0 FacebookTwitterPinterestEmail
Emigración Especial Día dAsturies na emigración 2005 by asturnet 9 de setiembre, 2005 Dende hai un añu’l Principáu d’Asturies complementa los sos actos institucionales de celebración del Día d’Asturies dientro de la rexón, con una fiesta dedicada a la emigración. Esti compromisu, establecíu ente’l Conseyeru de Xusticia, Seguridá Pública y Relaciones Esteriores, Francisco Javier García Valledor, y el Presidente de la FICA, Jose Luis Casas, va fraguase esti añu na ciudá arxentina de Buenos Aires. Les razones poles que foi elixía foron apuntaes pol director de l’Axencia Asturiana d’Emigración, Luis Miguel Fernández Romero, nel actu de presentación: ‘Buenos Aires ye la ciudá del mundu, fuera d’España, onde más asturianos residen. Y porque pal Principáu resulta una obligación moral, reconocer y homenaxear a Manolo del Campo, un añu depues de la so muerte’. El pasáu añu celebrárase en Madrid esti día, en colaboración col Centru Asturianu de dicha ciudá, por dos razones que destacó Romero: ‘Por ser la ciudá española na que más asturianos residen y por homenaxear a un pueblu qu’acababa de sufrir un horrible atentáu’. El programa d’esti añu va siguir los actos que tradicionalmente vienen organizando los asturianos de Buenos Aires. Una fabada nel Centru Asturianu pa conmemorar la xesta de Cuadonga y un espectáculu compuestu polo meyor del folklore fechu dientro d’Asturies, coordináu pol grupu folklóricu ‘Vezos Astures’, y lo meyor del folklore fechu fuera de la rexón, organizáu pol ‘Grupu Pelayo’, fundáu por Manolo del Campo hai más de cincuenta años. Estos actos tendrán el so prólogu na ciudá de Mendoza, onde’l día 10 van inaugurase les nueves instalaciones cola presencia del espectáculu de ‘Vezos Astures’. Otra manera, Jose Luis Casas, presidente de la FICA, fue invitáu pola Conseyería a acompañar al conseyeru, Francisco Javier García Valledor, y al director de l’Axencia Asturiana d’Emigración, Luis Miguel Fernández Romero, a los actos de conmemoración del día d’Asturies en Buenos Aires. Aprovechando esta visita, Jose Luis Casas va reunise’l día 12, a les 10:30 hores na Se social del Centru Asturianu de Buenos Aires, con representantes de los demás Centros Asturianos de l’Arxentina, pa tratar asuntos d’interes de la FICA, como la prósima reforma de la Llei d’Asturianía. Amás de pol presidente de la FICA, el conseyeru de Xusticia va tar acompañáu pol director de l’Axencia Asturiana d’Emigración, Luis Miguel Fernández Romero, el Vicepresidente del Conseyu de Comunidaes Asturianes y el coordinador del Gabinete del Conseyeru. Pero, mentes Buenos Aires prepara’l so Día d’Asturies, otros centros asturianos del mundu tamien entamen les sos fiestes de celebración de la festividá de la Santina de Cuadonga. Ésti ye’l casu de dalgunos centros españoles, como’l de Madrid, el de Barcelona, A Coruña, Cantabria, Salamanca y Torrevieja; y de dalgunos centros asturianos de fuera d’España, como’l de Bruseles, el de Nueva York, el de Monterrey en Mexico o’l de Sâo Paulo. El CA de Sâo Paulo preparó, como cada añu, la so Fiesta d’Asturies aprovechando la festividá del Día de la Independencia brasileña. Los actos de celebración escomenzaron el pasáu 7 de setiembre, en Lagoas, a les once y media la mañana, con una gran romería asturiana. Tres de la misa campal, fíxose distribución del bollu preñáu y la botella vino ente les más de doscientes persones congregaes; y anque taba previsto terminar la celebración con un torneu de bolos, el mal tiempu fixo que nun pudiere xugase. Pela nueche emitióse dende la Radio Imprensa FM un programa dedicáu dafechu al Principáu onde participaron el Presidente del CA, Jose María Aldariz, y el gaiteru astur-brasileñu, Carlos Luiz Bacelar. Pero los actos nun terminen equí. La 49 edición d’estes fiestes siguirá’l sábadu 24 de setiembre, a les ocho la tarde, cola presencia del director Luis Miguel Fernández Romero, que va aprovechar pa esponer la relación del Principáu colos emigrantes y de les ayudes asistenciales que promueve l’Axencia dientro del Plan d’Emigración. Tres d’esti actu, va facese la presentación del Coral Iberico na Sociedade Hispano Brasileira. La fiesta culminará’l domingu 25, a les dos de la tarde, con una gran fabada asturiana na Sociedade Hispano Brasileira na que se va facer presentación del gaiteru Bras Rodrigo y Lorena Gómez, que tarán acompañaos polos gaiteros y cuerpu folklóricu de la SHB. Siguiendo n’America, el Centru Asturianu de Monterrey (Mexico) presenta’l so programa de fiestes pa celebrar el día d’Asturies, que se va facer el prósimu domingp, día 11. El programa previstu pa la conmemoración de Nuestra Señora de Cuadonga cunta con una misa y ofrenda floral a la Santina na ilesia de la medaya milagrosa, asina como la entrega de los premios ‘Urogallo’, que sirven como reconocimientu a aquelles persones que destacaron pol so llabor a la comunidá. El Centru Asturianu de Bruseles abre la celebración el sábadu día 10 con una recepción na sala d’actos del ayuntamientu de Bruseles, onde’l so alcalde, Fredy Thielemans, recibirá los directivos del Centru Asturianu de Bruseles, los directivos del Centru Asturianu de Lieja. asina como a les personalidaes invitaes. A les doce la mañana, los grupos folklóricos desfilarán col ramu hasta’l Mannekenpis, que va ser vistíu con traxe d’asturianu pa la ocasión, y onde se va facer una degustación de sidra. A les dos de la tarde, el Presidente del Centru dará un discursu de bienvenía, al que va siguir l’actuación de los grupos folklóricos ‘Puxa Asturias’, ‘La Santina’, ‘Los pequeños de La Santina’, ‘Esbardu d’Aviles’ y la banda de gaites del Centru. Depues de la xinta y de la misa, a les ocho la tarde, el centru fadrá entrega del so galardón l’Horru d’Oro. El Centru Asturianu de Nueva York fue más adelantáu nes sos celebraciones y el pasáu domingo reunió a un centenar de persones nel Círculu Español de Queens, onde oficiaron una misa y esfrutaron d’una xinta de la hermandá. Ellí, la gaita de Xuacu Amieva amenizó una comida na que s’axuntaron varies xeneraciones d’emigrantes españoles. N’España, los centros asturianos tamien preparen les sos propies celebraciones. Como’l Centru Asturianu de Madrid, que’l domingo día 18, na Quinta Asturias, abre la xornada con un torneu de bolos asturianos, de petanca y de tiru a la rana. A les doce la mañana celebrarán una misa cantada pol Coru del centru, al que siguirá una procesión de la Santina. El pregón d’esti añu cuerre a cargu de la escritora, periodista y premiu Mazana d’Oru, María Teresa Álvarez, Condesa de Latores. Al terminar, el coru y los gaiteros del centru van actuar, pa dar pasu depues a una espicha a la que tán invitaos tolos asistentes. A les cinco la tarde actuarán el Grupu Vocal “Cantariego” y de l’Agrupación Folklórica “L´Alborá” Per otra parte, los díes 9, 10 y 11 de setiembre, el Centru Asturianu de Barcelona celebrará la Santina 2005. Dientro de los actos destaca’l Festival de Música Celta previstu pa güei que va cuntar coles actuaciones de los siguientes grupos: “City of Barcelona Pipe Band”,“Chundarata”(Centru Aragones-Casa d’Aragón, “Risca L’Alba”,“Dealan” y el solista “Iñaki Sánchez Santianes” ganador del certame Ciudá d’Uvieu 2005, modalidá gaita. Amás, va contase con solistas de gaita irlandesa y catalana (Sac de gemecs ). Mañana, a les siete la tarde, Ferrán Bello, Director Xeneral del Departarment de Cultura de la Generalitat, fadrá llectura del pregón, pa depues actuar la cantante de Tonada Dª Mª Rosario González Martínez. De siguío gran recital del Coru del Centru, dirixíu por Eva Villena. Al acabar l’actu ufiertaráse una degustación de sidra y aperitivu asturianu, qu’ofrecerá’l Centru a los socios asistentes y convidaos. El día 11 será’l día d’Asturies en Barcelona, qu’entamará col Concursu de Bolos, modalidá ‘Cuatreada’. A les once y cuartu la mañana saldrán en solemne procesión y misa n’honor de la Virxe de Cuadonga, a la que se-y fadrá una ofrenda floral. Namás acabar, el centru entregará la so distinción, l’Asturcón de Plata. A les doce y media ta prevista una muestra de Música y Danza asturiana, cola participación del grupu “Andecha pol Raigañu” y Rosario González. Tres de la xinta, actuará’l Ballet Folklóricu de Sarriá “Esbart Sarrià” a quienes se-yos rinde homenaxe na cellebración del so cincuentenariu. El Centru Asturianu de Cantabria, en Santander, celebrará los díes 14,16, 17 y 18 de setiembre la fiesta la Santina. El pregón d’apertura de la fiesta va ser a cargu del catedráticu d’Inxeniería Electrica de la Universidá de Cantabria, Luis Gáspar Vega, nun actu que va tener llugar nel Hotel Bahía, el día 14, a les nueve la nueche y que va tar dedicáu a los más de siete mil asturianos que residen na rexón. Los salones del Centru Asturianu van ser oxetu’l día 16 d’una conferencia sobre gastronomía asturiana, tres de la que’l Coru Ronda Altamira va facer una actuación pa tolos presentes. L’actu va entamar a les ocho la tarde. Al día siguiente, nel mesmu sitiu, va haber un concursu d’escanciaores de sidra natural asturiana. L’actu central dedicáu a la festividá de la Santina va ser el domingo 18, cuando a les once y media la mañana entame una procesión n’honor a la patrona, que saldrá de la Finca d’Altamira. A mediudía, va oficiase una misa cantada pol coru de la Fundación Principe d’Asturies, na que se va facer una ofrenda floral a la santa. A les ocho la tarde, y como broche a los actos de celebración, va facese una romería típicamente asturiana. El Centru Asturianu de A Coruña entamó los sos festeyos el pasáu día 7 y van durar hasta’l prósimu martes 13 de setiembre. Les fiestes patronales escomenzaron pasáu miercoles nel salón de actos del local social de l’asociación, cola llectura del pregón a cargu del periodista asturianu Jose Francisco Rodil. Les celebraciones acabarán el martes a les ocho la tarde con una misa en memoria de los socios fallecíos. Otru centru que yá empezó coles sos celebraciones ye’l de Salamanca. Como otros años, el Centru Asturianu de Salamanca montó una carpa nel Campu San Francisco xunta les del Centru Gallegu, l’Extremeñu y la Casa d’Andalucía. Como’l día 8 de setiembre coinciden la patrona de Salamanca, la Virxe de la Vega, el día d’Extremadura y el día d’Asturies, el centru asturianu de la ciudá salmantina celebra con ellos esti día, aprovechando les instalaciones de les Feries y Fiestes de la ciudá. Amás de preparar degustaciones de productos típicos asturianos y de repartir cartelos y catálogos informativos sobre la nuestra comunidá, güei actuará’l grupu ribeseyanu de música folk Corquieu nel escenariu instaláu nel recintu de les Cases Rexonales de la banda gaites Villa del Adelantado. Mañana, el Centru celebra los díes d’Asturies y Extremadura con una procesión que sal dende la Puerta de Zamora hasta’l Campu San Francisco, que va ser acompañada pola Banda de Gaites Villa del Adelantado y un grupu folklóricu extremeñu. Nel recintu de les Cases Rexonales, fadráse una misa campestre oficiada por cuatro sacerdotes: un gallegu, un extremeñu, un andaluz y un asturianu. El Centru Asturianu de Torrevieja nun ye menos y tamien se suma a les celebraciones de la festividá asturiana. Mañana, a les diez de la nueche, entamarán una verbena dedicada a la Santina na que va actuar l’artista xixonesa ‘Elena’. El domingo, a les once y media, entamará una procesión dende’l centru hasta la ilesia de San Roque, onde habrá una misa n’honor a la Virxe, amenizada pol grupu ‘L’Estruendu’. Terminada la misa, la procesión volverá a la se de l’agrupación, acompañada poles autoridaes asturianes y torrevexenses presentes nel actu. La Banda Gaites del CA d’Alicante ufiertará un conciertu a la una y media la tarde, pa que depues dea comienzu’l tradicional repartu del bollu y la botella vino pa los socios. A les seis y media, el centru tien previsto organizar un concursu d’escanciaores, mentes qu’a les siete y media entamará un festival públicu a cargu de l’Agrupación Artística Xixonesa, nel que van participar los siguientes artistes. En canción lixera: Silvia García, Susana Valles, Nerea Vázquez, Alejandro Nosti y Nerea Menendez. La canción asturiana va tar representada por Lito Cabal. Mentes que la canción española va selo por Antonio Montero. Acabáu’l festival va dar comienzu la representación teatral de les obres ‘La dama de las camelias’ y ‘La separación’. Jose Ramón Uría y Susana van presentar la Danza Clásica Española, a cargu de Fernando Luis Mendez Fraga y onde se va contar cola participación estelar del sociu de la entidá Jose Antonio del Cantu La Vara, campeón de tonada asturiana. Como dicimos, estes namás son dalgunes de les munches celebraciones del Día d’Asturies que se fain a lo llargu del mundu polos nuestros emigrantes col fin de festexar la patrona de la so tierra d’orixe, recordando la so cultura y l’asturianía que sienten más allá de les fronteres y les distancies. 9 de setiembre, 2005 0 FacebookTwitterPinterestEmail
Sociedá L’Asociación Internacional pa la Defensa de les Llingües Amenazaes considera insuficiente el Plan de Normalización by asturnet 26 de xunetu, 2005 El XXI congresu de l’Asociación Internacional pa la Defensa de les Llingües y Cultures Amenazaes celebráu en Miranda do Douro ente los díes 22 y 24 de xunetu analizó la situación actual de la llingua asturiana tres la recién aprebación del Plan de Normalización. Nes sos conclusiones l’AIDLCM considera que les midíes aprebaes pol parlamentu asturianu nun garanticen la supervivencia del nuestru idioma. Pa esti organismu non gubernamental el Plan elaboráu pola Conseyería de Cultura ye “enforma limitáu nos sos oxetivos y nun promueve’l marcu llegal afayadizu pa normalizar realemente la llingua propia de la sociedá asturiana”. Tocante a la presencia del asturianu na enseñanza l’AIDLCM denuncia que la nuestra llingua “alcuéntrase nuna situación difícil non namás por mor de les midíes lexislatives insuficientes sinón amás por mor de la situación d’inseguridá y de precariedá de los enseñantes de llingua asturiana”. L’organismu encamientea-y al gobiernu asturianu “pa algamar realmente la recuperación, el respetu al llibre usu de l’asturianu nuna sociedá moderna del sieglu XXI” la cooficialización del asturianu xunta’l castellanu en tol territoriu del Principáu. Al empar pide la ufierta xeneralizada de la enseñanza de llingua asturiana en tolos niveles educativos y la catalogación homologada de los puestos de trabayu pa enseñantes d’asturianu equiparándolos al del restu de les especialidaes pa garantizar la estabilidá necesaria na enseñanza del nuestru idioma. Nel congresu de Miranda do Douro asistió Roberto González Quevedo en representación de l’Academia de la Llingua Asturiana 26 de xunetu, 2005 0 FacebookTwitterPinterestEmail
Tecnoloxía Euskal Encounter va aconceyar en Barakaldo a seis mil fanáticos de los xuegos na rede y l’arte dixital by asturnet 20 de xunetu, 2005 L’Euskal Encounter, una de les folixes pioneres de los aficionaos a les cares creatives y lúdiques de la informática, escomienza esti viernes 22 en Barakaldo con una asistencia confirmada d’alrrodiu seis mil participantes. En total van ser cuatro díes nos qu’artistes dixitales, xugadores aficionaos y profesionales y usuarios en xeneral van xuntase en maratonianes sesiones d’enganche énte la pantalla d’un ordenador. El software llibre y la seguridá na rede son dos de los asuntos sobre los que tamién va haber ocasión de falar nesti alcuentru que tien llista d’espera pa participar nél na prósima edición de 2006. La Fundación Euskaltel, en colaboración cola Sociedá pa la Promoción y Reconversión Industria, la Diputación Foral de Bizkaia y el Banco Bilbao-Bizkaia, organicen esti alcuentru que se celebra nel País Vascu dende 1994 y que ye un de los más conocíos ente les “party” de xugadores y artistes na rede. Na parte creativa, desenvuélvese un programa d’amuesa de demoescena, alrodiu del que nació esti alcuentru. Na parte más lúdica Gamegune ufierta la posibilidá de pasar hores xugando nes carpes habilitaes pa ello na villa de Barakaldo. Nel Euskal Encounter participen aficionaos y profesionales de toles fasteres del estáu, tamién de países como Francia, Alemania, Polonia, Rusia, Reinu Uníu y Finlandia. La mayoría de los participantes son mozos d’ente los 14 y los 30 años, y predomina ente ellos el xéneru masculín. Los participantes van poder disfrutar d’una navegación d’altísima velocidá con una banda de 1 gigabit y tendrán zona d’agospiamientu, comedor, aparcamientu especial. Hasta agora tienen confirmao la so asistencia alrodiu de seis mil participantes y la organización tien abierto una llista d’espera pa la prósima edición. La cita ye ente los díes 22 y 25 de xunetu en Barakaldo. Euskal Encounter 20 de xunetu, 2005 0 FacebookTwitterPinterestEmail
Sociedá PSOE, IX y BA escenifiquen el so deséu de cumplir el pautu de gobiernu hasta’l final by asturnet 8 de xunetu, 2005 El presidente del gobiernu asturianu y los tres cabezaleros de la FSA, Izquierda Xunida y Bloque por Asturies comparecieron énte los medios con más d’una hora de retrasu y semblante seriu. Xunta ellos, los miembros de les delegaciones polítiques que participaron nel conceyu d’evaluación del pautu de gobiernu soscritu va dos años, ente ellos el conseyeru Valledor y Esteriores y la viceconseyera María José Ramos, sentaos na sala de prensa ente los informadores. El balance a la mitá de la lexislatura: un 66 por cientu de les midíes del pautu executaes y prácticemente toles otres entamaes. El primeru en garrar la palabra, foi el portavoz del Bloque, Rafa Palacios que lleó una valoración propia n’asturianu na que consideraba l’alcuerdu políticu tan necesariu agora de rematar de cumplir como va dos años de firmalu. Palacios terminó afirmando que pa la so organización inda quedaben munches coses pendientes y asuntos nos qu’afondar y sobre los que debatir. Al empar dixo que’l Bloque por Asturies nunca va renunciar a siguir lluchando polos derechos políticos, sociales, llaborales y llingüísticos del pueblu asturianu. El coordinador d’Izquierda Xunida d’Asturies,Jesús Iglesias, intervieno darréu pa resumir el balance que la so organización facía de los dos años de gobiernu compartíu. Na so valoración Iglesias incidió na importancia de lo avanzao n’asuntos como la vivienda, sanidá, servicios y derechos sociales, normalización del asturianu, y sobremanera nel nuevu clima políticu “de progresu y diálogu” que propiciara el gobiernu de coalición. L’últimu en falar foi Javier Fernández, secretariu xeneral de la FSA que dixo coincidir no esencial coles valoraciones espresaes polos representantes del Bloque ya Izquierda Xunida y amosó la voluntá del so partíu por siguir cumpliendo los oxetivos del pautu hasta’l final de la lexislatura. Nel documentu soscritu polos tres partíos del gobiernu asturianu afírmase qu’Asturies “avanzó respective a lo que yera en 2003 cuando FSA-PSOE, IX y BA firmábamos l’alcuerdu que fizo posible’l gobiernu de la izquierda plural”, sicasí reconozse que “inda queda abondo por facer” y que “nos prósimos dos años tenemos que poner en marcha o acelerar les midíes pendientes d’execución pa poder cumplir íntegramente el compromisu qu’adquirimos coles ciudadanes y ciudadanos d’Asturies”. Nel documentu van repasándose los distintos capítulos de la política desenvuelta dende la formación del gobiernu tripartitu y resalta el capítulu de política cultural tituláu “Identidá cultural asturiana” nel que se diz que la identidá propia del pueblu asturianu “ye un sentimientu común que sirve como nexu d’unión ente asturianos y queremos estender los sos valores per mediu de la comunicación social”. Nesti capítulu cultural destácase la llingua asturiana como “una de les nuestres señes d’identidá” y tocante al Plan de Normalización considérase que tán reflexaes nél toles midíes contemplaes nel pautu de gobiernu: “lo que-yos da un fuerte impulsu políticu y mayor concreción en cuantes a la so execución”. Tocante a la enseñanza del asturianu dizse que la llingua ta presente en tolos niveles educativos y resáltase que “el númberu d’alumnos que se matricula nesta asignatura crez cada añu”. El gobiernu amuesa darréu el so apoyu a l’aprebación de la llicenciatura de Filoloxía Asturiana nel marcu del Espaciu Européu d’Enseñances superiores. La toponimia y la presencia del asturianu n’alministración y nel Ente Públicu de Comunicación son otros puntos que se destaquen en materia llingüística. 8 de xunetu, 2005 0 FacebookTwitterPinterestEmail
Sociedá IAS tamién va entamar acciones llegales pa defender al so militante Faustino Zapico by asturnet 6 de xunetu, 2005 El portavoz d’Izquierda Asturiana (IAS), Inaciu Llope acusó a Izquierda Xunida-Bloque por Asturies de facer “xestos a la galería pa recuperar la credibilidá perdida nel mundu asturianista” nel casu de discriminación llingüísitica sufríu pol hestoriador y miembru de la dirección d’IAS, Faustino Zapico. Llope anunció tamién la intención del so grupu de sumase a les acciones llegales entames por Oficialidá y la Xunta pola Defensa la Llingua contra la Universidá y el rector Juan Vázquez. Izquierda Asturiana amosó la so solidaridá col so dirixente Zapico énte lo que califiquen de “un fechu que non por común dexa de ser habitual nesti país, al se-y xune l’ agravante de que ye la institución pública que se supón que tien erixise en promotora de la cultura la que se convierte nun axente activu de discriminación, colo que se rebaxa a ella mesma y degrada la función que-y correspuende”. Pal portavoz de IAS, Inaciu Llope lo sucedío al historiador Faustino Zapico “muestra claramente como n’Asturies la llingua asturiana ye un idioma proscritu, y los supuestos pasos que se dieron nos últimos años nun pueden evitar situaciones como esta, porque no se dieron na dirección adecuada; la del reconocimientu de los derechos de los y les falantes a utilizar la so llingua en tolos ámbitos sociales, ye decir, la normalización real de la mesma”. Llope aludió a les intervenciones públiques protagonizaes pol conseyeru de Xusticia y Esteriores, Francisco José García Valledor y pol so director xeneral de Cooperación, Rafa Palacios, pa calificales de “xestos a la galería pa recuperar la credibilidá perdina nel mundu asturianista” y acusó a IX-BA de “ser cómplices d’un gobiernu que tien secuestraos llegalmente los derechos de los y les falantes”. Pa Llope situaciones como la vivida por Faustino Zapico namás podíen evitase cola oficialidá y la necesidá “inescusable” de la so inclusión na prósima reforma del estatutu, ya que, según IAS: “de perder esta oportunidá taríamos abocaos a una situación d’auténticu cataclismu cultural”. IAS, la organización nacionalista a la que pertenez l’historiador Faustino Zapico, anunció la so intención de sumase a les acciones llegales entamaes por otros colectivos contra la Universidá y contra’l rector Juan Vázquez. 6 de xunetu, 2005 0 FacebookTwitterPinterestEmail
Comunicación Landeira va presidir el Conseyu d’Alministración de la TV Autonómica by asturnet 5 de xunetu, 2005 L’ex calde de Valdés, Jesús Landeira, sedrá’l nuevu presidente del Conseyu d’Alministración de la TV asturiana depués de que l’actual presidente, Bernardo Díaz-Nosty tenga d’abandonar la presidencia de la mesma por incompatibilidaes cola presidencia del Conseyu del Audiovisual d’Andalucía pa la que va ser nomáu darréu. L’únicu periodista y espertu nel ámbitu de la comunicación audiovisual que formaba parte del Conseyu d’Alministración del Ente Públicu de la TV y Radio asturiana ta acabante de ser nomáu pa presidir el Conseyu del Audiovisual d’Andalucía, cargu que ye dafechu incompatible con cualaquier actividá que cinque al audiovisual. Poro mor d’ello tien d’abandonar la presidencia del Conseyu d’Alministración de la radiotelevisión d’Asturies. Díaz-Nosty ye un de los mayores y meyores conocedores del audiovisual español ya hispanoamericanu y ún de los más nomaos caderalgos universitarios. Diaz-Nosty vien desendolcando dende hai tiempu la so actividá docente como caderalgu na Universidá de Malaga. El Conseyu d’Alministración del Ente Públicu ta formáu anguaño por nueve miembros nomaos por PSOE ya Izquierda Xunida-Bloque por Asturies: los ex alcaldes socialistes Jesús Landeira (Valdés) y Manuel Amieva (Llanes), la ex conseyera d’Alministraciones Públiques Angelina Álvarez, l’abogáu Francisco Díaz, la notaria Montserrat Martínez, la economista María Luzdivina Rodríguez; el caderalgu de comunicación Bernardo Díaz Nosty; el profesor de Drechu Constitucional Benito Aláez y l’escritor n’asturianu y técnicu cultural Adolfo Camilo Díaz. Entá nun se conoz por quién va ser sostituíu Bernardo Díaz-Nosty nel internu del Conseyu. La polémica sigue arrodiando al proyeutu de TV asturianu, después de que la selmana pasada’l Conseyu de Gobiernu del Principáu aprebara na so xunta , pero fuera del orde del día, la creación de les sociedaes de radio y TV autonómiques, lo qu’enfadó abondo a los conseyeros d’Izquierda Xunida-BA que nun tan un res d’alcuerdu con cómo se tan faciendo les coses nel procesu de selección, sigún pudo saber Asturnews. Al paecer, el PSOE nun comunicó a IX que tenía la intención d’aprebar nesa reunión cabera les sociedaes porque n’IX nun taben d’alcuerdu con facelo enantes d’afitar les bases de cómo sedría la programación d’eses sociedaes en llinees xenerales y enantes de dexar mui nidio cómo se fadrá la selección del personal y cómo se tendrán en cuenta los méritos pa la mesma. 5 de xunetu, 2005 0 FacebookTwitterPinterestEmail
Sociedá La victoria de Touriño en Galicia y la so esperable andecha col BNG esmolecen na Tierra Navia-Eo by asturnet 27 de xunu, 2005 La confirmación de la victoria final de la candidatura encabezada pol socialista Emilio Pérez Touriño tres finar el recuentu al votu emigrante y la so previsible andecha de gobiernu col Bloque Nacionalista Galego d’Anxo Quintana, supón l’entamu d’una nueva etapa política na comunidá vecina, tres décades de mayoría del PP. No que respeta a Asturies, el previsible pautu PsdG-BNG puede suponer un cambiu nes bones relaciones avezaes ente entrambes comunidaes si el nuevu executivu lleva alantre les pretensiones de nacionalistes y socialistes gallegos sobre l’espardimientu de la llingua propia del so territoriu per otres fasteres pertenecientes a otres comunidaes, como la Tierra Navia-Eo. Inda l’apueste poles fales que los pangaleguistes nomen “galego esterior” nun ye una de les prioridaes cimeres de la política llingüística amosada nos programes electorales del Partíu Socialista de Galicia y el Bloque, que ponen per delantre l’afitamientu de la normalización social en tolos niveles onde inda nun tien la relevancia necesaria, les pretensiones sobre la tierra d’Entrambasaguas apaecen conseñaes como un de los puntos programáticos del Bloque nesa materia y ye conocida la coincidencia nel asuntu del partíu de Pérez Touriño colos nacionalistes del BNG. Va pocos meses el grupu parlamentariu del PSdG na Xunta de Galicia presentó una iniciativa pa fomentar l’espardimientu de la llingua y la cultura gallega per otres comunidaes vecines, ente elles l’asturiana, qu’a la fin nun llegó a tramitase tres les converses calteníes por representantes de la FSA colos sos compañeros gallegos. Sicasí, la previsible coalición del PSdG col partíu del nacionalista Anxo Quintana, puede reforzar esta reivindicación vieya del galleguismu más aferráu a les sos esencies radicales, ente les que s’afayen les pretensiones de considerar parte de la Galicia cultural y nacional fasteres asitiaes fuera del territoriu hestóricu d’esi país onde la so influencia cercana xenera zones de transición fronteriza, mesmo nel terrén llingüísticu hacia les fales del troncu común galaico-portugués. Lo lóxico en dialéctica política había ser que la bona sintonía presidiera esta nueva etapa abierta en Galicia pola presencia nel gobiernu de la Xunta d’un executivu con asemeyada composición ideolóxica al del Principáu y con predominiu del mesmu partíu al que pertenecen la FSA y el PSdG. Sicasí la cuestión llingüística, si a la fin, se materialicen les pretensiones sobre la Tierra Navia-Eo, podíen abrir un periodu de fondes tensiones institucionales énte les dos comunidaes, nel que ye posible nun resulten tan eficaces como hasta agora los toques d’atención y el diálogu ente socialistes gallegos y asturianos. En reiteraes ocasiones, alcaldes de los conceyos, asociaciones ciudadanes y los propios vecinos d’Entrambasaguas tienen amosao la so esmolición cada vez que dende Galicia se pon de manifiestu la reivindicación llingüística, cultural y hasta política sobre esta rexón asturiana. L’únicu estudiu sociollingüísticu xeneral entamáu hasta agora na zona, por un equipu dirixíu pol caderalgu de la Universidá del País Vascu Francisco Llera Ramo, nun dexaba duldes alrodiu de la percepción que tienen mayoraitariamente los vecinos d’Entrambasaguas tocante a la so identidá colectiva, inequívocamente asturiana. Agora la nueva etapa política abierta en Galicia puede volver semar les esmoliciones na Tierra del Navia-Eo. 27 de xunu, 2005 0 FacebookTwitterPinterestEmail